Jeremaia 14 - Intas Etipup

NUARIN TAS ALUPAS 14.

1 Numlaig has esjilid, 7 et alaigaheni a Jeremaia vaig. 10 Et esjum a Ihova par adai intas o un va nup u Juta. 13 Et has nedo ura par atahaijeg intas o ilpu profeta asan tas ahcil. 17 Et ohocred a Jeremaia, um, lep alaigaheni vai ra.

¹ INTAS o Ihova inig is yetpam ehele Jeremia va numlaig has nigki.

² Era taigtaig a nup u Juta, era auatialidi a ilpu atimi alupas; era taigtaig alupas ara um atpuse an nobohtan; et mun aridjai naunyauwaig u nup u Jerusalem.

³ Eris abrai ilpu aheca ura a ilpu atimi alupas ura mika eri apan ara um athoi wai: eris yetpan u ehpai wai ara, ja eris eti ecetai tah inwai ara; eris adumoij pam ara, is tup ti inwai irai ipjiitai ura; eris ehcamai ara, is imtimlai nesganimtara ara, eris adahpoi nidjinira ara.

⁴ Eris ehcamai a ilpu atimi ahapol, eris adahpoi nidjinira ara, vaig inig nikavaig, et mun umohau nobohtan, is eti asuol incopda an nobohtan.

⁵ Im lep inig, is ahad nanin aleg an lelitai, um udei inhal o un, vaig inig nikavaig, is eti eteuc neri itai.

⁶ Eris lep aiji togke aleg irai uarin ijinies, eris ehcipigid nimtinjap ara et idivaig niji imyeuv; is auatialidi nesganimtara ara, vaig inig nikavaig, is eti eteuc nefelelicai.

⁷ Ak Ihova, et idim asuptecnaig vai cama nedo has unyima, ja namu ago nitai inigki aiek va nidam ache: ecra mun ecahinag adumoij pan aijama; ecra mun ago nedo has vai euc aijama.

⁸ Ak Atua inig era asgeig iram a nup Isreel, na imiatamai ra aiek an nopan ohocred ura, na a uri aiek par idivaig natimi an taka uarin an pece inigki? na a uri aiek par idivaig natimi atga an nefalaig, et apan an tah nimnim aien mika yi umjeg an nepig et ethi ache?

⁹ Na a uri aiek par idivaig natimi pop? um idivaig natimi emda inig et auatialidi aien par imiatamaig atimi? ja na amen aiek an niblama, ak Ihova, er anvi nidam irama; namu jim udei cama aiek.

¹⁰ Et ika a Ihova va nup igcaki, Era idim merit ara par imipalea, era mun eti acaiji nimipalea ura ara, va nitai inigki et eti upene inliinmopoi Ihova vai ra; etpu idim imiehva nedo imipalea ura aien, um aru nedo has ura.

¹¹ Is lep ika ehelek a Ihova, Namu jim alaigaheni aiek vai nup igcaki mika eri amen upene ara.

¹² Eru wit atwakam ara, ekpu eti atahaijeg nahlaig ura ainyak; eru wit ahlap ara an nitai ahlap atnamud, ka nitai ahlap er caig, etpu eti upene inliinmopok vai ra ainyak: ja ekpu auahas ra ainyak an nedoa, im numlaig has, im inmas alupas.

¹³ Kis um ika ainyak, Awe! ak Ihova Natimarid, era idim ika ehele ra a ilpu profeta. Akupu eti almoi nedoa aijaua, etpu eti yetpam ehelemia numlaig has; ja ekpu alupai caua nigpa inveijec ainyak an nuarin inigki.

¹⁴ Is um ika ehelek a Ihova, Era asuptecnaig intas ahcil an nidak a ilpu profeta; kis eti abrai ra ainyak, kis eti ikni ra ainyak, kis eti tas ehele ra ainyak: era asuptecnaig ehelemia ara nitai ahuumtidec ahcil, im intas apat, im intakitai, im intas efaifa inig et ahes an liinmopora.

¹⁵ Va nitai inigki et ika a Ihova vai ilpu profeta iji ig era asuptecnaig intas ara an nidak, ja kis eti abrai ra ainyak, ja era ika ara, Inyi eti eteuc nedoa, im numlaig has an pece inigki; Ekpu idim auahas ilpu profeta iji igki ainyak an nedoa im numlaig has.

¹⁶ Uhpu erekhaig irai efalaig Jerusalem ilpu profeta iji ig era asuptecnaig intas ehele ra ara, va numlaig has im nedoa; etpu eti eteuc tah par atelmoi ra, ara marom, im ilpu ehgara, im ilpu halav atamaig ura, im ilpu halav atahig ura: vaig inig nikavaig, ekpu atladwi nedo has ura ira ra ainyak.

¹⁷ Va nitai inigki namu asaig intas inigki ehele ra aiek, nikavaig, Etmu yah nidinimtak ainyak an nepig im lep an nadiat, um eti atumop: vaig inig nikavaig, eh mun auahas alupas inhalav atahig u ilpu atimi unyak, et emda alupas inmocop iran.

¹⁸ El ek apan itac ainyak anliin pece, el ek alum ra sji igki ainyak eh mun atgei ra an nedoa! el ek apan an maliyum ainyak, el ek a alum ra sji igki ainyak era areci ara vai numlaig has! maiya era atga jipe a ilpu profeta im ilpu atimi ahlap an pece inigki ja era eti ato itai ara.

¹⁹ Na mun atcijaig ehni nup u Juta aiek; et idim esjum inliinmopom aiek vai nup u Saion; na a uri aiek par auud cama aiek, et idim eti eteuc nitai ago cehcehe cama? ecris aitgaig nigpa aijama, ja et eti eteuc tah nitai upene; im lep nopan ago cehcehe cama, ja ecra almoi nohocred aijama!

²⁰ Ak Ihova, Ecra idim asuptecnaig nedo has u ilpu atmil unyima aijama, im nimipalea unyima: ecra mun ago nedo has vai euc aijama.

²¹ Namu jim amcel vai cama aiek, va nidam, namu jim auoh ehcamai nitai ateuc esjilid unyum aiek: namu imiehva aiek, um jim auahas intas etipup unyum vai cama.

²² Et idim eti emda tah irai ilpu atmas era alaigaheni vaig a ilpu atimi apat par ika yi ehe; et idim eti tup ispun ahes an nohatag incopda; na idim Atua aiek, ak Ihova Atua unyima; va nitai inigki ecrupu asgeig iram aijama: na mun idim ago nitai iji igki asega aiek.