Jeremaia 13 - Intas Etipup

NUARIN TAS ALUPAS 13.

1 Et upyi asuptecnaig nauahas vaig u ilpu atimi o un a Atua va nalmu itai inig, nikavaig, nitai ahid apelumai yilyil eris adenaig an nohmun wai Yufretes. 12 Et lep upyi asuptecnaig aien mika eri 8 ahnag ara va nohocred ura an tas ecsipece va niji hubej et ohua waina iran. 15 Et ahugni ra aien mika eri atapnes niji ohocred, etpu yetpam. 22 Et asuptecnaig aien mika et ahes an nedo ura er amcel vaig nohocred iji ehki.

¹ IS um ika a Ihova ehelek, Namu apan aiek um leh nitai ahid apelumai yilyil imtam, um ahid an wauahid unyum, jam jim atise an wai.

² Kis idim leh nitai ahid ainyak et idivaig intas o Ihova, um ahid an wauahid unyak.

³ Is aketo intas o Ihova um yetpam ehelek, um ika,

⁴ Namu leh nitai ahid inig aiek, et eteuc ehelum an wauahid unyum, um atidai, um apan u nofowai Yufretes, um adenaig eahki an ra mun nij.

⁵ Kis idim apan ainyak, um ui adenaig nitai ahid iyehki ubutpotet u nofowai Yufretes, is idivaig is asaig ehelek a Ihova.

⁶ Is idim uco, is wat ti pan itac nadiat is ahinag, is ika ehelek a Ihova, Namu atidai aiek, um apan u nofowai Yufretes, um imiapam nitai ahid iyehki, kis asaig ehelum ainyak mika an adenaig eahki.

⁷ Kis um apan u nofowai Yufretes ainyak, um ucji, um imiapam nitai ahid an nuarin iyehki kis adenaig iran ainyak: ja is idim mutit nitai ahid iyehki, is eti upene vaig tah nitai.

⁸ Is um yetpam ehelek intas o Ihova, um ika,

⁹ Et ika a Ihova, Etpu idim uco, ekpu auahas namen upene u nup u Juta ainyak, im lep namen upene esjilid u nup u Jerusalem.

¹⁰ Erupu idivaig nitai ahid inig, et eti upene vaig tah nitai, a ilpu atimi auatatimi iji ig era esjum ara par atahaijeg intas unyak, era apitac inliinmopora imipalea ara, um ahilek ilpu atua et eche, mika eri aheca ura, um alaigaheni vai ra.

¹¹ Et ika a Ihova, Et idim apol nitai ahid an wauahid u natimi, et idim uco, kis ika ainyak eri apol irak a nup Isreel asega im nup u Juta asega; mika eri ilpu atimi unyak ara, um imiapaahni nidak, im nitai imiahpas nyak, im nitai esjilid unyak: ja eris esjum ara par atahaijeg.

¹² Va nitai inigki namu asan tas inigki ehele ra aiek, um ika, Et ika a Ihova Atua u nup Isreel, Etpu ohua waina irai hubej asega: erupu lep ika ehelum ara, Ecra idim ato aijama mika, etpu ohua waina irai hubej asega.

¹³ Namu lep ika ehele ra aiek, Et ika a Ihova, Ekpu idim ika ainyak eri ahnag vai waina a nup uran pece inigki asega, im ilpu atimarid iji ig era isjeupigmoig Tevit ara an nitai ateuc o un, im ilpu atimi ahlap, im ilpu profeta, im nup u Jerusalem asega.

¹⁴ Et ika a Ihova, Ekpu auhoig yi oplecoplec jipe ra ainyak, ilpu etmara im ilpu halav atamaig ura: ekpu eti updak ainyak, um eti eropse, ekpu eti aiheuc vai ra ainyak, ja ekpu auahas ra ainyak.

¹⁵ Akumu atahaijeg aijaua, akumu atgeig pam intikgamia aijaua; etmu jim ijinies inliinmopomia aijaua: et mun idim tas a Ihova.

¹⁶ Akumu imiahpas Ihova Atua unyimia aijaua, etu wit eti fi ika aien yi apat, im lep aku wit eti fi epihtau aijaua irai iji edoon apat, im lep aku wit aitgaig inlah aijaua, kit etpu ika aien yi almun mas, um lep ika yi alupas inmehcim.

¹⁷ Ja el eka eti atahaijeg aijaua, etpu taigtaig inliinmopok ainyak irai uarin adenaig vai nijinies u inliinmopomia; ekpu taig alupas ainyak, etpu yah nidinimtak, vaig inig nikavaig, eh mun imiapan an taka pece ilpu atimi u Ihova.

¹⁸ Namu ika aiek ehele natimarid im lep ehele natimarid takata, Arumu ago nedo upoupo aijaurau, um ateucse: etpu ika aien yi etjose an nidjinimirau incat adgaig u natimi alupas unyimirau.

¹⁹ Uhpu atapnes niji maliyum an pece inig et ahes nuritoga iran, etpu eti asalgei tah: uhpu imiapan nup u Juta asega au taka pece, uhpu idim imiapan ra asega an taka pece.

²⁰ Akumu yiaspan aijaua, um alum ra sji igki era apam ara, nikavaig, nup uran pece iyehki et ahes narutu iran: Et amen eda inpak ira siip iyehki eris alupai euc, inpak irai siip esjilid unyum marom?

²¹ Napu asaig inhe aiek etu wit aru iram aien? na mun esege imi ra aiek mika eri ilpu atimi alupas ara um esjilid iram: napu idim ohocred aiek et idivaig intakata inig et ika aien yi apos inhal o un.

²² El et ika inliinmopom aiek, Et mun yetpam irak nitai iji igki van he? Eh mun atipagki inlepei unyum, im lep incedpun neduom va nedo has esjilid unyum.

²³ Et elika vai nup Idiopia par ika yi eche narasin, im lepart par ika yi eche nuarin ugyitugyit iran; et idim uco, et ehka vai caua, ak ilpu atimi umjijeuc an nedo has, par ago nedo upene.

²⁴ Va nitai inigki ekpu imiterimterim ra ainyak et idivaig nefelelicai inig et ahlaadaig nimtinjap et ahes an namasacen.

²⁵ Et ika a Ihova, Nimtan imi euc nigki, neruvaig inig et ahes ehelek ek mun asjaaicnaig iran imtam ainyak; vaig inig nikavaig, na mun ahnag irak aiek, um ateuc an tas ahcil.

²⁶ Va nitai inigki ekpu atipagki inlepei unyum ainyak, mika eri alum euc natimi, napu ehcamai aiek.

²⁷ Ek mun ecetai ingeijid unyum ainyak, im inlaav unyum, im nacitak unyum, im nedo has esjilid unyum, im nedo unyum er amcel vaig irai edoon, im lep anliin pece. Kaiheuc vai euc, ak Jerusalem, napu esjum aiek mika eri ago adicinadicin euc um yetpan an nahopan?