Jeremaia 12 - Intas Etipup

NUARIN TAS ALUPAS 12.

1 Et asan tas ehti a Jeremaia va namen upene u ilpu atimi auatatimi, et wat ateuc an tas o Atua aien, et ecetai nauahas ra vaig aien. 5 Et asuptecnaig ehelen a Atua nedo efaifa u ilpu etwan vai yin, 7 et lep imitaig ilpu atimi o un aien. 14 Et upyi asaig aien ehele ilpu atimi imiisjis ninveijec iji ig eris imiapan ra an taka pece, mika uhpu imiadumoij pam ra an pece ura.

¹ AK Ihova, et atoh nedo unyum eku wit imiisjis ehelum ainyak: ja ekpu ahodaig euc ainyak va neruvaig unyum: Et echamecha mika era ikni itai a ilpu atimi auatatimi? et echamecha mika era amen upene a ilpu atimi asega era ago nedo efaifa esjilid ara?

² As mun ahwai ra aiek, era mun umumoh ara va neucvara: era ededel ara um oho: na ubutpotet aiek u nipjineucsera, ja na itac acen aiek u inliinmopora.

³ Ja na ato nyak aiek, ak Ihova: na mun alum nyak aiek, um ahilek inliinmopok et apol iram: namu ahyausei ra aiek et idivaig siip eri atgei ra, um ikni ra va nadiat inig eri atgei ra iran.

⁴ Etpu taig inpece um yetpan an nohopan, um lep imlai nefelelicai irai iji uari pece asega, va nedo has u ilpu atimi amen iran? eh mun auahas niji itai eklim edo irai pece, im lep niji man; vaig inig nikavaig, eris ika ara, Etpu eti ecetai inmas uja aien.

⁵ El et ehrathut aiek im ilpu atimi athut, el et mun auatialidi aiek, etpu echamecha iram el et athut aiek im hors? el et mun areci aiek an pece igpa inig, na asgeig pan iran aiek, etpu echamecha iram etu wit ahgarero nofowai Jortan?

⁶ Et idim uco, era mun ago nedo efaifa vai euc a ilpu etwam, im ilpu atimi an nimnim u etmam; era mun idim apitac euc ara um ahlaig ijinies: namu jim imiisjis ninveijec intas ura, era wat tas upene ehelum ara.

⁷ Ek mun udei nimnim unyak ainyak, ek mun atcijaig nuarin nobohtan unyak ainyak; ek mun atcijaig ehgak et aiyu inliinmopok ainyak vai yin imi ilpu atimi tak atimi iran.

⁸ Era mun idivaig laion an nesei vai nyak a nup uran pece unyak; era mun aunyauwaig vai nyak ara: va nitai inigki ek mun esjum vai ra ainyak.

⁹ Era mun idivaig inman ugyitugyit vai nyak a nup urau pece unyak, era arehed ira ra niji man um yiat ira ra; erumu ahtag pam niji itai eklim edo irai pece asega, um asjapicnaig, um auahas.

¹⁰ Era mun auahas nokoro vaine unyak a ilpu atimi asgi siip et ahinag, era mun auwihise irai eduora nuarin nobohtan unyak ara, era mun ika ara yi amasacen nuarin nobohtan esjilid unvak um umaruma.

¹¹ Era mun ika ara yi umaruma, et taigtaig vai nyak inpece umaruma; et idim umaruma inpece asega, ja et eti aktaktai inliinmopon tah.

¹² Era mun yetpam a ilpu atimi atoraliak itai irai iji uarin ijinies an namasacen: etpu atgei atimi a Ihova an nauitoga o un ahes an nilpun pece et ethi um yetpan an nilpun pece et eche: etpu eti eteuc nigpa vaig tah natimi.

¹³ Era mun ahwaig nupsi hwiit ara, ja erupu ehlek niji itai upunupun ara: era mun leh nohocred ara va nauritai ura, ja erupu eti upene vaig ara: erupu ehcamai ara va nasau iran, vaig inig nikavaig, et edemda alupas a Ihova.

¹⁴ Et ika a Ihova vai ilpu atimi eblaamnem asega unyak, ilpu atimi auatatimi iji ig marom era auahas inpece inig ara kis ika ainyak eri ohuun a ilpu atimi unyak nup Isreel; Ekpu idim iknipagki ra ainyak an pece ura, ekpu lep iknipagki nup u Juta ehele ra ainyak.

¹⁵ Etpu idim uco, eku wit iknipagki ra ainyak ekpu adumoij pam ainyak, um aiheuc vai ra, um lep imiapam ra asega irai iji uari obohtan ura, im lep irai iji pece ura, athi um athi ehni.

¹⁶ Etpu idim uco, el era emda ara um ato nedo o ilpu atimi unyak, um asig yi aktit intas va nidak, um ika, Et idim umoh a Ihova; et idivaig eris esege imi ilpu atimi unyak par asig yi aktit intas vai Beal; erupu amen aktit ara ehele ilpu atimi unyak.

¹⁷ Ja, et ika a Ihova, el era eti atahaijeg nyak ara, ekpu iknipagki ehni nup uran pece iyehki ainyak um auahas ra.