Jeremaia 11 - Intas Etipup

NUARIN TAS ALUPAS 11.

1 Et efehtas intas etipup u Atua a Jeremaia. 8 Et acaiji nup u Juta aien va nimipalea iran ura. 11 Et upyi asuptecnaig niji itai has aien etpu yetpam ira ra, 18 im lep etpu yetpam irai nup Anadod vai intas alwai ura mika eri atgei Jeremaia.

¹ INTAS inigki is ahes ehele Ihova um yetpam ehele Jeremaia nigki, um ika,

² Namu atahaijeg intas an tas etipup inigki aiek, um tas ehele nup u Juta, im lep ilpu atimi amen Jerusalem;

³ um ika ehele ra, Et ika a Ihova Atua u nup Isreel; Uhmu asan tas ahlaijaig vai natimi inig et eti imiaiji intas iji ig au tas etipup inigki aien,

⁴ kis tas alep vaig ainyak ehele ilpu retpomia an nopan iyehki kis wat iknipagki ra an pece Ijipt ainyak, an nohocred esjilid ura va nauanaheca, um ika, Akumu atahaijeg nohrak aijaua, um imiaiji intas unyak, et idivaig intas iji igki asega ek tas alep vaig ehelemia ainyak; mika akupu ilpu atimi unyak aijaua, ekpu lep Atua unyimia ainyak:

⁵ mika ki ehneijid intas iyehki kis asig yi aktit ainyak ehele ilpu retpomia, par alupai ra inpece et alupas acen nidenided im hune iran, et idivaig an nopan inig. Kis lep asaig ainyak, um ika, Etmu idim uco, ak Ihova.

⁶ Is um ika ehelek a Ihova, Namu asuptecnaig intas iji igki asega aiek irai iji maliyum an pece Juta, im lep irai iji efalaig Jerusalem, um ika, Akumu atahaijeg niji tas an tas etipup inigki aijaua, um imiaiji.

⁷ Kis ated emda ilpu retpomia ainyak an nopan iyehki kis iknipagki ra ainyak an pece Ijipt, um imihum pam an nopan inig, kis atidai an nuhihialeg ainyak um ated ra, um ika, Akumu atahaijeg nohrak aijaua.

⁸ Ja eris eti atahaijeg ara, um eti atgeig pam intikgara, ja eris apitac inmerit u inliinmopora imipalea ara asega, athi um athi ehni: va nitai inigki ekpu imiapam ehele ra ainyak intas iji igki asega an tas etipup inigki, kis tas alep vaig ehele ra ainyak mika eri imiaiji; ja eris eti imiaiji ara.

⁹ Is ika ehelek a Ihova, Era ehri tiduarin a nup u Juta, im ilpu atimi amen Jerusalem.

¹⁰ Era mun ahidaig pan ra ara u nedo has u ilpu retpora iji ig, eris esjum ara par atahaijeg intas unyak; eris apitac ilpu atmas irai taka pece ara par aheca ura: era mun auahas intas etipup unyak inig a nup Isreel im nup u Juta kis asaig ainyak imi ilpu retpora.

¹¹ Et ika a Ihova, Va nitai inigki ekpu imiapam nitai has iji igki vai ra ainyak, etpu elika vai ra nahapan vaig; im lep inig, el era ahlaig vai nyak ara, ekpu eti adai intas ura ainyak.

¹² Erupu lep apan a nup urai maliyum an pece Juta im nup u Jerusalem, um ahlaig vai ilpu atmas iji ig eris atnamud nitai auanipin upene imi ra ara: ja erupu idim auatialidi ara par imiatamai ra an nopan ohocred ura.

¹³ Et ahinag niji maliyum unyimia, ak nup u Juta, et idim uco, et ahinag ilpu atmas unyimia; et lep ahinag niji efalaig an maliyum Jerusalem, et idim uco, et ahinag niji efata eka mun uctaig aijaua va natmas inig er amcel vaig, niji efata marom par atnamud nitai auanipin upene imi Beal.

¹⁴ Va nitai inigki namu jim alaigaheni aiek vai nup igcaki, um asaig tah intas ugyi ka tah intas alaigaheni vai ra: ekpu idim eti atahaijeg ra ainyak eru wit ahlaig vai nyak ara au nopan ohocred ura.

¹⁵ Et amen an nimnim unyak a ehgak van he, et mun ago ingeijid aien ehele atimi et ahinag? et idim itap vai yin par hegaig niji itai ahlap u Atua; na wat ago nedo has aiek, na imiacitak vaig aiek.

¹⁶ Is anvi nidam a Ihova par ika, Incai oliv, et mat, um eklim upene, um esjilid nohwan: etu wit alupas nohra atimi, etpu adnan cap iran aien, va uhpu asvi niji ran.

¹⁷ Et mun asaig nitai has vai euc a Ihova esjilid acen, aien aigki is ahwaig euc aien, vai nedo has inig u nup Isreel im nup u Juta, era mun ago ara vai ra par auahas inliinmopok, eris wat atnamud nitai auanipin upene ara imi Beal.

¹⁸ Is ika a Ihova ki ato ainyak, ek lep ato ainyak: as lep asuptecnaig ehelek aiek nedo ura.

¹⁹ Ja kis idivaig nakli siip auata upenc inig ainyak er imiapan yin par atgei; kis eti ato ainyak mika eris alwai nyak ara, um ika, Intumu auahas incai im lep nohwan akaija, intumu atipagki yin akaija an pece inig era umumoh natimi iran, mika eri jim lep imiehva nidan.

²⁰ Ja, ak Ihova esjilid acen, aiek aigki na tas alep atoh aiek, na ahilek upene inliinmopoi atimi aiek im niji aktaktai ura, namu ika aiek ki almoi neruvaig unyum ira ra ainyak: ek mun idim asuptecnaig ehelum ainyak namen unyak.

²¹ Va nitai inigki, et ika a Ihova, vai nup Anadod iji ig era alwai euc ara, um ika, Namu jim asuptecnaig intas aiek an nidai Ihova, va ecri jim atgei euc aijama:

²² Va nitai inigki, et ika a Ihova esjilid acen, Ekpu idim aru nedo ura ainyak: erupu emesmas a ilpu atimi emda ura an nedoa; erupu emesmas a ilpu halav atamaig ura im ilpu halav atahig ura va numlaig has:

²³ etpu eti eteuc nahtahut ira ra: ekpu imiapam nohocred ainyak irai nup Anadod, nikavaig, nopan aruvaig ira ra.