Jeremaia 10 - Intas Etipup

NUARIN TAS ALUPAS 10.

1 Et eti idivaig Atua niji atmasimai. 17 Et ahugni ra a naprofeta mika eri aha va nohocred etpu yetpam. 19 Et imitaig nauahas vaig u neom itap va nedo ahnag u ilpu atimi alupas ura. 23 Et alaigaheni aien va Atua ja et upoupo inliinmopon aien.

¹ AK nup Isreel, akumu atahaijeg intas inig aijaua et asaig ehelemia a Ihova:

² et ika a Ihova, Akumu jim esege nedo o ilpu atimi apat imi caua aijaua, um jim imtitaig aijaua va niji itai asjaaicnaig an nohatag; era idim imtitaig vaig a ilpu atimi apat.

³ Et takitai nedo o ilpu atimi apat: et attai incai an nesei tah, et lep ates a natimi amarero an pas eduwi o un.

⁴ Era yecrei ara irai silver im colt; era ago ipjin ara irai nel im hamer, vai yi jim amaamai.

⁵ Era aduwi atoh ara et idivaig neaig, ja era eti tas ara: eris idim ika eri apos ra, et ehka vai ra natga vaig. Akumu jim imtitai ra aijaua; et ehka vai ra nago vaig tah nitai has, era lep auatialidi ara par ago tah nitai upene.

⁶ Im lep inig, et eti eteuc tah et idivaig euc, ak Ihova; na alupas aiek, et lep alupas nidam um emda.

⁷ Ak Natimarid irai nup urai iji pece, etpu eti ecen vai euc a di, etu wit yetpam ehelum aien? vaig inig nikavaig, et eti eteuc tah et idivaig euc ehele ilpu atimi arapakau asega irai nup urai iji pece, im lep irai nup urai iji elcau ura asega.

⁸ Ja era idim ahnag ara, um eti eteuc lelra: et itai asjaaicnaig vai nauoh takitai ura nauincai iyehki.

⁹ Era leh silver apalapal irai Tarsis ara um imiapam, im colt irai Ufas, nauritai inig is ago a natimi auritai irai silver, im lep nauritai irai ikmai atimi ago itai irai colt: et emilmat im cap napelumai ura: era ago nitai iji igki asega a ilpu atimi arapakau.

¹⁰ Ja et Atua inveijec a Ihova, et Atua umoh aien, et Atimarid aien irai iji mesese: et wat edemda aien etpu amaamai nobohtan, erupu eti emda a nup urai iji elcau par amen et wat uhum ra intavaitap o un.

¹¹ Akumu ika ehele ra aijaua, Ilpu atua iji ig eris eti ago nohatag im nobohtan ara, erupu atiih ara an nobohtan inigki, im lep ithan nohatag inaico.

¹² Is ago nobohtan aien an nemda o un, is ikni aktit niji itai asega aien an narapakau o un, is lep elgelgei nohatag an naktaktai upene o un.

¹³ Et wat efehtas aien, et ahes incopda alupas an nohatag, et ika aien yi ahes an tid an nobohtan niji apat, um aridjai; et ago nauwainapit im incopda aien, et ika aien yi ahes nimtinjap irai eom ikni itai o un.

¹⁴ Et eti eteuc lele tah ira atimi asega va nato itai ura: era ehcamai a ilpu atimi wud ugyit asega va niji atmasimai ura: et ahcil niji almu itai ura, et eti umoh tah.

¹⁵ Et takitai nitai iji igki, nauritai u ilpu atimi ahnag: etpu tiih an nopan aru ira ra.

¹⁶ Et eti idivaig ra sji igki a Atua alayi ilpu mapoi Jekob: et Atua ago niji itai asega aien; era ilpu atimi an pece o un a nup Isreel: et idan Ihova esjilid acen.

¹⁷ Namu asjapicnaig niji itai unyum an pece aiek, ak natimi amen an neom emda.

¹⁸ Et ika a Ihova, Akumu ato aijaua mika, ekpu erekhaig nup uran pece inigki ainyak an nopan inig, ekpu ehcerucai ra ainyak, mika eri ato ara.

¹⁹ Kaiheuc vai nyak, er ehtoplecoplec nyak! et emda inmocop irak: ja kis ika ainyak, Et idim uco, nohocred unyak mun igki, ja ekpu anaijiraig nyak ainyak.

²⁰ Eh mun auahas neom atga unvak, et mun omot niji jaula iran asega: era mun udei nyak a ilpu hal unyak, era idim ti ara: et eti eteuc tah par lep athai neom atga unyak, im lep par atijai apelumai natcai an neom unvak.

²¹ Era idim ahnag a ilpu atimi asgi siip, era mun eti ahilek Ihova ara: va nitai inigki erupu eti amen upene ara, uhpu lep imiterimterim inpak irai siip asega ura.

²² Akumu atahaijeg aijaua, et apam nohran tah, et lep eteuc inreiman alupas va nup uran pece iyehki et ahes iran narutu, era ika ara yi ahyuahyu niji maliyum an pece Juta, im lep yi uarin amen niji imyeuv iran.

²³ Ek ato Ihova ainyak, et eti idivaig nedo o atimi nedo o un: et eti idivaig natimi aien par ago itai um asjaaicnaig nedo o un.

²⁴ Ak ihova, namu eklim aredei nyak aiek, ja eti an nedemda unyum; va an jim auoh oplecoplec nyak aiek.

²⁵ Namu atladwi nedemda unyum aiek irai nup urai elcau iji ig era eti ato euc ara, im lep irai nup urai pece iji ig era eti ahlaig va nidam ara: vaig inig nikavaig, era mun caig ilpu mapoi Jekob ara, um atleg ra, um auahas ra, um ika yi umaruma niji uarin amen iran ura.