Jeremaia 1 - Intas Etipup

NUARIN TAS ALUPAS 1.

1 Nopan inig is ati Jeremaia a Atua. 3 Nativaig o un. 11 Et ahuumtidec aien um ecetai inran nagai im nipjiuru. 15 Intas ohocred o un ehele nupu Juta. 17 Et ago emda inliinmopon a Atua vai intas upyi asaig o un par atau imi yin.

¹ NIJI tas o Jeremaia inhal u Hilkaia ji igki; is atimi is ethi aien irai ilpu atimi ahlap iji ehki eris amen ara Anadod an pece Benjamin:

² is yetpam ehelen intas o Ihova an nopan umoh u Josaia inhal u Emon, an mesese dirtiind u natimarid vaig o un.

³ Is lep yetpam ehelen an nopan umoh u Jehoiakim inhal u Josaia natimarid an pece Juta, um lep yetpan an natupun an mesese twelfd irai Setekaia inhal u Josaia natimarid an pece Juta, um yetpan an nopan iyehki eris imiapan nup u Jerusalem an taka pece an mohoc fifd.

⁴ Is yetpam ehelek intas o Ihova, um ika,

⁵ Kis wat eti fi ago euc ainyak an nipjinetgai risum, kis ato euc ainyak; eris wat eti fi apos euc, kis ika ainyak napu itap aiek, kis lep ati euc ainyak mika an aprofeta aiek imi nup urai iji pece.

⁶ Kis um ika ainyak, Awe! ak Ihova Natimarid, ek eti ato ainyak intas vaig: ek idim halav ache ainyak.

⁷ Ja is ika ehelek a Natimarid. Namu jim ika aiek, Ek halav ache ainyak: vaig inig nikavaig, napu apan aiek ehele ra sji igki asega ekpu atirai euc ainyak mika an apan; napu lep asan tas iji igki asega aiek ekpu abrai euc vaig ainyak.

⁸ Is lep ika a Ihova, Namu jim imtitai ra aiek: ekpu idim amen ehelum ainyak par imicoho euc.

⁹ Is um adan nikman a Ihova um atcei pam nipjineucsek. Islep ika ehelek a Ihova, Namu ato aiek mika, ek mun ikni niji tas unyak ainyak an nipjineucsem.

¹⁰ Namu ato aiek mika, ek mun ati euc ainyak an nadiat inigki mika an esjilid aiek irai nup urai iji pece im lep nup urai iji elcau, par atecrei itai, um alcapdicrai itai, um auahas itai, um amejatpuh itai, um lep uctai itai, um ahwai itai.

¹¹ Is lep yetpam ehelek intas o Ihova, um ika, Ak Jeremaia, na almoi inhe aiek? Kis ika ainyak, Ek almoi inran nagai ainyak.

¹² Is um ika ehelek a Ihova, Na mun almuktit aiek: vaig inig nikavaig, ekpu imiisjis ainyak par ehneijid intas unyak.

¹³ Is um aketo intas o Ihova um yetpam ehelek, um ika, Na almoi inhe aiek? Kis um ika ainyak, Ek almoi nipjiuru ainyak et aridjai nadran; et ahes narutu anliin um ahecatoh.

¹⁴ Is um ika ehelek a Ihova. Etpu ahes narutu nohocred um yetpam ehele atimi asega era amen an pece inigki ara.

¹⁵ Namu idim ato aiek mika, ekpu ahlaig ainyak vai nup urai iji pece asega im lep nup urai iji elcau an pece inig et ahes narutu iran: erupu adpam ara, um ikni dorona ura, athi um athi ehni, irai eucse athatahau Jerusalem,im lep u athatahau asega marehed mihtag, im lep ui iji maliyum asega an pece Juta.

¹⁶ Ekpu asaig neruvaig unyak ainyak ehele ra, va nedo has asega ura, vaig inig nikavaig, eris udei nyak ara, um atnamud nitai auanipin upene imi ilpu atmas irai taka pece, um alaigaheni vai itai eris ago irai ikmara.

¹⁷ Ja namu arore inwauahid unyum aiek an nitai ahid, um atidai, um asaig ehele ra intas asega iji ig ekpu imiabrai euc ainyak: namu jim imititai ra aiek, vai ki jim auahas euc ainyak an nuhup ura.

¹⁸ Namu idim ato aiek mika, ek mun ati euc an nadiat inigki ainyak, mika an idivaig inmaliyum inig et arehed iran nathatahau, um idivaig noboatau hat, um idivaig niji irahed bras vai inpece asega, im lep vai ilpu atimarid an pece Juta, im lep vai ilpu atimi alupas iran, im lep vai ilpu atimi ahlap iran, im lep vai nup uran pece inigki.

¹⁹ Erupu lep ati nedoa vai euc ara; ja erupu eti esjilid iram ara; vaig inig nikavaig, et ika a Ihova. Ekpu amen ehelum ainyak par imicoho euc.