Jenesis 8 - Intas Etipup

Nuarin tas alupas 8.

1 Et umri inwai. 4 Et euctaig nelcau iyehki an nau Ararat. 7 Reven im nucip. 15 Et udei nelcau a Noa van tas alep u Atua. 20 Et actaig natau a Noa, um ahlap an nitai ahlap iran. 21 upene inliinmopoi Atua vaig, et ika aien inyi eti lep asan tas ahlaijaig vai nobohtan aien va atimi.

¹ IS imiehva Noa a Atua im niji itai umumoh asega, im niji itai eklim edo irai pece asega ehelen anliin nelcau: is ika a Atua yi iji nimtinjap an nobohtan; is um umri inwai;

² eris atapnes jap um atapnes irai tapnes an nohatag, is eti lep ehe;

³ is umri inwai an nobohtan irai iji adiat: is wat ti pan itac nadiat is wun huntret im fifte is ame inwai.

⁴ Is euctaig nelcau an tah nedoon Ararat an mohoc sevend, an nadiat seventiind.

⁵ Is umri inwai irai iji adiat um yetpan an mohoc tend; is ateucrad niji lola au an nadiat first, an mohoc iyehki.

⁶ Is wat ti pan itac nadiat is forte, is asalgei nitai lah iyehki an nelcau a Noa is ago aien:

⁷ is ati pok ijo reven is ethi aien, is ae sjipe um uhmu pan an nopan iyehki is umri inwai an nobohtan.

⁸ Is lep ati pok ijo nucip is ethi aien par ato, kit is ame inwai an nobohtan, ka oʼo:

⁹ ja is eti ecetai tah nuarin igca inig nucip yi eteuc iran, is adumoij pan ehelen an nelcau aien, is amen inwai an nobohtan asega: is ada nikman aien, um asjirai yin, um leh pam yin ehelen anliin nelcau.

¹⁰ Is amen aien ira adiat is seven, ja par lep ati pok ijo nucip an nelcau.

¹¹ Is lep adumoij pan ehelen nucip an jupura; is amen an nipjineucsen neri oliv is aces yi aijiraig aien: va nitai inigki is ato a Noa mika, is ame inwai an nobohtan.

¹² Is lep amen aien ira adiat is seven, ja par aketo um ati pok ijo nucip; is eti lep, adumoij pan ehelen nucip.

¹³ An mesese siks huntretd im first irai Noa, an mohoc uhup, an nadiat uhup, is ame inwai an nobohtan: is atipagki nitai adahpoi nelcau a Noa, um almoi, is um mese nobohtan.

¹⁴ Is um mese nobohtan an mohoc sekunt an nadiat twente sevend.

¹⁵ Is tas ehele Noa a Atua, um ika,

¹⁶ Udei nelcau aiek, im ehgam, im ehtaij halav atamaig unyum, im ehgai ehtaij halav atamaig unyum.

¹⁷ Um imiua pok ijo niji itai umumoh asega et amen ehelum, niji man, im niji itai eklim edo irai pece, im niji itai asega et atahas an nobohtan; mika eri ahad, um ahinag acen an nobohtan.

¹⁸ Eris alau ijo a Noa, im ehtaij halav atamaig o un, im ehgan, im ehgai ehtaij halav atamaig o un:

¹⁹ eris ahes an nelcau um alau ijo niji itai eklim edo irai pece asega, im niji itai atahas asega, im niji man, im niji obotpot itai umumoh asega an nobohtan.

²⁰ IS actaig natau imi Ihova a Noa; um lucsei nahaiji itai eklim edo irai pece upene asega, im nahaiji man upene asega, um ahlap irai iji itai ahlap er atnamud an natau.

²¹ Is ahgei nipin upene a Ihova; is ika inliinmopoi Ihova. Inki eti lep asan tas ahlaijaig nobohtan ainyak va atimi; et has naktaktai u inliinmopora ara an halav ura, um yetpan irai iji adiat; inki eti lep auahas niji itai umumoh asega ainyak, et idivaig kis mun ago ainyak.

²² Inyi eti lep ti nopan ahwai itai im nopan asjapicnai itai, im neiweiyu im nihlup, im inmesese im inlidija, im nadiat im nepig, an namen asega u nobohtan.