Jenesis 7 - Intas Etipup

Nuarin tas alupas 7.

1 Et apan anliin nelcau a Noa, im ilpu hal o un, im niji itai umumoh. 17 Et atupun nahgarero u inwai, um alupas, i itu.

¹ IS ika a Ihova ehele Noa, Namu apam aiek anliin nelcau, im ilpu hal unyum asega; ek idim ato ainyak mika na upene aiek an nuhup unyak ira atimi asega an nopan inig.

² Namu lucsei aiek niji obotpot itai eklim edo irai pece upene asega, yi seven im seven ehni, natamaig im natahig: im lep niji obotpot, itai eklim edo irai pece eti upene asega, yi aro um aro ehni, natamaig im natahig.

³ Im lep niji man an nauanohatag yi seven im seven ehni, natamaig im natahig; vai erupu umumoh ara um ahad an nobohtan asega.

⁴ Etu wit ti pan itac nadiat inyi seven, ekpu ika ainyak yi ehe an nobohtan ira adiat inyi forte im nepig inyi forte; ekpu auahas niji itai umumoh asega ainyak an nobohtan kis ago ainyak.

⁵ Is ago nedo asega inigki a Noa is asaig ehelen a Ihova.

⁶ Is umoh a Noa irai mesese is siks huntret (600), ja is par ahgarero nobohtan.

⁷ Is apan anliin nelcau a Noa, im ehtaij halav atamaig o un, im ehgan, im ehgai ehtaij halav atamaig o un, va nahgarero u inwai.

⁸ Im lep niji itai eklim edo irai pece upene, im niji itai eklim edo irai pece eti upene, im niji man, im niji itai atahas asega an nobohtan,

⁹ eris apan ara ehele Noa anliin nelcau, um aro um aro ehni, natamaig im natahig, is idivaig is asaig a Atua ehele Noa.

¹⁰ Is ti pan itac nadiat is seven, ja is atupun um ahgarero nobohtan.

¹¹ An mesese siks huntretd irai Noa, im inmohoc sekunt, im nadiat seventiind, an nadiat iyehki is erijai injap, um asalgei intapnes an nohatag.

¹² Is ehe an nobohtan ira adiat is forte im nepig is forte.

¹³ Is apan anliin nelcau a Noa an nadiat iyehki, im Sem, im Ham, im Jefed, ehtaij halav atamaig u Noa, im ehgai Noa, im ehgai ehtaij halav atamaig o un;

¹⁴ im lep niji obotpot itai eklim edo irai pece aleg asega, im niji obotpot itai eklim edo irai pece auata upene asega, im niji obotpot itai atahas an nobohtan asega, im niji obotpot man asega.

¹⁵ Eris apan ehele Noa anliin nelcau niji itai umumoh asega, um aro um aro ehni.

¹⁶ Eris apan iran niji itai umumoh asega, natamaig im natahig, is idivaig is asaig ehelen a Atua: is atapnes iran a Ihova.

¹⁷ Is ehe ira adiat is forte; is alupas inwai, is ahlaahos nelcau ijinies an nobohtan.

¹⁸ Is esjilid inwai um ahgarero nobohtan; is ahman nelcau an narasin wai.

¹⁹ Is esjilid acen inwai an nobohtan; is um atalulu niji au alupas asega ithan nohatag.

²⁰ Is ahga inwai, um ahlau jai irai kubit is fiftiin, um atalulu niji au.

²¹ Eris emesmas niji itai umumoh asega an nobohtan, inman, im niji itai eklim edo irai pece auata upene, im niji itai eklim edo irai pece aleg, im niji itai asega et atahas au nobohtan, im lep natimi asega:

²² eris idim emesmas niji itai umumoh asega au nobohtan.

²³ Ers auahas niji itai umumoh asega an nobohtan, natimi, im niji itai eklim edo irai pece, im niji itai atahas, im niji man an nauanohatag; eris auahas ra an nobohtan: is umoh ache a Noa, im lep ra eris amen ehelen ara anliin nelcau.

²⁴ Is esjilid inwai an nobohtan ira adiat is wun huntret im fifte.