Jenesis 47 - Intas Etipup

Nuarin tas alupas 47.

1 Et imiapan ilpu etwan et faiv a Josef, um ikni ra an nuhup u Fero, 7 im lep etman. 11 Et alupai ra nuarin amen iran aien, im lep nitai caig incara. 13 Et leh mune asega u nup Ijipt aien, 16 im niji itai eklim edo irai pece ura, 18 im lep umara, vai Fero. 22 Et eti auanimtan umai ilpu atimi alupas a Josef. 23 Et atcijaig umara imi ra aien va nuarin nohwai itai fiftd. 28 Niji mesese irai Jekob. 29 Et ika ehele Josef aien yi asig yi aktit intas ehelen mika yi atelmoi yin ehele ilpu atimi ehpan iran.

¹ IS apan a Josef, um asaig ehele Fero, um ika, Et mun ham a etmak, im ilpu etwak, im siip ura, im kurimatau ura, im niji itai asega ura, eris ahes an pece Kenan ara; era amen an pece Cosen ara.

² Is lucsei nahaiji ilpu etwan aien, natimi is faiv marom, um imiapan ra ehele Fero.

³ Is ika a Fero ehele ilpu etwan. Eka ago niv auritai aijaua Eris ika ehele Fero ara. Ak natimarid, ecra atimi asgi siip aijama, eris lep uce a ilpu retpoma.

⁴ Eris lep ika ehele Fero ara, Ak natimarid, ecra mun ham aijama mika ecri amen an pece inigki aijama; et tiih nefelelicai incai niji itai eklim edo irai pece unyima; et alupas numlaig has an pece Kenan: va nitai inigki ecra ugyi euc aijama, ak natimarid, mika ecri amen aijama an pece Cosen.

⁵ Is tas a Fero ehele Josef, um ika, Et mun ham ehelum a etmam im ilpu etwam:

⁶ et eteuc inpece Ijipt an nuhup unyum; namu asaig aiek ehele etmam im ilpu etwam, mika eri amen ara an nuarin esjilid an pece; erumu amen an pece Cosen ara: el et ato ilpu atimi arapakau ira ra aiek, ikni ra, mika eri aminjinaig niji itai eklim edo irai pece unyak ara.

⁷ Is imiapan Jekob etman a Josef, um ati yin an nuhup u Fero: is aiheuc vai Fero a Jekob.

⁸ Is ika a Fero ehele Jekob, Is ehed inmesese iram aiek?

⁹ Is asuptecnaig ehele Fero a Jekob, um ika. Ek mun amen ainyak an nobohtan irai mesese is wun huntret im dirte: is eti elpat um has inmesese irak, ek mun eti uhum pan ainyak irai mesese u ilpu retpok.

¹⁰ Is acis yi alwai Fero a Jekob, ja par ahes ehelen um alau ijo.

¹¹ Is ikni etman im ilpu etwan a Josef, um atcijaig imi ra nobohtan an pece Ijipt, an nuarin esjilid, au pece Rameses, is idivaig intas is asaig a Fero.

¹² Is alayi etman, im ilpu etwan, nitai caig a Josef, im ra asega an nimnim u etman, is idivaig eris esvi ilpu hal ura.

¹³ Is tiih nitai caig an pece asega; is esjilid acen numlaig has; eris auatialidi a nup Ijipt im nup u Kenan asega va numlaig has.

¹⁴ Is asjapicnaig mune asega an pece Ijipt a Josef, im lep an pece Kenan, vai korn eris auanimtan ara: is imiapan mune an nimnim u Fero a Josef.

¹⁵ Is wat tiih mune an pece Ijipt, im lep an pece Kenan, eris apan ehele Josef a nup Ijipt asega, um ika, Alaama nitai caig aiek; va ecri jim emesmas aijama an nuhup unyum: et tiih mune unyima.

¹⁶ Is ika a Josef, El et tiih mune unyimia, alupai nyak niji itai eklim edo irai pece unyimia; ekpu ahtai korn imi caua ainyak va niji itai eklim edo irai pece unyimia.

¹⁷ Eris imiapan niji itai eklim edo irai pece ura ehele Josef ara: is alupai ra nitai caig a Josef um lucsei hors ura, im siip ura, im kuvimatau ura, im togke ura: is alaa ra nitai caig aien, um lucsei niji itai eklim edo irai pece asega ura an mesese iyehki.

¹⁸ Is wat ti pan itac inmesese iyehki, eris apan ehelen ara an mesese is eche, um ika ehelen, Ak natimi alupas, ecrupu eti ateri vai euc aijama mika, et ti mune unyima; na ohuun niji itai eklim edo irai pece unyima aiek; et eti amen tah nitai unyima an nuhup unyum, nohuma ache, im umama:

¹⁹ ecri a uri aijama par emesmas an nuhup unyum, etpu amasacen inpece unyima? namu auarimtama aiek, im umama, irai itai hegaig; etmu ohuun cama a Fero, im lep umama: namu alupai cama nupsiitai aiek, vai ecrupu umumoh aijama um eti emesmas, vai yi jim amasacen inpece.

²⁰ Is auanimtan pece Ijipt asega a Josef vai Fero; eris ahtai umara a nup Ijipt asega, va numlaig has esjilid iyehki: is idim ohuun inpece ura a Fero.

²¹ Is ikni atimi asega aien, mika eri aheca u Fero ara, ahes an na-haijin pece Ijipt um yetpan an nahaijin.

²² Ja is eti auanimtan nobohtan u ilpu atimi alupas ache aien; is alupai ilpu atimi alupas nitai caig incara a Fero, eris caig nitai caig ara is alupai ra a Fero: va nitai inigki eris eti ahtai nobohtan ura ara.

²³ Is tas ehele atimi a Josef, um ika, Ek mun idim auarimtamia ainyak im umamia vai Fero an nadiat inigki: almoi, nupsiitai imi caua mun igki, akumu ahwaig aijaua umamia.

²⁴ Etu wit ededel, akumu at-cijaig nahaijin fiftd imi Fero ai-jaua, ja etpu amen nahaijin et for imi caua, par ahwaig an nobohtan, im lep nitai caig incamia, im incai ilpu hal unyimia, im incara asega irai imnim unyimia.

²⁵ Eris ika ara, As imiatamaig cama aiek: namu aiheuc vai cama aiek, ak natimi alupas, ecrupu aheca u Fero aijama.

²⁶ Is asan tas alep inigki a Jo-sef an pece Ijipt asega um imihum pam an nopan inig, mika yi ohuun nahaijin noliwai itai fiftd a Fero; ja is eti ohuun nobohtan u ilpu atimi alupas ache a Fero.

²⁷ Eris amen an pece Ijipt a ilpu hal u Isreel an nuarin pece Cosen; eris ohuun niji uari obohtan ara eahki um asvalav, is um ahinag acen.

²⁸ Is amen an pece Ijipt a Jekob irai mesese is seventiin: is umoh a Jekob irai mesese is wun huntret im forte seven (147).

²⁹ An nopan iyehki is wat ubutpotet u unmas u Isreel, is ahlaig vai Josef inhal o un aien, um ika ehelen, El et upene inliinmopom aiek vai nyak, namu ati nikmam aiek ithan neduok, um ago nedo aiheuc vai nyak, im nedo inveijec; ek ugyi euc ainyak mika an jim atelmoi nyak an pece Ijipt aiek:

³⁰ ekpu han asjeuc ainyak ehele ilpu retpok, namu atipagki nyak aiek an pece Ijipt, um atelmoi nyak an netheso ura. Is ika aien, Ekpu ago nitai inig ainyak na mun asaig aiek.

³¹ Is ika aien, Namu asig yi aktit intas ehelek aiek. Is asig yi aktit intas ehelen aien. Is atpuse a Isreel an nilpun tinan.