Jenesis 46 - Intas EtipupNuarin tas alupas 46. 1 Et ago eropse inliinmopoi Jekob a Atua Biersiiba. 5 Et ahes eahki aien im niji ira atimi o un um yetpan Ijipt. 8 Er esvi nup an nimnim o un era apan Ijipt ara. 29 Et aubilid Jekob a Josef. 31 Et esege imi ilpu etwan a Josef vai intas ura eri asaig ehele Fero. 1 IS atga o un a Isreel, um lucsei niji itai asega o un, um yetpan Biersiiba, um ahlap irai iji itai ahlap vai Atua u Aisak etman. 2 Is tas ehele Isreel a Atua an numjeg ahnag o un an nepig, um ika, Ak Jekob, ak Jekob. Is ika aien, Ainyak ap aigki. 3 Is ika aien, Ek Atua ainyak, Atua u etmam: namu jim imtitaig aiek napan vaig Ijipt; ekpu ika ainyak eri ahinag a ilpu mapom eahki: 4 ekpu ahced euc ainyak an napan vaig unyum Ijipt; ekpu lep imiadumoij pam euc ainyak: etpu ati nikman an nesganimtam a Josef. 5 Is ahes Biersiiba a Jekob um atga o un: eris apos Jekob etmara a ilpu hal u Isreel irai itai atga iji ehki, is alupai ra a Fero mika eri apos yin iran, im lep ilpu hal ura, im ilpu ehnaa ura. 6 Eris lucsei kurimatau ura ara, im niji itai ura eris asjapicnaig an pece Kenan ara, um yetpan Ijipt, Jekob im ilpu hal o im asega ehelen: nikavaig, 7 ilpu halav atamaig o un, im ilpu halav atahig o un, im ilpu mapon asega, is imiapan ilpu eteuc iran asega an pece Ijipt aien. 8 Nidai nup Isreel ji igki eris apan an pece Ijipt ara, Jekob im ilpu hal o un: nan, Ruben inhal u Jekob inmeto. 9 Im ilpu hal u Ruben; nan, Henok, im Falu, im Hesron, im Karmai. 10 Im lep ilpu hal u Simeon; nan, Jemuel, im Jemin, im Ohat, im Jekin, im Sohar, im Seal inhal u intakata Kenan. 11 Im ehtaij hal u Livai; nan, Cerson, im Kohad, im Merari. 12 Im ilpu hal u Juta; nan, Er, im Onan, im Sila, im Feres, im Sera: ja erus emesmas a Er im Onan an pece Kenan. Erus hal u Feres a Hesron im Hemul. 13 Im ilpu hal u Isakar; nan, Tola, im Fuva, im Jesub, im Simron. 14 Im ehtaij hal u Sebulun; nan, Siret, im Ilon, im Jeliil. 15 Eris ilpu hal u Lia ara sji igki, is apos ra imi Jekob aien Petaneram, im lep Taina inhalav atahig o un: eris dirte dri a ilpu halav atamaig asega o un, im ilpu halav atahig o un. 16 Im ilpu hal u Cat; nan, Sifion, im Hacai, im Sunai, im Esbon, im Irai, im Arotai, im Ariilai. 17 Im ilpu hal u Eser; nan, Jimna, im Isua, im Isuai, im Biraia, im Sira natahig ira ra: im ohwat hal u Biraia; nan, Hiber, im Malkiel. 18 Eris ilpu hal u Silpa ara sji igki, is atcijai yin imi Lia inhalav atahig o un a Leban; is apos ra sji igki imi Jekob aien; eris sikstiin ara asega. 19 Im ohwat hal u Rejel ehgai Jekob; nan, Josef, im Benjamin. 20 Is lep apos Manasi im Ifreem a Josef an pece Ijipt; is apos rau imi yin a Asenad inhalav atahig u Potifera natimi alupas On. 21 Eris ilpu hal u Benjamin ara sji igki; nan, Bila, im Biker, im Asbel, im Cira, im Neaman, im Ihai, im Ros, im Muppim, im Huppim, im Art. 22 Eris ilpu hal u Rejel ara sji igki, is apos ra imi Jekob aien; eris fortiin ara asega. 23 Im inhal u Tan; nan, Husim. 24 Im lep ilpu hal u Naftalai; nan, Jasiel, im Cunai, im Jiser, im Sillem. 25 Eris ilpu hal u Bilha ara sji igki, is atcijai yin imi Rejel inhalav atahig o un a Leban; is apos ra sji igki imi Jekob aien: eris seven ara asega. 26 Eris sikste siks natimi iji ehki asega eris ahes ehele Jekob ara, um ahced yin, um yetpan an pece Ijipt, im lep ilpu ehnaa u ilpu hal u Jekob; 27 is lep apos ohwat hal o un is ero a Josef an pece Ijipt: eris sevente a ilpu hal u Jekob asega eris yetpan an pece Ijipt ara. 28 Is abrai Juta a Jekob mika yi uhup iran ehele Josef, par ugyi yin mika yi aubilid yin an pece Cosen aien; eris alaig pan an pece Cosen ara. 29 Is yecrei jariot o un a Josef, um apan an pece Cosen mika yi aubilid etman; is ehcohos pan ehelen aien, um ablaijiraig pam yin, um taig is itu iran. 30 Is ika a Isreel ehele Josef, Ekmu mas ainyak, ek mun almoi nesganimtam ainyak; na umoh aiek. 31 Is tas a Josef ehele ilpu etwan, im lep ehele ra an nimnim u etman, um ika, Ekpu apan ainyak, um asaig ehele Fero, um ika ehelen, Era mun ham ehelek a ilpu etwak, im ilpu atimi an nimnim u etmak, eris amen an pece Kenan ara; 32 era atimi asgi siip ara, eris aminijnaig niji itai eklim edo irai pece ara; era mun imiapam siip ura ara, im kurimatau ura, im niji itai asega ura. 33 Etu wit ahlaig vai caua a Fero, um ika, Eka ago niv auritai aijaua? 34 Akumu ika aijaua, Ak natimarid, ecris atimi aminjinaig niji itai eklim edo irai pece aijama, an takuras unyima um imihum pam an nopan inig, eris lep uce a ilpu retpoma: va akupu amen an pece Cosen aijaua; era amcel vai ilpu atimi asgi siip asega a nup Ijipt. |
Vanuatu Bible (Intas Etipup) © United Bible Societies, 1863, 2019.
United Bible Societies