Jenesis 46 - Intas Etipup

Nuarin tas alupas 46.

1 Et ago eropse inliinmopoi Jekob a Atua Biersiiba. 5 Et ahes eahki aien im niji ira atimi o un um yetpan Ijipt. 8 Er esvi nup an nimnim o un era apan Ijipt ara. 29 Et aubilid Jekob a Josef. 31 Et esege imi ilpu etwan a Josef vai intas ura eri asaig ehele Fero.

¹ IS atga o un a Isreel, um lucsei niji itai asega o un, um yetpan Biersiiba, um ahlap irai iji itai ahlap vai Atua u Aisak etman.

² Is tas ehele Isreel a Atua an numjeg ahnag o un an nepig, um ika, Ak Jekob, ak Jekob. Is ika aien, Ainyak ap aigki.

³ Is ika aien, Ek Atua ainyak, Atua u etmam: namu jim imtitaig aiek napan vaig Ijipt; ekpu ika ainyak eri ahinag a ilpu mapom eahki:

⁴ ekpu ahced euc ainyak an napan vaig unyum Ijipt; ekpu lep imiadumoij pam euc ainyak: etpu ati nikman an nesganimtam a Josef.

⁵ Is ahes Biersiiba a Jekob um atga o un: eris apos Jekob etmara a ilpu hal u Isreel irai itai atga iji ehki, is alupai ra a Fero mika eri apos yin iran, im lep ilpu hal ura, im ilpu ehnaa ura.

⁶ Eris lucsei kurimatau ura ara, im niji itai ura eris asjapicnaig an pece Kenan ara, um yetpan Ijipt, Jekob im ilpu hal o im asega ehelen: nikavaig,

⁷ ilpu halav atamaig o un, im ilpu halav atahig o un, im ilpu mapon asega, is imiapan ilpu eteuc iran asega an pece Ijipt aien.

⁸ Nidai nup Isreel ji igki eris apan an pece Ijipt ara, Jekob im ilpu hal o un: nan, Ruben inhal u Jekob inmeto.

⁹ Im ilpu hal u Ruben; nan, Henok, im Falu, im Hesron, im Karmai.

¹⁰ Im lep ilpu hal u Simeon; nan, Jemuel, im Jemin, im Ohat, im Jekin, im Sohar, im Seal inhal u intakata Kenan.

¹¹ Im ehtaij hal u Livai; nan, Cerson, im Kohad, im Merari.

¹² Im ilpu hal u Juta; nan, Er, im Onan, im Sila, im Feres, im Sera: ja erus emesmas a Er im Onan an pece Kenan. Erus hal u Feres a Hesron im Hemul.

¹³ Im ilpu hal u Isakar; nan, Tola, im Fuva, im Jesub, im Simron.

¹⁴ Im ehtaij hal u Sebulun; nan, Siret, im Ilon, im Jeliil.

¹⁵ Eris ilpu hal u Lia ara sji igki, is apos ra imi Jekob aien Petaneram, im lep Taina inhalav atahig o un: eris dirte dri a ilpu halav atamaig asega o un, im ilpu halav atahig o un.

¹⁶ Im ilpu hal u Cat; nan, Sifion, im Hacai, im Sunai, im Esbon, im Irai, im Arotai, im Ariilai.

¹⁷ Im ilpu hal u Eser; nan, Jimna, im Isua, im Isuai, im Biraia, im Sira natahig ira ra: im ohwat hal u Biraia; nan, Hiber, im Malkiel.

¹⁸ Eris ilpu hal u Silpa ara sji igki, is atcijai yin imi Lia inhalav atahig o un a Leban; is apos ra sji igki imi Jekob aien; eris sikstiin ara asega.

¹⁹ Im ohwat hal u Rejel ehgai Jekob; nan, Josef, im Benjamin.

²⁰ Is lep apos Manasi im Ifreem a Josef an pece Ijipt; is apos rau imi yin a Asenad inhalav atahig u Potifera natimi alupas On.

²¹ Eris ilpu hal u Benjamin ara sji igki; nan, Bila, im Biker, im Asbel, im Cira, im Neaman, im Ihai, im Ros, im Muppim, im Huppim, im Art.

²² Eris ilpu hal u Rejel ara sji igki, is apos ra imi Jekob aien; eris fortiin ara asega.

²³ Im inhal u Tan; nan, Husim.

²⁴ Im lep ilpu hal u Naftalai; nan, Jasiel, im Cunai, im Jiser, im Sillem.

²⁵ Eris ilpu hal u Bilha ara sji igki, is atcijai yin imi Rejel inhalav atahig o un a Leban; is apos ra sji igki imi Jekob aien: eris seven ara asega.

²⁶ Eris sikste siks natimi iji ehki asega eris ahes ehele Jekob ara, um ahced yin, um yetpan an pece Ijipt, im lep ilpu ehnaa u ilpu hal u Jekob;

²⁷ is lep apos ohwat hal o un is ero a Josef an pece Ijipt: eris sevente a ilpu hal u Jekob asega eris yetpan an pece Ijipt ara.

²⁸ Is abrai Juta a Jekob mika yi uhup iran ehele Josef, par ugyi yin mika yi aubilid yin an pece Cosen aien; eris alaig pan an pece Cosen ara.

²⁹ Is yecrei jariot o un a Josef, um apan an pece Cosen mika yi aubilid etman; is ehcohos pan ehelen aien, um ablaijiraig pam yin, um taig is itu iran.

³⁰ Is ika a Isreel ehele Josef, Ekmu mas ainyak, ek mun almoi nesganimtam ainyak; na umoh aiek.

³¹ Is tas a Josef ehele ilpu etwan, im lep ehele ra an nimnim u etman, um ika, Ekpu apan ainyak, um asaig ehele Fero, um ika ehelen, Era mun ham ehelek a ilpu etwak, im ilpu atimi an nimnim u etmak, eris amen an pece Kenan ara;

³² era atimi asgi siip ara, eris aminijnaig niji itai eklim edo irai pece ara; era mun imiapam siip ura ara, im kurimatau ura, im niji itai asega ura.

³³ Etu wit ahlaig vai caua a Fero, um ika, Eka ago niv auritai aijaua?

³⁴ Akumu ika aijaua, Ak natimarid, ecris atimi aminjinaig niji itai eklim edo irai pece aijama, an takuras unyima um imihum pam an nopan inig, eris lep uce a ilpu retpoma: va akupu amen an pece Cosen aijaua; era amcel vai ilpu atimi asgi siip asega a nup Ijipt.