Jenesis 45 - Intas Etipup

Nuarin tas alupas 45.

1 Et ika a Josef eri ato yin a ilpu etwan. 5 Et ago eropse inliinmopora aien an nedo arapakau u Atua. 9 Et abrai ra aien mika eri imiapam etman ehelen. 16 Et ago ipjin intas o Josef a Fero. 21 Et alupai ra niji itai uri natga pan ura a Josef, um ated ra mika yi tup ethi ache inliinmopora ara. 25 Et imiatumumoh Jekob intas ura.

¹ IS ehka vai Josef neklim amen vaig an nuhup ura asega eris aiji ehelen ara; is efehtas aien, um ika, Imialau ijo atimi asega, um udei nyak. Is eti amen tah natimi ehele Josef, is wat aniv yin aien ehele ilpu etwan.

² Is taig ijinies aien: eris atahaijeg a nup Ijipt im ilpu aheca u Fero.

³ Is ika ehele ilpu etwan a Josef, Ek Josef ainyak; et umoh a etmak, ka oʼo? Is ehka vai ilpu etwan intas vaig ehelen; eris imtitaig alupas ara an nuhup o un.

⁴ Is ika a Josef ehele ilpu etwan. Ek ugyi caua ainyak mika aki apam ubutpotet ehelek aijaua. Eris apan ubutpotet ara. Is ika aien, Ek Josef ainyak etwamia akis ahtai nyak aijaua par apan an pece Ijipt.

⁵ Jam jim ohocred aijaua, um jim edemda vai caua va nedo unyimia, nikavaig, akis ahtai nyak aijaua par apam igcaki: is abraig pam nyak a Atua, mika ki uhup iramia ainyak, um imiatamaig atimi.

⁶ Et mun eteuc numlaig has an pece irai mesese is ero: etpu lep eteuc irai mesese inyi faiv, uhpu eti ahwai itai iran, um eti asjapicnaig itai.

⁷ Is abraig pam nyak a Atua, miki ki uhup iramia ainyak um imicoho ilpu hal unyimia an nobohtan, um imiatamaig emda caua.

⁸ Akis eti imiapam nyak igcaki aijaua, ja Atua ache: is ati nyak aien mika ki etmai Fero ainyak, im natimi alupas an nimnim o un, im natimi alupas an pece Ijipt asega.

⁹ Akumu auroauro aijaua, um apan ehele etmak, um ika ehelen, Et ika a Josef inhal unyum, Is ati nyak a Atua, mika ki atimi alupas ainyak an pece Ijipt asega: auroauro aiek um apam ehelek:

¹⁰ napu amen an pece Cosen aiek, napu ubutpotet ehelek aiek, im ilpu hal unyum, im ilpu mapom, im siip unyum, im nanin unyum, im kurimatau unyum, im niji itai asega unyum:

¹¹ ekpu alaam nitai caig eahki ainyak; etpu lep eteuc numlaig has irai mesese inyi faiv; va an jim ihkin natimi aiek, im ilpu hal unyum, im niji itai asega unyum.

¹² Eka almoi aijaua, et lep almoi a Benjamin etwak, mika ek idim tas ehelemia ainyak.

¹³ Akumu asuptecnaig natimi alupas asega unyak an pece Ijipt ehele etmak aijaua, im niji itai asega eka mun almoi aijaua; akumu auroauro aijaua um imiapam etmak igcaki.

¹⁴ Is ablaijiraig pam Benjamin aien, um taig; is lep taig a Benjamin an nauinwai Josef.

¹⁵ Is lep aijumnyi ilpu etwan asega aien, um taig ehele ra: ja eris par apitac a ilpu etwan um tas ehelen.

¹⁶ Eris atahaijeg intas an nimnim u Fero mika, era mun ham a ilpu etwai Josef: is upene irai Fero, im ilpu aheca o un.

¹⁷ Is tas ehele Josef a Fero, um ika, Namu tas ehele ilpu etwam aiek, um ika, Akumu ago nitai inigki aijaua; nikavaig, akumu ehtaigjai itai apos irai togke unyimia aijaua, um atga unyimia, um yetpan an pece Kenan;

¹⁸ um leh etmamia im ilpu hal unyimia, um apam ehelek: ekpu alupai caua niji itai upene an pece Ijipt ainyak, akupu hegaig niji itai esjilid an pece aijaua.

¹⁹ Akumu ago nedo inigki aijaua er asaig ehelemia; akumu luc-sei pan niji itai atga an pece Ijipt aijaua vai ilpu hal unyimia, im ilpu ehgamia, um imiapam etmamia, um adumoij.

²⁰ Um jim aktaktai inpadiaig unyimia; akupu ohuun niji itai upene asega an pece Ijipt aijaua.

²¹ Eris ago nitai inig a ilpu hal u Isreel: is alupai ra niji itai atga a Josef, is idivaig intas o Fero, is lep alupai ra nitai caig aien va nefalaig.

²² Is alupai ra asega napelumai is aro aien; ja is alupai Benjamin inuari silver is dri huntret aien, im napelumai is faiv.

²³ Is lep alupai etman nitai iji igki; nikavaig, eris apos togke is ten niji itai upene an pece Ijipt, eris lep apos togke atahig is ten korn, im nareto, im nitai caig incai etman an nefalaig.

²⁴ Is adcijaig ilpu etwan aien, eris atga ura ara: is ika ehele ra aien, Akumu aktaktai aijaua um jim ehtauo sjipe an nefalaig.

²⁵ Eris ahes an pece Ijipt ara um atga ura, um yetpan an pece Kenan ehele Jekob etmara,

²⁶ um imiabrai yin, um ika, Et umoh a Josef, et atimi alupas an pece Ijipt asega aien. Is ehioehio inliinmopoi Jekob, is eti ateuc an tas ura aien.

²⁷ Ja eris asuptecnaig ehelen intas asega u Josef ara is asaig ehele ra aien: is wat ecetai niji itai atga aien is alupai ra a Josef mika eri apos yin iran, is lep emda inliinmopoi Jekob etmara:

²⁸ is ika a Isreel, Et idim upene; et umoh a Josef inhal unyak: ekpu apan ainyak um alum yin ja pah mas.