Jenesis 44 - Intas Etipup

Nuarin tas alupas 44.

1 Nedo arapakau u Josef par atapnes ilpu etwan. 14 Intas ugyi upoupo o Juta ehele Josef.

¹ IS tas ehele naheca esjilid an nimnim o un aien, um ika, Namu atohwaig nitai caig aiek irai cat u atimi iji igki yi ohua, et idivaig era emda ara napos vaig, um ikni mune ura asega ijinies irai eucse cat ura.

² Um ati nipjinitai unyak, nipjinitai silver unyak marom, an cat u inharei, im nimtai korn o un. Is ago aien is idivaig intas o Josef.

³ Is wat ahraren nepig, eris atga ura natimi iji ehki, im lep togke ura.

⁴ Eris wat ahes an maliyum iyehki ara, jam eti elvatga, is ika a Josef ehele naheca esjilid o un, Namu atidai aiek, um apitac ra; nau wit uhum pan ra aiek, namu ika ehele ra aiek, Eka a uri aijaua par aru nedo upene an nedo has, um ehneg nipjinitai silver unyak?

⁵ Et umwig a natimi alupas unyak an nipjinitai inigki, et lep ato itai vaig aien; et has nedo inigki eka mun ago aijaua.

⁶ Is uhum pan ra aien um asan tas iji igki ehele ra.

⁷ Eris ika ehelen ara, Ak natimi alupas, na a uri aiek par asan tas inigki? et ehka vai cama nago vaig nedo inigki:

⁸ na idim ato aiek mika, ecris imiadumoij pam nuari mune iji ehki aijama, ecris ecetai irai cat unyima aijama an pece Kenan: ecra a uri aijama par ahneg silver ka colt anliin neom u natimi alupas unyum?

⁹ Ak natimi alupas, el et amen ehelen tah cama nipjinitai inigki, etmu mas aien, ecrupu lep ilpu aheca u natimi alupas unyum aijama.

¹⁰ Is ika aien, Et upene intas unyimia: inyi aheca unyak aien er ecetai nipjinitai ehelen; ja inyi eti amen nedo has iramia.

¹¹ Eris auroauro ara asega, um iknise cat ura an nobohtan, um ahug cat ura asega.

¹² Is ahilek aien, um atupun irai inmeto um yetpan irai inharei: eris ecetai nipjinitai an cat u Benjamin.

¹³ Eris ahpati apelumai ura ara, eris lep iknijai itai apos irai togke ura ara asega, um adumoij pan an maliyum.

¹⁴ Eris apan an neom u Josef a Juta im ilpu etwan; is amen eahki aien: eris eropropse ara an nul mp o un an nobohtan.

¹⁵ Is tas ehele ra a Josef, um ika, Nev edo inig eka mun ago aijaua? eka ato aijaua mika, ek atimi ato itai ainyak, ka oʼo?

¹⁶ Is tas a Juta, um ika, Ak natimi alupas, ecrupu asan he ehelum aijama? et ehka vai cama intas vaig; et eti atoh nedo unyima: ak natimi alupas, et mun ecetai nedo has unyima a Atua: ecrupu idim ilpu aheca unyum aijama, im lep yin er ecetai nipjinitai ehelen.

¹⁷ Is ika aien, Oʼo: et ehka vai nyak nago vaig nedo inigki: ja etmu aheca unyak a natimi inig er ecetai nipjinitai ehelen; ja akumu atga unyimia aijaua an nigpa, um yetpan ehele etmamia.

¹⁸ Is apan ubutpotet ehelen a Juta, um ika, Ak natimi alupas, ek ugyi euc ainyak, mika ki tas ehelum ainyak, um jim edemda vai nyak, ak natimi alupas: na idim idivaig Fero aiek.

¹⁹ Ak natimi alupas, as ahodaig cama aiek, um ika; Et eteuc etmamia im etwamia, ka oʼo?

²⁰ Ak natimi alupas, ecris asuptecnaig ehelum aijama, um ika, Et, eteuc etmama, et efatimi aien, im lep inhal o un inharei, et haklin aien; et mas a etwan, et halav ethi ache u risin aien, et lep aiyu inliinmopoi etman vai yin.

²¹ Ak natimi alupas, as asaig ehelema aiek, Akumu imiapam yin ehelek aijaua, mika ki alum yin ainyak.

²² Ecris ika aijama ehelum, Ak natimi alupas, et ehka vai intakuras inigki nudei vaig etman: el et udei etman aien, etpu mas aien.

²³ Ja as ika ehelema ilpu aheca unyum aiek, El et eti ahced caua a etwamia inharei, akupu eti lep almoi nesganimtak aijaua.

²⁴ Ecris wat, yetpan ehele etmama aijama, ecris asuptecnaig intas unyum ehelen aijama, ak natimi alupas.

²⁵ Is ika a etmama, Akumu lep apan aijaua um auanimtan nitai caig haklin incaija.

²⁶ Ja ecris ika aijama, Et ehka vai cama napan vaig: el et ahced cama a etwama inharei, ecrupu apan aijama: ecrupu eti almoi nesganimtai natimi iyehki aijama, el et eti ahced cama a etwama inharei.

²⁷ Ak natimi alupas, is ika a etmak ehelema, Eka ato aijaua mika, is apos imi nyak inhalav atamaig is ero ache a ehgak:

²⁸ is ahes ehelek is ethi um atga o un, ja kis ika ainyak, Eris idim auoh oplecoplec yin; kis eti lep ecet yin ainyak:

²⁹ el eka lep atipagki nat igki ehelek aijaua, el et auahas yin tah nitai, etpu ohocred ainyak, ek efatimi ainyak, ekpu auroauro ainyak um asuol an nehpanitai va nedo unyimia.

³⁰ Ak natimi alupas, Eku wit yetpan ehele naheca unyum etmak ainyak, el et eti ahced cama a intakuras; et idim umoh aien vai intakuras inigki;

³¹ etu wit eti ecet intakuras ehelema aien, etpu mas aien: ak natimi alupas, etpu ohocred a etmama, et efatimi aien, etpu auroauro aien um asuol an nehpanitai va nedo unyima.

³² Ak natimi alupas, kis upyi tas ehele etmak ainyak vai intakuras inigki, um ika, Ak etmak, el ek eti lep imiapam yin ehelum ainyak, namu atijai itai irak aiek irai iji adiat.

³³ Ak natimi alupas, ek ugyi euc ainyak, mika ki amen ainyak, um isjeupigmoig intakuras inigki, um aheca unyum; ja etmu ahced ilpu etwan a intakuras.

³⁴ Inyi idim ehka vai nyak napan vaig ehele etmak, el et eti ahced nyak a intakuras, vai ki jim ecetai nitai has inigki ainyak etpu yetpam irai etmak.