Jenesis 42 - Intas Etipup

Nuarin tas alupas 42.

1 Et abrai ilpu hal o un et ten a Jekob mika eri auanimtan korn an pece Ijipt. 16 Et ikni ra a Josef an neom ipjin, um ika era atimi ahilek inpece ara. 18 Et atcijai ra aien, ja et ika aien eri imiapam Benjamin ara. 21 Era imiehva nedo ura vai Josef ara um ohocred vaig. 24 Era udei Simeon ara, et idivaig nitai asjaaicnaig u intas inveijec ura. 25 Era adumoij ara, et eteuc ehele ra korn ura im lep mune ura. 29 Intas asuptecnaig ura ehele Jekob. 36 Et ika a Jekob inyi idim eti atau ira ra a Benjamin.

¹ IS wat ato a Jekob, mika is eteuc korn an pece Ijipt, is ika ehele ilpu hal o un aien, Eka a uri aijaua par tup alum jipe caua?

² Is ika aien, Ek mun idim atahaijeg ainyak mika, et eteuc korn an pece Ijipt: akumu apan eahki aijaua, um auanimtan nitai caig incaija; mika ti umumoh akaija, um eti emesmas.

³ Eris apan Ijipt a ilpu etwai Josef is ten mika eri auanimtai korn.

⁴ Ja is eti abraig Benjamin etwai Josef a Jekob mika yi ahced ilpu etwan; is ika aien, Kit etpu yetpam iran tah nitai has.

⁵ Eris ahced natimi apan um auanimtai korn a ilpu hal u Isreel: is eteuc numlaig has an pece Kenan.

⁶ Is atimi alupas an pece Ijipt a Josef, is lep ahtai korn imi nup uran pece asega aien: eris apan a ilpu etwai Josef, um atpuse an nuhup o un.

⁷ Is ecet ilpu etwan a Josef, um ato ra, ja is idivaig intak atimi ehele ra aien, um tas ipjin ehele ra; is ahodai ra aien, um ika, Akis ahes eda aijaua? Eris ika ara, Ecris ahes an pece Kenan aijama, um apam mika ecri auanimtan nitai caig aijama.

⁸ Is ato ilpu etwan a Josef, ja eris eti ato yin ara.

⁹ Is imiehva numjeg ahnag eraigko o un a Josef vai ra, um ika ehele ra, Eka ilpu atimi ahilek inpece aijaua; eka mun ham aijaua mika aki almoi inhas u inpece.

¹⁰ Eris ika ehelen ara, Oʼo, ak natimi alupas, ecra mun ham aijama mika ecri auanimtan nitai caig.

¹¹ Ecra, ilpu hal u natimi et ethi ache aijama asega; ecra ilpu atimi inveijec aijama; ecra eti ilpu atimi ahilek inpece aijama.

¹² Is ika ehele ra aien, Oʼo, eka mun ham aijaua mika aki almoi inhas u inpece.

¹³ Eris ika ehelen ara, Ak natimi alupas, ecra ilpu raimu et twelv aijama, ilpu hal u natimi et ethi ache an pece Kenan; et amen a inharei an nopan inig ehele etmama, et ti et ethi.

¹⁴ Is ika ehele ra a Josef, Et inveijec intas unyak, Eka ilpu ati-mi ahilek inpece aijaua:

¹⁵ uhpu ato nedo unyimia va nitai inigki: et idim umoh a Fero, et idim uco, akupu eti ahes igcaki aijaua ura atga unyimia, el et eti ham a etwamia inharei.

¹⁶ Apan tah caua, um imiapam etwamia, ja akupu amen anliin neom ipjin aijaua, va uhpu ato, kit et inveijec intas unyimia: ja el et eti uce, et idim umoh a Fero, et idim uco, eka ilpu atimi ahilek inpece aijaua.

¹⁷ Is ikni ra asega anliin neom ipjin aien ira adiat is eseij.

¹⁸ Ja is wat ti pan itac nadiat is dri, is um tas ehele ra a Josef, um ika, Akumu ago nitai inigki aijaua, um umumoh; ek imtitai Atua ainyak:

¹⁹ el eka ilpu atimi inveijec aijaua, uhmu arore tah caua anliin neom ipjin: akumu atga unyimia aijaua, um lucsei korn va numlaig has irai up urai imnim unyimia:

²⁰ jam imiapam etwamia inharei ehelek; va uhpu ato mika et inveijec intas unyimia, va aki jim emesmas aijaua. Eris ago nedo inigki ara.

²¹ Eris tas jipe ara, um ika, Intis ago nedo has akaija vai etwaija, intis ecetai nohocred o un akaija, ja intis eti aiheuc vai yin akaija, is wat ugyi caija aien; va nitai inigki et mun yetpam iraija nohocred inigki.

²² Is tas ehele ra a Ruben, um ika, Kis idim tas ehelemia ainyak,, um ika, Akumu jim ago nedo has vai intakuras aijaua, ja akis eti atahaijeg aijaua; va nitai inigki er aru iraija van mas o un.

²³ Eris eti ato ara mika is ato intas ura a Josef; is wat tas ehele ra aien is asuptecnaig intas o un a natimi ahidan tas.

²⁴ Is atidjin ira ra aien, um taig; is lep ahidai yin ehele ra aien, um tas ehele ra, um leh Simeon, um arore yin an nuhup ura.

²⁵ Is asaig a Josef mika eri atohwaig korn irai cat ura yi ohua, um ikni mune u atimi asega irai cat ura, athi um athi ehni, um alaa ra nitai caig va nefalaig: is idim uco nedo o im vai ra.

²⁶ Eris ikni korn ijinies irai togke ura ara, um atga ura.

²⁷ Is wat ahiyi incat o un tah ira ra par alayi togke o un an nimnim atumop iran, is ecetai mune o un aien; is idim amen ijinies an neucsen cat o un.

²⁸ Is ika ehele ilpu etwan aien, Er lep ikni mune unyak; et idim amen anliin cat unyak: is auatialidi inliinmopora ara, eris lep imtitaig ara, um tas jipe, um ika, Inhe nigki et mun ago iraija a Atua?

²⁹ Eris yetpan ehele Jekob et-i mara ara an pece Kenan, um asuptecnaig ehelen nitai iji igki is yetpam ira ra; um ika,

³⁰ Is tas edemda ehelema a natimi alupas an pece, um ika, Eka ilpu atimi ahilek inpece aijaua.

³¹ Ecris tas ehelen aijama, um ika, Ecra ilpu atimi inveijec aijama; ecra eti ilpu atimi ahilek inpece aijama:

³² ecra ilpu raimu et twelv aijama, um ethi ache etmama; et ti et ethi, et lep amen a inharei ehele etmama an pece Kenan an; nopan inig.

³³ Is tas ehelema a natimi alu-Ipas an pece, um ika, Ekpu ato ainyak mika eka ilpu atimi inveijec I aijaua va nitai inigki; nikavaig, etmu amen ehelek tah et ethi iramia, ja akumu apos nitai caig aijaua va numlaig has irai up urai imnim un-yimia, um atga unyimia:

³⁴ um imiapam etwamia inharei ehelek: ekpu ato ainyak mika eka eti ilpu atimi ahilek inpece aijaua, ja eka ilpu atimi inveijec aijaua: ekpu lep atcijaig etwamia ainyak ehelemia, aknpu lep auarimtai itai aijaua an pece inigki.

³⁵ Eris wat atladwi korn ura ara, eris ecetai mune ura ara asega irai cat ura, athi um athi ehni: eris wat ecetai mune ura ara, im lep etmara, eris imtitaig ara.

³⁶ Is tas ehele ra a Jekob et-mara, um ika, Akis atipagki ohwat hal unyak aijaua: et ti a Josef, et lep ti a Simeon, akupu lep atipag-ki Benjamin aijaua: et auahas nyak nitai iji igki asega.

³⁷ Is tas ehele etman a Ruben, um ika, El ek eti lep imiapam yin ehelum ainyak, namu atgei oh-wat hal unyak aiek: namu ati yin ehelek aiek, ekpu lep imiapam yin ehelum ainyak.

³⁸ Is ika aien, Inyi eti ahced caua a inhal unyak; et idim mas a etwan, et amen ache aien: el et auahas yin tah nitai an nefalaig inig akupu atga iran aijaua, ek efatimi ainyak, ekpu auroauro ainyak um asuol an nehpanitai va nedo unyimia.