Jenesis 41 - Intas Etipup

Nuarin tas alupas 41.

1 Numjeg ahnag et ero o Fero. 25 Et asuptecnaig nesgantas iran a Josef. 33 Et asan tas arapakau ehele Fero aien. 38 Er imiaridjai Josef. 50 Et apos Manasi im Ifreem aien. 54 Et atupun numlaig has.

¹ IS ti pan itac inmesese is ero, ja is umjeg ahnag a Fero, um aktaktai, mika is aiji aien ubutpotet u nofowai.

² Is ecetai kurimatau is seven aien eris ahes an nofowai ara, eris upene ara um alupas; eris caig nefelelicai ara.

³ Eris lep apitac um ehcohos kurimatau is seven is eche an nofowai, eris has ara um erek; eris aiji ubutpotet u kurimatau iji ehki ara an nahaijin nofowai.

⁴ Eris caig ehni kurimatau upene um alupas is seven kurimatau iji ehki eris has ara um erek. Is nusjai a Fero va numjeg o un.

⁵ Is lep umjeg aien, um aketo um umjeg ahnag: um ecetai nigai korn is seven is eteuc an nauikorn is ethi, is alupas um upene.

⁶ Is lep ecetai nigai korn is seven is eche aien is apitac, is has um imlai va natoga.

⁷ Is atleg nigai korn is seven is alupas um upene nigai korn iyehki is has. Is nusjai a Fero va numjeg ahnag iyehki o un.

⁸ Is wat lahlah an nuhialeg is ehioehio inliinmopon aien; is asjapicnaig ilpu atimi ahlap asega an pece Ijipt aien, im ilpu atimi arapakau: is asaig ehele ra numjeg ahnag o un a Fero; ja is ehka vai ra asega nasuptecnaig vaig nesgantas iran ehele Fero.

⁹ An nopan iyehki is tas ehele Fero a naheca esjilid irai ilpu aheca aminjinaig nide vaine o un, um ika. Ek imiehva nedo has unyak ainyak an nadiat inigki:

¹⁰ as edemda vai ilpu aheca unyum aiek, ak Fero, um ati nyak anliin neom ipjin, anliin neom u natimi alupas u ilpu eucsupo, as ati nyak aiek im naheca esjilid irai ilpu aheca ago nareto:

¹¹ ecrus umjeg ahnag aijumrau an nepig is ethi; is eche nesgan tas an numjeg ahnag unyak, jam lep eche nesgan tas an numjeg ahnag o un.

¹² Is amen eahki ehelemrau a intakuras is ethi, nup u Hibru, naheca u natimi alupas u ilpu eucsupo; ecrus asaig ehelen aijumrau, is asuptecnaig ehelemrau aien nesgantas an numjeg ahnag unyimrau; is eche nesgantas an numjeg ahnag unyak, jam lep eche nesgantas an numjeg ahnag o un.

¹³ Is yetpam nitai iji igki is asuptecaig aien; as ati nyak u nauritai unyak aiek, ja as aijcei yin aiek.

¹⁴ Is abra atimi a Fero mika eri imiapan Josef ehelen, eris auroauro ara um atipagki yin anliin neom ipjin: is ehpei ingeijin aien, um aso yin an napelumai upene, um apan ehele Fero.

¹⁵ Is tas ehele Josef a Fero, um ika, Ek mun umjeg ahnag ainyak, ja et eti eteuc tah par asuptecnaig nesgantas iran: ek mun atahaijeg intas vai euc ainyak, mika na ato aiek par asuptecnaig nesgantas an numjeg ahnag u atimi.

¹⁶ Is tas ehele Fero a Josef, um ika, Ak Fero, ek eti ato ainyak: etpu eklim asuptecnaig upene ehelum a Atua,

¹⁷ Is tas ehele Josef a Fero, um ika, Ek mun umjeg ahnag ainyak, um aiji an nahaijin nofowai:

¹⁸ ja eris ahes an nofowai kurimatau is seven, eris upene ara um alupas; eris lep caig nefelelicai ara:

¹⁹ eris apitac um ehcohos kurimatau is seven is eche, eris erek ara um eheshas, kis eti ecetai kurimatau has is idivaig ainyak an pece Ijipt asega:

²⁰ eris caig kurimatau upene is seven uhup niji kurimatau erek um has:

²¹ eris wat caig ra ara, is ehka nato vaig mika eris caig ra ara; eris eheshas ara is idivaig itu. Kis nusjai ainyak.

²² Kis lep umjeg ahnag ainyak, um ecetai nigai korn is seven an nauikorn is ethi, is alupas um upene:

²³ is lep apitac um eteuc nigai korn is seven is eche, ja is haklin, um has, um imlai va natoga:

²⁴ is atleg nigai korn upene is seven niji nigai korn has: ek mun asuptecnaig ainyak ehele ilpu a-timi ahlap; ja is eti ato tah par asuptecnaig nesgantas iran.

²⁵ Is tas ehele Fero a Josef, um ika, Ak Fero, et apapa numjeg ahnag unyum ehro: et mun ehvaig ehelum nitai inig a Atua etpu ago aien.

²⁶ Era idivaig inmesese et seven kurimatau upene is seven; era lep idivaig inmesese et seven nigai korn upene is seven: et apapa numjeg ahnag unyum.

²⁷ Era idivaig inmesese et seven kurimatau erek um has is seven eris apitac ra ara; era idivaig inmesese umlaig has et seven nigai korn is seven is has um imlai va natoga.

²⁸ Ak Fero, ek mun asuptecnaig ehelum ainyak nitai inig: nikavaig, Et mun ehvaig ehelum nitai inig a Atua etpu ago aien.

²⁹ Etpu ahinag nitai caig irai mesese inyi seven an pece Ijipt asega:

³⁰ ja etpu apitac numlaig has irai mesese inyi seven; uhpu eti ecetai nitai caig is ahinag an pece Ijipt; etpu has inpece va numlaig has iyehki;

³¹ uhpu eti aktaktai nitai caig is ahinag an pece va numlaig has iyehki etpu apitac; etpu esjilid acen numlaig has.

³² Va nitai inigki na mun ecero umjeg ahnag aiek, ak Fero; is id-im ati nitai inigki a Atua, etpu auroauro a Atua um imiapam nitai inigki.

³³ Va nitai inigki, ak Fero, namu ahilek natimi inyi ethi aiek, et aktaktai upene aien um arapakau, um ati yin mika yi esjilid aien an pece Ijipt.

³⁴ Ak Fero, namu ago nedo inigki aiek, um aniv atimi irai iji uari pece, mika eri asjapicnaig nahaijin fifd irai ohwai itai an pece Ijipt irai mesese upene inyi seven.

³⁵ Erumu asjapicnaig nitai caig asega irai mesese upene iji ehki etpu yetpam, um ati korn mika an aminjinaig aiek, ak Fero, erumu asjapicnaig nitai caig irai iji maliyum ara.

³⁶ Etpu amen nitai caig inigki incai nup urai pece, irai mesese umlaig has inyi seven an pece Ijipt; va eri jim emesmas natimi asega va numlaig has iyehki.

³⁷ Is upene irai Fero intas inigki, im lep irai ilpu atimi alupas o un asega.

³⁸ Is tas a Fero ehele ilpu atimi alupas o un, um ika, Intupu leh tah eda akaija, et idivaig natimi inig, et amen ehelen a N esgai Atua?

³⁹ Is ika ehele Josef a Fero, Et mun idim asuptecnaig ehelum nitai iji igki asega a Atua, et lep eti aktaktai upene tah um arapakau et idivai euc:

⁴⁰ namu esjilid aiek an nimnim unyak, erumu lep atahaijeg intas unyum natimi asega unyak: inki esjilid iram ainyak a dorona unyak ache.

⁴¹ Is tas ehele Josef a Fero, um ika, Ek mun idim ati euc ainyak mika an esjilid aiek an pece Ijipt asega.

⁴² Is atipagki nethado an nikman a Fero, um ati an nikmai Josef, um aso yin ira apelumai yilyil, um ati natau colt an nauinwan;

⁴³ is ika a Fero yi atga aien a jariot sekunt o un; eris uhup iran um ahlaig, um ika. Atpuse vai yin: is ati yin a Fero mika yi atimi alupas aien an pece Ijipt asega.

⁴⁴ Is ika ehele Josef a Fero, Ek Fero ainyak, inyi itap vaig tah natimi nadaigjai vaig nikman ka neduon an pece Ijipt asega el et eti asaig aiek.

⁴⁵ Is anvi nidai Josef a Fero par ika, Safnad-peania, (Natimi ehvaig intas adenaig); is lep alupai yin Asenad ehgan a Fero, is halav atahig u Potifera aien, natimi alupas On. Is atga a Josef an pece Ijipt asega.

⁴⁶ Is eteuc inmesese is dirte irai Josef an nopan iyehki is aiji aien an nuhup u Fero natimarid an pece Ijipt. Is ahes ehele Fero a Josef, um apaahni an pece Ijipt.

⁴⁷ Is ahinag acen nitai caig an nobohtan irai mesese upene iji iyehki is seven.

⁴⁸ Is asjapicnaig nitai caig asega aien an pece Ijipt irai mesese is seven, um ikni irai iji maliyum: is ikni irai iji maliyum asega aien nitai eaig umara is arehed iran.

⁴⁹ Is asjapicnaig nitai caig is ahinag a Josef is idivaig nauanavig, is eti esvi aien; is ehka nesvi vaig.

⁵⁰ Eris apos imi Josef inhalav atamaig is ero an nopan iyehki is: pam eti fi eteuc numlaig has; is apos rau imi yin a Asenad inhalav atahig u Potifera natimi alupas On.

⁵¹ Is anvi nidan inmeto a Josef par ika Manasi, (Nimialmag): is ika aien, Is aiheuc vai nyak a Atua, um ika ki ahnag an nohocred asega unyak ainyak im nedo asega u ilpu etwak.

⁵² Is anvi nidai inharei aien par ika Ifreem, (Nasvalav vaig): ika aien, Is aiheuc vai nyak a Atua, um ika ki asvalav ainyak an pece inigki kis ohocred iran ainyak.

⁵³ Is ti pan itac inmesese upene iji ehki is seven an pece Ijipt.

⁵⁴ Is lep atupun inmesese umlaig has is seven, is idivaig intas o Josef: is eteuc numlaig has irai iji pece asega; ja is eteuc nitai caig an pece Ijipt asega.

⁵⁵ Is wat umlaig has an pece Ijipt asega, eris apan ehele Fero a nup uran pece, um ugyi yin va nitai caig: is ika a Fero ehele nup Ijipt, Apan aijaua ehele Josef, um ago nitai inig etpu asaig ehelemia aien.

⁵⁶ Is eteuc numlag has irai iji pece asega an nobohtan: is asalgei niji eom ikni itai a Josef, um ahtai nitai caig imi nup Ijipt asega; is esjilid numlaig has an pece ijipt.

⁵⁷ Eris apan Ijipt a nup urai iji pece asega ehele Josef, mika eri auanimtan nitai caig; is idim esjilid numlaig has irai iji pece asega.