Jenesis 40 - Intas Etipup

Nuarin tas alupas 40.

1 Naheca aminjinaig nide vaine u Fero im naheca aminjinaig nareto o un anliin neom ipjin. 4 Et aminjinai rau a Josef. 5 Et asuptenaig nesgantas an numjeg ahnag urau. 20 Eh ehneijid et idivaig intas asuptecnaig o un. 23 Et eti imiehva nedo upene u Josef a naheca aminjinaig nide vaine.

¹ IS wat ti pan itac nitai iji igki, is auahas inliinmopoi natimarid an pece Ijipt a naheca aminjinaig nide vaine o un, im lep naheca ago nareto o natimarid, an pece Ijipt.

² Is edemda a Fero vai ohwat aheca o un erahki, naheca esjilid irai ilpu aheca aminjinaig nide vaine o un, im naheca esjilid irai ilpu aheca ago nareto o un.

³ Is ati rau aien anliin neom ipjin, anliin neom u natimi alupas u ilpu eucsupo, an nuarin iyehki is amen iran a Josef.

⁴ Is ati rau ehele Josef a natimi alupas u ilpu eucsupo, is aminjinaig rau aien: erus amen anliin neom ipjin arau an mesese is ethi.

⁵ Erus umjeg ahnag arau ero an nepig is ethi, naheca aminjinaig nide vaine, im naheca ago nareto o natimarid an pece Ijipt, erus amen arau anliin neom ipjin; is eche numjeg ahnag o un is ethi, jam lep eche numjeg ahnag o un is ethi, is lep eteuc nesgantas iran is ero.

⁶ Is wat lahlah an nuhialeg, is apan ehele rau a Josef, um alum rau, is has nesganimtarau arau.

⁷ Is ahodaig ohwat aheca u Fero erahki aien, erus amen arau anliin neom ipjin u natimi alupas o un, um ika, Erau a uri aijaurau, et par has nesganimtamirau an nadiat inig inpig?

⁸ Erus ika arau ehelen, Ecrus umjeg ahnag aijumrau, ja et eti eteuc tah par asuptecnaig nesgantas iran. Is ika ehele rau a Josef, Et ato a Atua ache par asuptecnaig nesgantas an numjeg ahnag u atimi: asuptecnaig ehelek aijaurau.

⁹ Is asuptecnaig numjeg ahnag o un ehele Josef a naheca esjilid irai ilpu aheca aminjinaig nide vaine, um ika, Ek mun umjeg ahnag ainyak um ecetai vaine is ethi an nuhup unyak;

¹⁰ is eseij inrai vaine iyehki: is lep algei nerin, um eteuc intisian; is lep amen iran nohwan meto:

¹¹ is amen nipjinitai u Fero an nikmak: kis leh nohwai vaine ainyak, um avise nidin anliin nipjinitai u Fero, kis lep alupai Fero nipjinitai ainyak.

¹² Is tas ehelen a Josef, um ika, Nesgantas iran nigki: Et, idivaig nadiat et eseij inran et eseij:

¹³ etu wit ti pan itac nadiat, inyi eseij, etpu imiatidai nidjinum a Fero, um lep ati euc u nauritai unyum: napu alupai Fero nipjinitai o un aiek, et idivaig an nopan iyehki as wat upyi aminjinaig nide vaine o un aiek.

¹⁴ Nau wit lep amen upene aiek, aktaktai nyak, um aiheuc vai nyak, um tas ehele Fero vai nyak, um atipagki nyak an neom inigki:

¹⁵ eris idim ahneg nyak an pece u nup u Hibru: kis lep eti ago tah nitai ainyak, eris par imiati nyak anliin neom ipjin inigki vaig.

¹⁶ Is wat atahaijeg a naheca esjilid irai ilpu aheca ago nareto, mika is upene nesgantas iran, is ika ehele Josef aien, Kis lep umjeg ahnag ainyak, is amen ijinies an nidjinik incat ahi is eseij:

¹⁷ is amen an cat ijinjinies niji obotpot itai caig asega er ahen, incai Fero; ja eris caig inman an cat an nidjinik.

¹⁸ Is tas a Josef um ika, Nesgantas iran nigki: Et idivaig nadiat et eseij incat et eseij:

¹⁹ etu wit ti pan itac nadiat inyi eseij etpu imiatidai nidjinum a Fero, um aijcei euc an nauincai; erupu caig nohum inman.

²⁰ Is wat ti pan itac nadiat is ero wat lahlah iran is ethi, nadiat eris apos Fero iran, is auanetha alupas aien, incai ilpu aheca asega o un: is imiatidai nidjini naheca esjilid irai ilpu aheca aminjinaig nide vaine o un aien, im naheca esjilid irai ilpu aheca ago nareto, an nuhup u ilpu aheca o un.

²¹ Is lep aminjinaig nide vaine a naheca esjilid irai ilpu aheca aminjinaig nide vaine; is alupai Fero nipjinitai aien:

²² ja is aijcei naheca esjilid irai ilpu aheca ago nareto aien: is idivaig is asuptecnaig ehele rau a Josef.

²³ Ja is eti imiehva Josef a naheca esjilid irai ilpu aheca aminjinaig nide vaine, is ahnag iran aien.