Jenesis 4 - Intas Etipup

Nuarin tas alupas 4.

1 Keen im Ebel, napos vaig urau, nauritai urau, im nalaigaheni urau. 8 Et atgei atmas Ebel a Keen. 11 Neruvaig irai Keen. 17 Inok inmaliyum uhup. 19 Lemek im ohwat ehnaa o un. 25 Napos vaig u Sed, 26 im Inos.

¹ IS ato Iva ehgan a Atam; is um opoc aien, um apos Keen; is ika aien, Et mun alupai nyak inhalav atamaig a Ihova.

² Is lep apos Ebel etwan aien. Is atimi asgi siip a Ebel, ja is atimi ahapol a Keen.

³ Is ti pan itac hal adiat, ja is lucsei nohwai itai an nobohtan a Keen nitai ahlap vai Ihova.

⁴ Is lep lucsei nakli siip irai siip esjilid o un a Ebel im nagako iran. Is upene inliinmopoi Ihova vai Ebel im nitai ahlap o un:

⁵ ja is eti upene inliinmopon aien vai Keen im nitai ahlap o un. Is edemda alupas a Keen, um acen nesganimtan.

⁶ Is ika a Ihova ehele Keen, Na edemda aiek vanhe? et has nesganimtam aiek vanhe?

⁷ El et upene nedo unyum, etpu upene inliinmopok ainyak vai euc; ja el et eti upene nedo unyum, et amen nitai ahlap an neucse neom unyum. Etpu imiaiji intas unyum aien, napu esjilid iran aiek.

⁸ Is ika a Keen ehele Ebel etwan, Tu apan akaijau um edo: erus wat amen arau anliin pece, is atidai a Keen, um atgei Ebel etwan.

⁹ Is ika a Ihova ehele Keen, Ebel etwam yek eda? Is ika aien, Ek eti ato ainyak: Ek eti atimi aminjinaig etwak ainyak.

¹⁰ Is ika aien, Inhe nigki na mun ago aiek? et ahlaig vai nyak nohran ja irai etwam an nobohtan.

¹¹ Va nitai inigki er ahlaijai euc an nobohtan, eh mun asalgei par leh inja irai etwam vai euc;

¹² nau wit ahapol an nobohtan aiek, inyi eti ededel upene itai vai, euc; napu atimi amen ehcid aiek um ilikin natimi an nobohtan.

¹³ Is ika a Keen ehele Ihova, Et esjilid nimtan imi nyak, ek auatialidi ainyak napos vaig.

¹⁴ Na mun idim ahlo nyak aiek an nobohtan an nadiat inig; uhpu adenaig nyak va nesganimtam; ekpu atimi amen ehcid ainyak um ilikin natimi an nobohtan; erupu lep atgei nyak a ilpu atimi ecet nyak.

¹⁵ Is ika ehelen a Ihova, Aien et atgei Keen aien uhpu eceseven aru iran. Is ati nitai asjaaicnaig irai Keen a Ihova, vai yi jim ecet yin tah um atgei yin.

¹⁶ Is aha a Keen vai Ihova, um amen an pece Not, an nahaijin Itena an ridjai o un.

¹⁷ Is ato ehgan a Keen; is um opoc aien, um apos Inok: is ago inmaliyum aien, um anvi nidai inmaliyum iyehki par ika Inok, nilpun nidai inhal o un.

¹⁸ Is apos Airat a Inok: is apos Mehujeel a Airat: is apos Meduseel a Mehujeel: is apos Lemek a Meduseel.

¹⁹ Is leh ehgan is ero a Lemek: nidan is ethi Eta, im nidan is ethi Silla.

²⁰ Is apos Jebal a Eta: is uhup aien irai ilpu atimi amen irai eom atga, um asgi itai eklim edo irai pece.

²¹ Nidai etwan Jubal: is uhup aien irai ilpu atimi asega era ago hutlavlav im natarau ara.

²² Is apos Tubal-keen a Silla; is esege imi atimi aien par ago itai irai bras im aiurn: is atahig irai Tubal-keen a Neama.

²³ Is ika a Lemek ehele ohwat ehnaa o un, Ak Eta im Silla, arumu ahgei nohrak aijaurau; ak ohwat ehnaa unyak, atahaijeg intas unyak aijaurau: kis atgei natimi is ethi ainyak is asji nyak aien, um lep atgei intakuras is ethi is auud nyak aien.

²⁴ El eh eceseven aru vai Keen, uhpu idim ecesevente im seven aru vai Lemek.

²⁵ Is lep ato ehgan a Atam; is apos inhalav atamaig aien, um anvi nidan par ika Sed; is ika aien, Is ati imi nyak inhalav atamaig et eche a Atua par isjeupigmoig Ebel is atgei yin a Keen.

²⁶ Is lep apos inhalav atamaig a Sed; is anvi nidan aien par ika Inos: eris atupun natimi an nopan iyehki par aniv ra an nidai Ihova.