Jenesis 39 - Intas Etipup

Nuarin tas alupas 39.

1 Er imiaridjai Josef an nimnim u Potifar. 7 Et imiisjis aien va nedo oop o intakata atimi alupas o un. 13 Er atijai itai iran jam ahcil. 20 Er ati yin an neom ipjin. 21 Et amen ehelen eahki a Atua.

¹ ERIS imiapan Josef Ijipt; is auanimtai Josef a Potifar ehele nup Ismeel iji ehki eris imiapan yin eahki ara; is up Ijipt a Potifar, um aheca u Fero, um atimi alupas u ilpu eucsupo o un.

² Is amen ehele Josef a Ihova, is lep upene namen o un; is amen aien an nimnim u nup Ijipt, natimi alupas o un.

³ Is almoi a natimi alupas o un, mika is amen ehelen a Ihova, is lep acis yi alwai yin a Ihova irai iji auritai asega o un.

⁴ Is upene inliinmopon aien vai Josef, is lep aheca o un aien: is ati Josef aien mika yi esjilid aien an nimnim o un, is ikni niji itai asega o un ehelen aien.

⁵ Is wat ati Josef aien mika yi esjilid aien an nimnim o un, im lep irai iji itai asega o un, is acis yi alwai nimnim u nup Ijipt iyehki a Ihova vai Josef; is lep acis yi alwai niji itai asega an nimnim o un, im lep uman.

⁶ Is ikni niji itai asega o un ehele Josef aien; is eti ato tah nitai o un aien, nitai caig ache is caig aien. Is upene nohui Josef, um lep upene nesganimtan.

⁷ Is wat ti pan itac nitai iji igki, is alum Josef a ehgai natimi alupas o un; um ika, Namu amen ehelek aiek.

⁸ Ja is esjum aien, um ika ehele ehgai natimi alupas o un, Et idim eti ato a natimi alupas unyak tah nitai et amen ehelek an nimnim, is ikni niji itai asega o un ehelek aien;

⁹ et eti esjilid irak tah an nimnim inigki; is eti imiaaij tah nitai vai nyak aien, aiek ache, nai idim ehgan aiek: Et ehka vai nyak nago vaig nedo has esjilid inigki, um imipalea Atua.

¹⁰ Is tas ehele Josef aien irai iji adiat, ja is eti atahaijeg intas o un aien, mika yi amen ehelen, ka tas ehelen.

¹¹ Is apan a Josef anliin neom an nopan iyehki par ago nauritai o un; ja is eti amen anliin neom tah natamaig.

¹² Is asjiraig napelumai iran aien, um ika, Intumu asjeuc akaijau: ja is udei napelumai itac o un an nikman a Josef, um aha, um alau ijo.

¹³ Is wat almoi a intakata iyehki mika is atcijaig pan napelumai o un an nikman aien, um aha,

¹⁴ is ahlaig aien vai ilpu atamaig an nimnim o un, um tas ehele ra, um ika, Almoi, is imiapam nup u Hibru igcaki aien par imiedohalav caija; et mun ham aien ehelek mika ecru asjeuc aijumrau, ja ek mun imiahlaig yin ainyak:

¹⁵ kis wat imiahlaig yin ainyak, is atcijaig pan napelumai itac o un irak aien, um aha, um alau ijo.

¹⁶ Is ati napelumai o un aien, um aitgaig napam u natimi alupas o un.

¹⁷ Is asan tas iji igki ehelen aien, um ika, Et mun imiedohalav nyak a nup u Hibru iyehki as imiapam yin igcaki aiek par aheca:

¹⁸ kis wat imiahlaig yin ainyak is atcijaig pam napelumai o un irak aien, um aha, um alau ijo.

¹⁹ Is wat atahaijeg intas o ehgan a natimi alupas o un, nikavaig, Is ago nedo inigki vai nyak a naheca unyum; is edemda alupas aien.

²⁰ Is leh Josef a natimi alupas o un, um ati yin anliin neom ipjin, an nuarin iyehki eris ikni ilpu aheca u natimarid iran: is amen eahki aien anliin neom ipjin.

²¹ Ja is amen ehele Josef a Ihova um aiheuc vai yin, um ago upene inliinmopoi natimi aminjinaig neom ipjin vai yin.

²² Is ati Josef aien mika yi aminjinaig natimi asega aien anliin neom ipjin; eris ago niji itai asega eahki ara vai intas o un ache.

²³ Is eti aktaktai tah nitai is amen ehelen a natimi aminjinaig neom ipjin; is idim amen ehele Josef a Ihova; is acis yi alwai yin a Ihova irai iji itai asega is ago aien.