Jenesis 38 - Intas Etipup

Nuarin tas alupas 38.

1 Et apos Er, im Onan, im Sila, a Juta. 6 Et leh Temar ehgan a Er. 8 Nedo maumau u Onan. 11 Et tup amen vai Sila a Temar. 13 Et ago nedo efaifa vai Juta aien. 27 Et apos inmul aien, nan, Feres im Sera.

¹ AN nopan iyehki is ahes ehele ilpu etwan a Juta, um apan, um amen ehele nup Atullam is ethi, nidan Haira.

² Is ecet natahig is ethi u nup u Kenan eahki a Juta, nidan Sua; um leh yin ehgan.

³ Is opoc aien, um apos inhalav atamaig; is anvi nidan aien par ika Er.

⁴ Is lep opoc aien, um apos inhalav atamaig; is anvi nidan aien par ika Onan.

⁵ Is aketo aien um opoc, um apos inhalav atamaig; is anvi nidan aien par ika Sila: is amen Kiseb a Juta is wat apos yin a ehgan.

⁶ Is leh natahig is ethi a Juta, nidan Temar, mika yi ehgai Er inhal o un inmeto.

⁷ Is atimi auatatimi an nuhup u Ihova a Er, inhal u Juta inmeto; is atgei yin a Ihova.

⁸ Is ika a Juta ehele Onan, Namu leh ehgai etwam aiek ehgam, um asvalav imi etwam.

⁹ Is ato a Onan mika, inyi eti inhal o un iyehki; va nitai inigki is wat apan aien ehele ehgan, is elelse an uobohtan, va yi jim apos inhalav vai etwan aien.

¹⁰ Is edemda a Ihova va nedo o un; um lep atgei yin.

¹¹ Is ika a Juta ehele Temar ehgai inhal o un, Namu tup amen aiek an nimnim u etmam, um aitgaig Sila inhal unyak etpu alupas aien: is ika aien, Kit etpu mas aien et idivaig ohwat etwan. Is apan a Temar um amen an nimnim u etman.

¹² Is ti pan itac nadiat is ahinag, ja is mas inhalav atahig u Sua ehgai Juta; is wat eropse inliinmopoi Juta, is apan aien um ateghe ilpu atimi ucsei nalau irai siip o un an nuarin pece Timnad, is ahced yin a napa o un Haira nup Atullam.

¹³ Is asuptecnaig ehele Temar tah, um ika, Et apan Timnad a etmai natamnyu unyum mika yi ucsei nalau irai siip o un.

¹⁴ Is atipagki napelumai u intakata tup amen aien, um aso yin an napelumai upene um adahpoi yin, um ateucse an nihtag u efalaig, ubutpotet pan u nefalaig iyehki is yetpan Timnad; is ato a Temar mika is alupas a Sila, ja eris eti fi auroauro um ati yin ehele Sila mika yi ehgan.

¹⁵ Is wat ecet yin a Juta, is aktaktai aien mika, is takata ago nedo has aien; is idim adahpoi nesganimtan aien.

¹⁶ Is ahidai yin pan ehelen aien an nefalaig, um ika, Et upene mika ki apam ehelum ainyak; is eti ato aien mika is ehgai inhal o un aien. Is ika aien, Napu alupai nyak inhe aiek, el et apam ehelek aiek?

¹⁷ Is ika aien, Ekpu alupai euc nakli nanin ainyak irai itai eklim edo irai pece unyak. Is ika a Temar, Namu ati ehelek aiek tah nitai asjaaicnaig mika yi amen ehelek, um imihum pan an nopan iyehki napu alupai nyak nakli nanin aiek.

¹⁸ Is ika aien, Nev itai asjaaicnaig ekpu alupai euc ainyak? Is ika a Temar, Nethado unyum, im nitaahnaig unyum, im niseuc unyum. Is alupai yin a Juta, um apan ehelen, is um opoc aien vai yin.

¹⁹ Is atidai a Temar, um atga o un, um atipagki napelumai upene iran, um lep aso yin ira apelumai u intakata tup amen.

²⁰ Is imiapan nakli nanin ehelen a Juta irai nup Atullam napa o un, um ika yi leh nitai asjaaicnaig o un is amen ehele intakata: ja is eti ecet yin aien.

²¹ Is ahodaig atimi an nuarin iyehki aien, um ika, Intakata ago nedo has iyek yek eda, is ateuc aien an nihtag u efalaig? Eris ika ara, Et eti amen tah intakata ago nedo has an nuarin inigki.

²² Is adumoij pan ehele Juta aien, um ika, Ek mun eti ecet yin ainyak; era lep ika natimi an nuarin iyehki, Et eti amen tah intakata ago nedo has an nuarin inigki.

²³ Is ika a Juta, Er uauo, etmu leh aien vai tu jim ehcamai akaijau: na mun imiapan nakli nanin inigki ehelen aiek ja na mun eti ecet yin aiek.

²⁴ Is wat ti pan itac inmohoc is eseij, eris asaig ehele Juta, um ika, Is mun ago nedo has a Temar ehgai inhal unyum; et lep opoc aien va nedo has o un. Is ika a Juta, Imiapan yin, um atnamud yin.

²⁵ Eris wat imiapan yin, is abrai etmai natamnyu un aien, um ika, Ek mun opoc ainyak va natimi et o un nitai iji igki: is ika a Temar, Almoi, et u di nitai iji igki, nethado, im nitaahnaig, im niseuc?

²⁶ Is asuptecnaig a Juta, um ika, Et esjilid nedo has unyak irai edo has o un; va nedo unyak, nikavaig, kis eti ati yin ehele Sila inhal unyak ehgan ainyak. Is lep eti ato yin aien.

²⁷ Is wat yetpam nopan apos inhal o un, is apos inmul aien.

²⁸ Is wat apos rau aien, is atgeig yi apidi nikman is ethi ira rau: is leh nikman a intakata aminjinaig yin, um arore nikman an ya cap, um ika, Etpu meto a nat igki.

²⁹ Is asvahteuc nikman aien, ja is lep ehcohos a etwan: is ika a intakata iyehki, Na a uri aiek par ateucrad emda? uhpu anvi nidam vaig: va nitai inigki eris anvi nidan par ika Feres, (Nateucrad emda).

³⁰ Ja is apitac um ateucrad a etwan, is amen inya cap an nikman: eris anvi nidan par ika Sera, (Naunau).