Jenesis 37 - Intas Etipup

Nuarin tas alupas 37.

1 Era amcel vai Josef a ilpu etwan. 9 Numjeg ahnag o un et ero. 13 Et abrai yin a etman mika yi ateghe ilpu etwan. 18 Era asan tas alwai ara par atgei yin. 21 Et imiaras yin a Ruben. 26 Era ahtai yin ara imi ilpu mapoi Ismeel. 31 Era ahiyek etmara ara vai napelumai o un et eteuc inja ira anin iran, et imitaig yin aien. 36 Er ahtai Josef imi Potifar an pece Ijipt.

¹ IS amen a Jekob an pece iyehki is tak atimi iran a etman, an pece Kenan.

² Intas va Jekob ji igki. Is wat eteuc inmesese is seventiin irai Josef, is asgi siip aien im ilpu etwan; is amen aien ehele ohwat hal u Bilha, im ohwat hal u Silpa, erus ehgai etman arau: is asuptecnaig nedo has ura ehele etman a Josef.

³ Is esjilid naiyu u inliinmopoi Isreel vai Josef irai ilpu hal o un asega, is halav efatimi o un aien: is ago napelumai imi yin aien is acheiachei nago iran.

⁴ Eris wat almoi a ilpu etwan mika is esjilid naiyu u inliinmopoi etmara vai yin irai ilpu etwan asega, eris amcel vai yin ara, um tas edemda vai yin.

⁵ Is umjeg ahnag a Josef, um asuptecnaig ehele ilpu etwan: is lep esjilid acen nedemda ura vai yin.

⁶ Is ika ehele ra aien, Akumu atahaijeg intas va numjeg ahnag unyak aijaua:

⁷ intis ijis korn an lelitai akaija, ja is atidai nijis iran unyak, um aiji atoh; eris lep aiji arehed nijis iran unyimia, um atpuse annuhup u nijis iran unyak.

⁸ Eris ika ehelen a ilpu etwan, Nai ika aiek napu atimi alupas unyima aiek, ka oʼo? Nai ika aiek napu esjilid irama aiek, ka oʼo? Is lep esjilid nedemda ura vai yin, va numjeg ahnag o un, im intas o un.

⁹ Is lep aketo aien um umjeg ahnag, um asuptecnaig ehele ilpu etwan, um ika, Ek mun lep umjeg ahnag ainyak; mika is atpuse an nuhup unyak nagesega im inmohoc im inmoijeuv eleven.

¹⁰ Is asuptecnaig ehele etman im ilpu etwan aien: is acaiji yin a etman, um ika, Et echamecha numjeg ahnag inigki unyum? Nai ika aiek ekpu apan ainyak im risum im ilpu etwam, um atpuse an nuhup unyum, ka oʼo?

¹¹ Eris auatitai vai yin a ilpu etwan; ja is aktaktai intas iyehki a etman.

¹² Eris apan a ilpu etwan um asgi siip u etmara Sikem.

¹³ Is ika a Isreel ehele Josef, Era asgi siip a ilpu etwam Sikem, ek merit ainyak mika an apan ehele ra aiek. Is ika aien, Et upene.

¹⁴ Is ika ehelen aien, Apan aiek, um almoi, kit era amen upene a ilpu etwam, im lep niji itai eklim edo irai pece, ka oʼo; um adumoij pam um asuptecnaig ehelek. Is ahes an niskanse Hibron aien, um apan Sikem.

¹⁵ Is ecet yin a natimi is ethi, is wat ahnag aien an lelitai: is ahodai yin a natimi iyehki, um ika, Na ahilek inhe aiek?

¹⁶ Is ika aien, Ek ahilek ilpu etwak ainyak: asuptecnaig ehelek aiek nuarin inig era asgi siip iran ara.

¹⁷ Is ika a natimi iyehki, Eris ahes igcaki ara um atga ura; kis atahaijeg intas ura ainyak, eris ika ara, Ti apan Todan akaija. Is apitac ilpu etwan a Josef, um ecet ra Todan.

¹⁸ Eris wat ecet yin itac acen ara, is wat eti fi yetpan ehele ra aien, eris tiduarin ara mika eri atgei yin.

¹⁹ Eris tas sjipe ara, um ika, Et idim ham a natimi umjeg ahnag inigki.

²⁰ Ti apan akaija, um atgei yin, um ethaig se yin an tah nehpanitai, intupu ika akaija, Is auahas yin tah nitai eklim edo irai pece aleg: intupu almoi akaija, inyi echamecha va numjeg ahnag o un.

²¹ Is atahaijeg intas ura a Ruben, um imitakehke yin va nikmara; um ika, Intumu jim atgei yin akaija.

²² Is tas ehele ra a Ruben, um ika, Akumu jim atgei yin aijaua, jam atise yin an nehpanitai inigki an namasacen, um jim abli yin; is imiaras yin aien, mika yi imiapan yin ehele etman.

²³ Is wat yetpan ehele ilpu etwan a Josef, eris atipagki napelumai irai Josef ara, napelumai inig is acheiachei nago iran, is aso yin iran aien;

²⁴ eris arop iran ara, um atise yin an nehpanitai: is ame nehpanitai, is ti inwai iran.

²⁵ Eris ateucse ara, um hag: ja eris yaspan ara, um almoi, um ecet nup Ismeel is ahinag, eris ahes Cileat ara, um apos niji itai auanipin upene irai kamela ura, eris apan alaig an pece Ijipt ara.

²⁶ Is tas ehele ilpu etwan a Juta, um ika, Et eti upene vai caija nauahas vaig etwaija, um ateri inmas o un.

²⁷ Ti ahtai yin imi nup Ismeel akaija, um jim asjig has nikmaija akaija iran; et etwaija aien um atimi ehpan iraija. Eris adai intas o un a ilpu etwan.

²⁸ Eris atga an nefalaig a nup u Mitian ilpu atimi ahtai itai um auarimtai itai; eris ahyausei jai Josef an nehpanitai ara, um ahtai Josef imi nup Ismeel va nuari silver is twente: eris imiapan Josef an pece Ijipt ara.

²⁹ Is adumoij pan u nehpanitai a Ruben; ja is eti amen a Josef an nehpanitai; is ahpati napelumai o un aien.

³⁰ Is adumoij pan ehele ilpu etwan aien, um ika, Et mun ti a intakuras; jam uauo nyak, ekpu apan eda ainyak?

³¹ Eris leh napelumai u Josef ara, um atgei naklin nanin, um atise napelumai o un an ja iran;

³² eris imiabraig tah ara mika yi imiapan napelumai iyehki is acheiachei nago iran ehele etmara; um ika, Ecris ecetai nitai inigki aijama: na ato aiek kit napelumai u inhal unyum, ka oʼo?

³³ Is ato aien, um ika, Napelumai u inhal unyak nigki; is atgei yin tah nitai eklim edo irai pece aleg; eris idim auoh oplecoplec Josef.

³⁴ Is ahpati napelumai o un a Jekob, um areraig napelumai uucai, um taigtaig vai inhal o un ira adiat is ahinag.

³⁵ Eris atidai a ilpu halav atamaig o un asega, im ilpu halav atahig o un asega um adi lelen; ja is ehka vai yin neropse vaig; is ika aien, Inki eti tinau ainyak um yetpan u iumas unyak. Is idim uco is imitaig yin a etman.

³⁶ Eris imiapan Josef Ijipt a nup u Mitian, um ahtai yiu ehele Potifar naheca u Fero, im natimi alupas u ilpu eucsupo o un.