Jenesis 35 - Intas Etipup

Nuarin tas alupas 35.

1 Et abrai Jekob a Atua mika yi apan Bedel. 2 Et iknipagki atmasimai asega an nimnim o un aien. 6. Et actaig natau Bedel aien. 8 Et mas a Tebora Alon-Bakud. 9 Et asan tas acis yi alwai Jekob a Atua Bedel. 16 Et apos Benjamin a Rejel, um mas an nefalaig ubutpotet pan Itar. 22 Et ago nedo has ehele Bilha a Ruben. 23 Ilpu hal u Jekob. 27 Et yetpan Aisak a Jekob Hibron. 28 Numoh vaig, im inmas vaig u Aisak, er atelmoi yin.

¹ IS tas ehele Jekob a Atua, um ika, Atidai aiek, um apan Bedel, um amen eahki; um ago natau eahki vai Atua is ehcohos ehelum aien, an nopan iyehki as aha aiek vai Isa etwam.

² Is ika a Jekob ehele ilpu hal o un, im lep ehele ra asega eris amen ehelen ara, Akumu atcijaig niji atmasimai ui tak atimi aijaua et amen ehelemia, um yiri caua, um aso caua ira apelumai et eche:

³ intumu atidai akaija, um apan Bedel; ekpu ago natau eahki ainyak vai Atua, is atahaijeg intas alaigaheni unyak aien an nopan iyehki is ohocred inliinmopok ainyak, um amen ehelek an nefalaig iyehki kis atga iran ainyak.

⁴ Eris alupai Jekob niji atmasimai ui tak atimi asega ara is amen ehele ra, im inteijeg asega is amen irai tikgara; is atelmoi a Jekob ithan cai alupas ubutpotet pan Sikem.

⁵ Eris atga ura ara: eris imtitaig alupas Atua a nup urai iji maliyum asega marehed mihtag, eris eti apitac ilpu hal u Jekob ara.

⁶ Is yetpan Lus a Jekob, tak idan Bedel, an pece Kenan, im natimi asega ehelen.

⁷ Is actaig natau eahki aien, um aketo um anvi nidan nuarin iyehki par ika, Bedel, (Neom u Atua): is idim ehcohos pan ehelen a Atua eahki, an nopan iyehki is aha vai etwan aien.

⁸ Ja is mas a Tebora intakata aminjinaig Ribeka, eris atelmoi yin ubutpotet pan Bedel itlian cai alupas is ethi: eris anvi nidan par ika Alon-Bakud, (Incai taigtaig).

⁹ Is lep ehcohos pan ehele Jekob a Atua, is wat ahes Petaneram aien, um acis ye alwai yin.

¹⁰ Is tas ehelen a Atua, um ika, Et idam Jekob: uhmu jim lep anvi nidam par ika Jekob, ja uhmu anvi nidam par ika Isreel: is anvi nidan aien par ika Isreel.

¹¹ Is ika ehelen a Atua, Ek Atua emda acen ainyak: namu asvalav aiek eri ahinag ara; erupu ahes ehelum a nup uran nelcau inyi ethi, im lep nup urai elcau inyi ahinag, erupu lep ahes ehelum a ilpu atimarid;

¹² ekpu lep alupai euc inpece inigki ainyak, kis alupai Ebraham im Aisak ainyak, ekpu lep alupai ilpu mopom ainyak.

¹³ Is udei yin a Atua um aridjai an nohatag an nuarin iyehki is tas ehelen aien.

¹⁴ Is aduwi inhat a Jekob mika yi itai asjaaicnaig an nuarin iyehki is tas ehelen a Atua: is atladwi nitai ahlap umnyi iran aien, is lep atladwi narakei iran aien,

¹⁵ Is lep anvi nidan nuarin iyehki a Jekob is tas ehelen a Atua iran par ika Bedel.

¹⁶ Eris ahes Bedel ara, um eti elvatga, ja par apan Efrad: is ahgei inhal o un a Rejel, ja is ehka napos yin vaig.

¹⁷ Is wat ehka napos yin vaig, is ika ehelen a intakata aminjinaig yin, Namu jim imtitaig aiek; napu lep apos inhalav atamaig inigki aiek.

¹⁸ Is anvi nidan aien par ika Benonai, (Inhal u nohocred unyak), ja is par auatiatiidi aien, (is idim mas aien:) ja is anvi nidan a etman par ika Benjamin, (Inhal an matak).

¹⁹ Is mas a Rejel, eris lep atelmoi yin an nefalaig yetpan Efrad, tak idan Bedlehem.

²⁰ Is aduwi inhat asjaaicnaig an nehpanitai o un a Jekob: et amen inhat asjaaicnaig iyehki an nehpanitai u Rejel um uhum pam an nopan inig.

²¹ Is atga o un a Isreel, um athai neom o un an nahaijin neom ijinies Itaiitac.

²² Is wat amen an pece iyehki a Isreel, is apan a Ruben um amen ehele Bilha ehgai etman: is atahaijeg va nedo o un a Isreel, um edemda alupas vaig. Eris twelv a ilpu hal u Jekob:

²³ ilpu hal u Lia ji igki; nan, Ruben lumeto u Jekob; im Simeon, im Livai, im Juta, im Issakar, im Sebulun:

²⁴ ohwat hal u Rejel raigki; nan, Josef, im Benjamin:

²⁵ ohwat hal u Bilha naheca atahig u Rejel raigki; nan, Tan im Naftalai;

²⁶ ohwat hal u Silpa naheca atahig u Lia raigki; nan, Cat, im Eser: eris ilpu hal u Jekob ara sji igki, eris apos ra imi yin Petaneram.

²⁷ Is yetpan Mamri, tak idan Hibron, a Jekob ehele Aisak etman, an maliyum Arba, erus amen iran a Ebraham im Aisak.

²⁸ Is eteuc inmesese is wun huntret im eete (180) irai Aisak.

²⁹ Is auatialidi a Aisak, um mas; eris ati yin ehele ilpu atimi ehpan iran: is efatimi aien, um ahinag inmesese iran: erus atelmoi yin a Isa im Jekob ohwat hal o un.