Jenesis 33 - Intas Etipup

Nuarin tas alupas 33.

1 Nedo updak jipe u Jekob im Isa an nehtet ira rau. 17 Et yetpan Sukod a Jekob. 18 Et auanimtan nuarin nobohtan Selem aien, um actaig natau, um anvi nidan par ika El-elohe-Isreel.

¹ IS yaspan a Jekob um ecet Isa napam vaig ehelen, eris ahced yin natimi is for huntret. Is ahaig jipe ilpu hal o un a Jekob ehele Lia, im lep Rejel, im lep ohwat aheca atahig o un.

² Is ikni ohwat aheca atahig im ilpu hal urau aien mika eri uhup ara, im Lia im ilpu hal o un juju, im Rejel im Josef apitac.

³ Is apan aien an nuhup ura, um eceseven atpuse, um apan ubutpotet ehele etwan.

⁴ Is atliut a Isa, um aubilid yin, ura ablaijiraig pam yiu, um atpuh pam an nauinwan, um aijumnyi yin: erus taig arau.

⁵ Is yaspan aien um ecet ilpu takata, im ilpu halav, um ika; Di sji igki ehelum? Is ika aien, Era ilpu hal unyak ara sji igki, is aiheuc vai nyak a Atua, um alupai naheca unyum ra.

⁶ Erus lep apan ubutpotet ahwat aheca atahig im ilpu hal urau, um atpuse.

⁷ Eris lep apan ubutpotet a Lia im ilpu hal o un, um atpuse: erus lep apan a Josef im Rejel, ura atpuse.

⁸ Is ika a Isa, Et echamecha nitai eklim edo irai pece iji igki asega ek mun ehtet ira ra ainyak? Is ika aien, Kis ikni ainyak mika yi upene inliinmopoi natimi alupas unyak vai nyak.

⁹ Is ika a Isa, Ak etwak, ek ikni itai ainyak; etmu amen ehelum niji itai unyum.

¹⁰ Is ika a Jekob, Oʼo, el et upene inliinmopom aiek vai nyak, ek ugyi euc ainyak mika au leh nitai tup ahtai unyak aiek: ek mun ecetai nesganimtam ainyak et idivaig nesganimtai natimarid unyak, na eti lep edemda vai nyak aiek.

¹¹ Et upene mika an leh naaurinig unyak aiek er imiapam ehelum; et mun aiheuc vai nyak a Atua, ek lep ikni itai ainyak. Is imiisjis a Jekob, is um leh a Isa.

¹² Is ika a Isa, Intumu lep ahes igcaki akaija um atga uja, ekpu uhup iram ainyak.

¹³ Is ika ehelen a Jekob, Ak natimi alupas, na ato aiek mika, era auatialidi a ilpu halav, era lep opoc niji itai eklim edo irai pece: el er asgi pan emda ra an nadiat inyi ethi ache, erupu emesmas ara asega.

¹⁴ Ak natimi alupas unyak, namu uhup aiek, ja etpu apitac a naheca unyum: ekpu eklim atga ainyak, et idivaig nemda u niji itai eklim edo irai pece, era uhup irak ara, im nemda u ilpu halav, ja ekpu uhum pan natimi alupas unyak ainyak au pece Sier.

¹⁵ Is ika a Isa, Ekpu udei ehelum ainyak nahaiji atimi mi amen ehelek ara. Is ika aien, Er uauo; namu tup aiheuc vai nyak aiek, ak natimi alupas unyak.

¹⁶ Is adumoij pan a Isa an nadiat iyehki alaig an pece Sier.

¹⁷ Is apan Sukod a Jekob, um ago neom imi yin, um ago iyum araho imi niji itai eklim edo irai pece o un: va nitai inigki eris anvi nidan nuarin iyehki par ika Sukod, (Niji iyum araho).

¹⁸ Is wat ahes Petaneram a Jekob, is yetpan an nigpa aien an maliyum Sikem, an pece Kenan; is ago neom atga o un aien ubutpotet pan an maliyum iyehki.

¹⁹ Is auanimtan nuarin nobohtan aien, irai uari mune is wun huntret, ehele ilpu hal u Hemor, etmai Sikem, an nuarin iyehki is ago neom atga o un iran.

²⁰ Is actaig natau eahki aien, um anvi nidan par ika, El-elohe-Isreel, (Atua emda u Isreel).