Jenesis 31 - Intas Etipup

Nuarin tas alupas 31.

1 Et edemda a Jekob, um atga o un, jam eti asaig. 19 Et ahneg niji atmasimai u etman a Rejel. 22 Et apitac yin a Leban. 26 um, asan tas ehti va nedo acalacal o un. 34 Nedo efaifa u Rejel mika yi adenaig natmasimai iji ehki. 36 Et asan tas ehti vai Leban a Jekob. 43 Et asan tas etipup a Leban ehele Jekob Caliet.

¹ IS atahaijeg intas o ilpu halav atamaig u Leban aien, nikavaig, Et mun atoraliak niji itai asega u etmaija a Jekob; et lep esjilid aien va niji itai asega u etmaija.

² Is almoi nesganimtai Leban a Jekob; ja is eti idivaig itu vai yin.

³ Is tas a Ihova ehele Jekob, um ika, Namu adumoij pan aiek ehele ilpu atimi ehpan iram, an pece u ilpu atmil unyum; ekpu amen ehelum ainyak.

⁴ Is abraig tah a Jekob, mika yi asaig ehele Rejel im Lia mika eru apan arau an lelitai, an nuarin is amen iran niji itai eklim edo irai pece o un.

⁵ Is tas ehele rau aien, um ika, Ek almoi nesganimtai etmamirau ainyak, ja et eti idivaig itu vai nyak; ja is amen ehelek a Atua u etmak.

⁶ Erau ato aijaurau, nikavaig, kis emda ainyak um aheca u etmamirau.

⁷ Ja is efaifa vai nyak a etmamirau, um eceten asaig nimtan is eche ehelek; ja is acaiji yin a Atua, mika yi jim ago tah nedo has vai nyak aien.

⁸ Is wat ika aien, Inyi imtan imi euc narakei; eris ahad irai arakei niji itai eklim edo irai pece asega: is wat ika aien, Inyi imtan imi euc nugnyitugnyit; eris ahad irai ugnyitugnyit niji itai eklim edo irai pece asega.

⁹ Is idim iknipagki niji itai eklim edo irai pece u etmamirau a Atua, um alupai nyak.

¹⁰ An nopan iyehki eris wat ahei ra niji itai eklim edo irai pece, kis umjeg ahnag ainyak, um yasji pan, um almoi mika eris ugnyitugnyit, um arakei, um picadpicad, natamaig iji ehki eris ahei niji itai eklim edo irai pece ara.

¹¹ Is tas ehelek a nagelo o Atua an numjeg ahnag unyak, um ika, Ak Jekob: Kis ika ainyak, Ainyak ap aigki.

¹² Is ika aien, Namu yasji pan aiek, um almoi mika era ugnyitugnyit, um arakei, um picadpicad, natamaig asega era ahei niji itai eklim edo irai pece ara: ek mun almoi ainyak nedo asega u Leban vai euc.

¹³ Ek Atua ainyak u Bedel, nuarin iyehki as aduwi inhat iran aiek um aspi, um lep asig yi aktit intas ehelek: namu atidai aiek, um udei inpece inigki, um apan an pece u ilpu atimi ehpan iram.

¹⁴ Erus tas a Rejel im Lia, um ika ehelen, Ecrau mun eti leh aijumrau an nimnim u etmamrau tah nuarin padiaig, ka tah nitai inig ecrau ohuun aijumrau.

¹⁵ Ecrau idivaig nup urai taka uarin aijumrau an nuhup o un; is ahtai cumrau aien, um lep eduoraprap ehni irai imtan iyehki is leh vai cumrau aien.

¹⁶ Et unyimrau, im lep u ilpu hal unyimrau nitai iji igki asega is iknipagki ehele etmamrau a Atua: namu ago nedo asega inig aiek et mun asaig ehelum a Atua.

¹⁷ Is atidai a Jekob, um atijai ilpu hal o un im ilpu ehnaa o un irai kamela;

¹⁸ is lucsei pan niji itai eklim edo irai pece asega o un aien, im inpadiaig asega is ikni aien, niji itai asega is ikni aien Petaneram, ja par apan an pece Kenan ehele Aisak etman.

¹⁹ Is apan a Leban mika yi ucsei alau irai siip o un: is lep ahneg niji atmasimai u etman a Rejel.

²⁰ Is auarahcil irai Leban nup u Syria a Jekob, um atga o un, jam eti asaig ehelen mika yi atga o un aien.

²¹ Is aha aien um lucsei niji itai asega o un; is auroauro aien um algaunyi nofowai, um apan alaig an nedoon Cileat.

²² Is wat ti pan itac nadiat is ero wat lahlah iran is ethi, eris asaig ehele Leban mika is aha a Jekob.

²³ Is asjapicnaig ilpu etwan aien, um apitac yin ira adiat is seven; um uhum pan yin an nedoon Cileat.

²⁴ Is ehcohos pan ehele Leban nup u Syria a Atua an numjeg ahlaig o un an nepig, um ika ehelen, Namu aktaktai aiek, um jim asaig tah intas acaiji ehele Jekob.

²⁵ Is uhum pan Jekob a Leban. Is athai neom atga o un a Jekob an nedoon: eris lep atumop a Leban im ilpu etwan an nedoon Cileat.

²⁶ Is tas a Leban ehele Jekob, um ika, Nev edo inigki as ago aiek, par auarahcil irak, um lucsei ilpu halav atahig unyak, jam eti asaig ehelek, et idivaig ilpu ohua an nedoa?

²⁷ As a uri aiek par aha, jam eti asaig, um auarahcil irak; as eti asaig ehelek aiek, mika ekpu adcijai euc ainyak, um imiacitak, um acesaces nohrai itai, irai timbril im harp?

²⁸ Is ehka vai nyak naijumnyi vaig ilpu halav atamaig unyak, im ilpu halav atahig unyak; as ago nedo ahnag aiek an nitai inigki.

²⁹ Ek emda ainyak par ago nedo has vai euc: ja is tas ehelek a Atua u etmam ianiv an nepig, um ika, Namu aktaktai aiek, um jim asaig tah intas acaiji ehele Jekob.

³⁰ As merit alupas aiek nadumoij pan vaig an nimnim u etmam, va nitai inigki as atga unyum aiek, ja as a uri aiek par ahneg niji atmasimai unyak?

³¹ Is tas a Jekob ehele Leban, um ika, Kis imtitai euc ainyak: kis ika ainyak, Kit napu atoraliak ohwat halav atahig unyum aiek irak.

³² El et almoi niji atmasimai unyum aiek ehelen tah, uhmu atgei yin: el et ecetai tah nitai unyum ehelek aiek, leh aiek an nuhup u ilpu etwaijau. Is eti ato a Jekob mika is ahneg niji atmasimai a Rejel.

³³ Is apan a Leban anliin neom u Jekob, im lep anliin neom u Lia, im lep anliin neom u ohwat aheca atahig; jam eti ecetai. Is lep ahes aien an neom u Lia um alau ijo, um apan anliin neom u Rejel.

³⁴ Is idim lucsei niji atmasimai a Rejel, umikni an cat eris atijai irai kamela um ateuc iran. Is ahilek an neom asega a Leban, jam eti ecetai.

³⁵ Is ika ehele etman aien. Ak natimi alupas unyak, namu jim edemda vai nyak aiek, et ehka vai nyak natidai vaig an nuhup unyum; et eteuc nedo o ilpu takata irak. Is ahilek aien, jam eti ecetai niji atmasimai.

³⁶ Is edemda vai Leban a Jekob, um atuh yin: is tas a Jekob, um ika ehele Leban, Nev edo acalacal unyak? nedo has unyak nevitai? na mun apitac emda nyak aiek vanhe?

³⁷ Na mun ahilek ira aga asega unyak aiek, na mun ecetai inhe unyum aiek? ati an nuhup u ilpu etwaijau mika eri ato nedo ujau ara.

³⁸ Kis amen ehelum ainyak irai mesese is twente; is eti etjo inhal o un tah siip ka tah nanin unyum, kis lep eti caig tah siip atamaig unyum ainyak.

³⁹ Kis eti imiapan ehelum ainyak tah nitai eris auahas kuri aleg; kis lep isjeupigmoig ainyak; as leh neruvaig ehelek aiek, kit eris ahneg an nadiat, ka eris ahneg an nepig.

⁴⁰ Is idim uco; is auahas nyak nihlup an nadiat, is lep auahas nyak nopoigmul au nepig; kis eti umjeg ainyak.

⁴¹ Kis idim amen ainyak au nimnim unyum irai mesese is twente; kis aheca unyum ainyak irai mesese is fortiin vai ohwat halav atahig unyum, im lep irai mesese is siks va niji itai eklim edo irai pece unyum: as eceten asaig nimtan is eche imi nyak aiek.

⁴² El is eti amen ehelek a Atua u etmak, Atua u Ebraham, Atua inig is imtitaig yin a Aisak, el et abraig pan nyak aiek an nopan inig et idivaig nihkin natimi. Is almoi nohocred unyak a Atua, im nauritai unyak, um acaiji euc ianiv an nepig.

⁴³ Is tas ehele Jekob a Leban, um ika, Era ilpu halav atahig unyak a ilpu takata iji igki, era ilpu hal unyak a ilpu halav iji igki, era itai eklim edo irai pece unyak nitai eklim edo irai pece iji igki, et un-yak nitai iji igki asega na almoi aiek: ja et ehka vai nyak nago vaig tah nitai au nadiat inigki vai ilpu halav atahig unyak iji igki, im lep vai ilpu hal ura eris apos ra ara.

⁴⁴ Va nitai inigki namu apani aiek mika intupu asig intas aktit jipe ujau akaijau; inyi itai asjaaicnaig imi caijau nigki.

⁴⁵ Is leh inhat a Jekob, um aduwi mika yi itai asjaaicnaig.

⁴⁶ Is ika ehele ilpu etwan a Jekob, Akumu asjapicnaig hat aijaua; eris asjapicnaig ara um actaig niji iran: eris hag ara eahki ijinies an niji hat.

⁴⁷ Is anvi nidan a Leban par ika Jicar-sehatuda: is anvi nidan a Jekob par ika Caliet.

⁴⁸ Is ika a Leban, Et itai asjaaicnaig imi caijau niji iran inigki an nadiat inig. Va nitai inigki eris anvi nidan par ika Caliet, (Niji iran asjaaicnaig);

⁴⁹ eris lep anvi nidan inhat aduwi par ika Mispa, (Nitai aminjinaig); vaig inig nikavaig, is ika a Leban, Intu wit udei jipe caijau akaijau, etmu almuktit nedo ujau a Ihova.

⁵⁰ El et auahas inliinmopoi ohwat halav atahig unyak aiek, ka el et lep lucsei ilpu takata et eche aiek pan irai ohwat halav atahig unyak mika eri ehnaa unyum, etu wit eti amen tah natimi eheleijau; etmu ato nedo ujau a Atua.

⁵¹ Is tas ehele Jekob a Leban, um ika, Almoi niji iran inigki aiek, um lep almoi inhat aduwi inigki na mun ati an niblaijau aiek;

⁵² inyi itai asuptecnaig niji iran inigki, inyi lep itai asuptecnaig inhat aduwi inigki, mika inki eti ahtaregdei niji iran inigki ainyak, im inhat aduwi inigki, alaig ehelum, napu eti lep ahtaregdei niji iran inigki aiek, im inhat aduwi inigki, alaig ehelek, par ago tah nedo has.

⁵³ Etmu almaijidjid nedo ujau a Atua u Ebraham, im Atua u Nehor, Atua u etmarau. Is asig yi aktit intas o un a Jekob vai Atua is imtitai yin a Aisak etman.

⁵⁴ Is ahlap a Jekob ijinies an lolan nedoon iyehki, um imiacaij ilpu etwan mika eri hag ara: eris hag ara, um amen an lolan nedoon an nepig asega.

⁵⁵ Is wat lahlah an nuhialeg, is auroauro a Leban um atidai, um aijumnyi ilpu halav atamaig o un, im ilpu halav atahig o un, um acis yi alwai ra: is lep atga o un a Leban, um adumoij pan an nuarin pece o ura