Jenesis 30 - Intas Etipup

Nuarin tas alupas 30.

1 Et taig a Rejel va neti asvalav o un, um alupai Jekob Bilha naheca atahig o un ehgan. 5 Et apos Tan im Naftalai aien. 9 Et lep alupai yin Silpa naheca atahig o un eghan a Lia, et apos Cat im Eser aien. 14 Et almoi ohwai yihec a Ruben, et auanimtan natamnyu un vaig irai Rejel a Lia. 17 Et apos Isakar, im Sebulun, im Taina a Lia. 22 Et apos Josef a Rejel. 25 Et merit a Jekob mika yi apan an pece o un. 27 Et atapnes yin a Leban an tas etipup et eche. 37 Nedo arapakau u Jekob, et ikni itai vaig aien.

¹ IS wat ato a Rejel mika is eti apos tah inhalav imi Jekob aien, is auatitai vai etwan a Rejel, um tas ehele Jekob, um ika; El et eti alupai nyak inhalav aiek, ekpu mas ainyak.

² Is ehniv a Jekob vai Rejel, um ika; Ek eti idivaig Atua ainyak, et eti alupai euc ilpu halav aien.

³ Is ika a Rejel, Almoi Bilha naheca atahig unyak, namu apan ehelen aiek; etpu apos ilpu halav imi nyak aien, ekpu asvalav iran ainyak.

⁴ Is alupai yin Bilha naheca atahig o un aien ehgan: is apan ehelen a Jekob.

⁵ Is opoc a Bilha, um apos inhalav atamaig imi Jekob.

⁶ Is ika a Rejel, Is aktaktai nyak a Atua, um atahaijeg intas unyak, um alupai nyak inhalav atamaig: va nitai inigki is anvi nidan aien par ika Tan, (Neruvaig atoh).

⁷ Is lep opoc a Bilha naheca atahig u Rejel, umlep apos inhalav atamaig imi Jekob.

⁸ Is ika a Rejel, Kis imiisjis emda ehele etwak ainyak, ja ek esjilid ainyak: is anvi nidan aien par ika Naftalai, (Nimiisjis emda).

⁹ Is wat ato a Lia mika is eti fi asvalav aien, is leh Silpa naheca atahig o un aien, um alupai Jekob yin ehgan.

¹⁰ Is apos inhalav atamaig imi Jekob a Silpa naheca atahig u Lia.

¹¹ Is ika a Lia, Et ham namen upene: is anvi nidan aien par ika Cat, (Namen upene).

¹² Is lep apos inhalav atamaig imi Jekob a Silpa naheca atahig u Lia.

¹³ Is ika a Lia, Ek mun ahesmoij ainyak, erupu lep ika a ilpu takata ek mun ahesmoij ainyak: is anvi nidan aien par ika Eser, (Nahesmoij).

¹⁴ Is apan a Ruben an nopan meto u hwiit, um almoi ohwai yihec an lelitai, um imiapan ehele Lia risin. Is ika a Rejel ehele Lia, Aiheuc vai nyak aiek, um alupai nyak ohwai yihec u inhal unyum.

¹⁵ Is ika ehelen aien, Et eti upene nedo unyum, as atipagki natamnyu unyak aiek; nai lep merit aiek inleh vaig ohwai yihec u inhal unyak. Is ika a Rejel, Oʼo, etpu amen ehelum aien an nepig inigki vai ohwai yihec inhal unyum.

¹⁶ Is wat ahes an lelitai a Jekob an jupura, is apan a Lia par aubilid yin, um ika, Namu apam ehelek aiek; ek mun idim auanimtam ainyak irai ohwai yihec u inhal unyak. Is amen ehelen aien an nepig iyehki.

¹⁷ Is atahaijeg intas o Lia a Ihova, is opoc aien, um apos inhalav atamaig fiftd imi Jekob.

¹⁸ Is ika a Lia, Et alupai nyak nimtan unyak a Atua, va nedo unyak, nikavaig, kis ati naheca atahig unyak ainyak ehele natamnyu unyak is anvi nidan aien par ika Isakar, (Et imtan aien).

¹⁹ Is lep opoc a Lia, um apos inhalav atamaig siktd imi Jekob.

²⁰ Is tas a Lia, um ika, Et mun ago nedo upene vai nyak a Atua; etpu imiacitak nyak a natamnyu unyak, kis apos inhalav atamaig is siks imi yin ainyak: is anvi nidan aien par ika Sebulun, (Nimiacitak).

²¹ Is apitac aien um apos inhalav atahig, um anvi nidan par ika Taina.

²² Is imiehva Rejel a Atua, is lep atahaijeg intas o un a Atua, um ika yi asvalav aien.

²³ Is opoc aien, um apos inhalav atamaig; um ika, Et mun atipagki nohocred unyak a Atua:

²⁴ is anvi nidan aien par ika Josef, (Lep alupai); um ika, Etpu lep alupai nyak inhalav atamaig inyi ethi a Ihova.

²⁵ Is wat apos Josef a Rejel, is ika ehele Leban a Jekob, Namu adcijaig nyak aiek, mika ki apan ainyak umak, an pece unyak.

²⁶ Namu alupai nyak ilpu ehnaa unyak aiek, im ilpu hal unyak, kis aheca unyum ainyak vai ra, umadcijaig nyak; na ato aiek nauanaheca unyum kis ago ainyak.

²⁷ Is tas ehelen a Leban, um ika, Namu aiheuc vai nyak aiek, um amen ehelek: ek ato ainyak mika is acis yi alwai nyak a Ihova vai euc.

²⁸ Is ika aien, Namu asaig nimtan ehelek aiek, ekpu alupai euc ainyak.

²⁹ Is ika ehelen a Jekob, Na ato aiek, nikavaig, kis aheca upene unyum ainyak, um aminjinaigupene niji itai eklim edo irai pece unyum.

³⁰ Kis wat ham ainyak is eti elpat niji itai unyum, ja et mun ahinag acen an nopan inig; et mun acis yi alwai euc a Ihova va nauritai unyak: ekpu lep ikni itai ainyak vai ilpu hal unyak an nahopan?

³¹ Is ika a Leban, Ekpu alupai euc inhe ainyak? Is ika a Jekob, Namu jim alupai nyak tah nitai aiek: el et ago nedo inigki vai nyak aiek, ekpu lep aminjinaig niji itai eklim edo irai pece unyum ainyak, um asgi ra.

³² Namu atga aiek inpig irai iblai iji itai eklim edo irai pece asega unyum, um iknipagki ehele ra arakei asega, im picadpicad, im nilmaicap irai siip, im picadpicad, im arakei irai anin: nimtan imi nyak nigki.

³³ Etu wit yetpam nimtan imi nyak an nuhup unyum an taka opan, uhpu ato nedo atoh unyak: el et amen ehelek tah nanin et eti arakei, um eti picadpicad, ka tah siip et eti ilmaicap, inyi idivaig nitai eris ahneg.

³⁴ Is tas a Leban, um ika, Et idim upene intas unyum, inyi idim uco.

³⁵ Is iknipagki nanin atamaig ugnyitugnyit a Leban an nadiat iyehki, im picadpicad, im nanin atahig arakei asega, im picadpicad, (nanin asega is ahi niji ualin iran,) im nilmaicap asega irai siip, um ikni ra ehele ilpu halav atamaig o un.

³⁶ Is ati nuarin nefalaig a Leban er atga iran ira adiat et dri, an niblan im Jekob: is lep asgi niji itai eklim edo irai pece u Leban is eled a Jekob.

³⁷ Is lucsei auiya mat im nauiugnyabod, im nauihau a Jekob; um ahosjugnit, mika yi ateucrad nahi ira auicai.

³⁸ Is aduwi nauicai iji igki is ahosjugnit iran aien an nuhup u itai eklim edo irai pece irai iji elcau is amen inwai nan eris wat apan ara par umwig, mika eri lep ahei ra an napan ura par umwig.

³⁹ Eris ahei niji itai eklim edo irai pece an nuhup u nauicai; va nitai inigki eris ugnyitugnyit, um arakei, um picadpicad a ilpu hal ura.

⁴⁰ Is ahaig nakli siip im nakli nanin a Jekob, um iknipagki ira ra niji itai eklim edo irai pece eris ugnyitugnyit ara, im naklai asega irai iji itai eklim edo irai pece u Leban; ja is echim ikni is eche niji itai eklim edo irai pece iji ehki imi yin aien, jam eti ikni ra ehele iji itai eklim edo irai pece u Leban.

⁴¹ Eris wat ahei niji itai eklim edo irai pece emda, is ikni nauicai an nuhup ura a Jekob u inwai, mika eri ahei ra an nuhup u auicai.

⁴² Ja eris wat auatialidi niji itai eklim edo irai pece is eti ikni aien: va nitai inigki is auatialidi niji itai eklim edo irai pece u Leban, jam emda u Jekob.

⁴³ Is atimi ikni itai esjilid aien, is ohuun niji itai eklim edo irai pece is ahinag aien, im ilpu aheca atamaig, im ilpu aheca atahig, im kamela, im togke.