Jenesis 29 - Intas Etipup

Nuarin tas alupas 29.

1 Et yetpan nehpanwai Heran a Jekob. 9 Et ecet Rejel aien. 13 Et alaan a Leban. 18 Et asan tas etipup a Jekob vai Rejel. 23 Er ahiyek yin vai Lia. 28 Et lep leh Rejel aien mika yi ehgan, um auanaheca vai yin irai mesese et seven et eche. 32 Et apos Ruben a Lia, 33 im Simeon, 34 im Livai, 35 im Juta.

¹ IS atga o un a Jekob, um apan an pece u nup an ridjai o un.

² Is eas aien, um ecetai nehpan-wai an lelitai, eris asjeuc o un inpak irai siip is eseij im natimi asgi siip; eris alumai siip inwai an nehpanwai iyehki. Is lep amen inhat alupas an nehpanwai.

³ Eris wat asjapicnaig eahki siip ura a ilpu atimi asgi siip asega, eris atipagki inhat an neucsen nehpanwai ara, um alumai siip, um lep atapnes nehpanwai an hat.

⁴ Is tas ehele ra Jekob, um ika. Ak ilpu etwak, akis ahes eda aijaua? Eris ika ara, Ecra up u Heran ai-jama.

⁵ Is aliodai ra aien, um ika, Eka ato Leban aijaua mapoi Nehor, ka oʼo? Eris ika ara, Maiya, ecra ato yin aijama.

⁶ Is ika ehele ra aien, Et ceh-cehe aien, ka oʼo? Eris ika ara, Maiya, et cehcehe aien: et lep imiaparn siip a Rejel inhalav atahig o un.

⁷ Is ika aien, Et idim adiat an nopan inig, um eti opan asjapic-naig itai eklim edo irai pece: aku-mu alumai siip aijaua, um apan, um asgi ra,

⁸ Eris ika ara, Etelika vai cama an nopan inig, ja uhu wit asjapicnaig siip asega, uhpu atipagki inhat an neucsen nehpanwai; ecrupu alumai siip aijama.

⁹ Is wat tas ehele ra aien, is imi-apam siip u etman a Rejel: is asgi siip o un aien.

¹⁰ Is wat ecet Rejel inhalav atahig u Leban natamaig irai risin a Jekob, im lep siip u Leban natamaig irai risin, is apan ubutpotet a Jekob, um atipagki inhat an neucsen nehpanwai, um alumai siip u Leban natamaig irai risin.

¹¹ Is aijumnyi Rejel a Jekob, um taig ijinies.

¹² Is asuptecnaig ehele Rejel a Jekob mika, is ohwanig u etman aien, im inhal u Ribeka: is athut pan a Rejel um asuptecnaig ehele etman.

¹³ Is wat atahaijeg intas vai Jekob a Leban, inhal u natahig iran, is athut pan aien, um aubilid Jekob, um ablaijiraig pam yin, um aijumnyi yin, um imiapan yin anliin neom o un. Is asuptecnaig niji itai asega va napam o un ehele Leban aien.

¹⁴ Is tas ehelen a Leban, um ika, Na idim esgak aiek. Is amen ehelen aien an mohoc is ethi.

¹⁵ Is tas ehele Jekob a Leban, um ika, Na ohwanig unyak aiek, ja napu eti tup aheca unyak aiek; namu asaig ehelek aiek nimtan imi euc.

¹⁶ Is eteuc inhalav atahig is ero o Leban: nidai inmeto Lia, im nidai inharei Rejel.

¹⁷ Is auatialidi nesganimtai Lia; ja is upene nohui Rejel, um eklim upene nesganimtan.

¹⁸ Is aiyu inliinmopoi Jekob vai Rejel; is ika aien, Ekpu aheca unyum ainyak nai mesese inyi seven vai Rejel inhalav atahig unyum inharei.

¹⁹ Is ika a Leban, Et upene irak mika ki alupai euc yin ainyak ehgam, um eti alupai intak atimi: namu amen ehelek aiek.

²⁰ Is aheca vai Rejel a Jekob irai mesese is seven; ja is idivaig nadiat is eti elpat iran, va naiyu u inliinmopon vai yin.

²¹ Is tas a Jekob ehele Leban, um ika, Et mun ahni nopan nauanaheca unyak, namu alupai nyak ehgak aiek mika yi amen ehelek aien.

²² Is asjapicnaig atimi asega au nuarin pece iyehki a Leban, um auanetha incara.

²³ Is wat epig, is leh Lia inhal o un aien, um imiapan yin ehelen; is amen ehelen aien.

²⁴ Is alupai Lia inhalav atahig o un a Leban Silpa naheca atahig o un, mika yi aheca o un aien.

²⁵ Is wat lahlah an nuhialeg, is ecet Lia a Jekob; is ika ehele Leban aien, Nev edo inigki na mun ago aiek vai nyak? kis aheca unyum ainyak vai Rejel; na a uri aiek par ago nedo efaifa vai nyak?

²⁶ Is ika a Leban, Er eti ago nedo inigki an pece unyima, um uhup um alupai inharei, ja par apitac inmeto.

²⁷ Namu aminjinaig wiik va natmehgan u nat igki aiek; ja napu lep leh nat naico aiek, va nauanaheca unyum napu lep aheca unyak aiek wai mesese inyi seven.

²⁸ Is ago nedo inigki a Jekob, um aminjinaig wiik va natmehgan u Lia: is lep alupai yin Rejel aien inhalav atahig o un ehgan.

²⁹ Is alupai Rejel inhalav atahig o un a Leban Bilha naheca atahig o un, mika yi aheca o un aien.

³⁰ Is lep amen ehelen a Rejel, is aiyu alupas inliinmopon aien vai Rejel, ja is aiyu tintin vai Lia; is lep aheca o un aien irai mesese is seven.

³¹ Is wat almoi a Ihova mika is esjum a Jekob vai Lia, is ika aien yi asvalav aien: ja is eti asvalav a Rejel.

³² Is opoc a Lia, um apos inhalav atamaig, um anvi nidan par ika Ruben, (Almoi inhalav atamaig): is ika aien, Is idim almoi nohocred unyak a Ihova; etpu lep aiyu inliinmopoi natamnyu unyak vai nyak.

³³ Is lep opoc aien, um apos inhalav atamaig; um ika, Is ato a Ihova mika eris esjum vai nyak, va nitai inigki et mun lep alupai nyak inhalav atamaig inigki aien: is anvi nidan aien par ika Simeon, (Nato nohocred).

³⁴ Is lep opoc aien, um apos inhalav atamaig; um ika, Etpu idim upene inliinmopoi natamnyu unyak vai nyak an nopan inig, kis apos inhalav atamaig is eseij imi yin ainyak: va nitai inigki eris anvi nidan par ika Livai, (Napol vaig).

³⁵ Is lep opoc aien um apos inhalav atamaig: is ika aien, Ekpu idim imiahpas Ihova ainyak: va nitai inigki is anvi nidan aien par ika Juta, (Nimiahpas); is eti fi lep asvalav aien.