Jenesis 28 - Intas Etipup

Nuarin tas alupas 28.

1 Et asan tas acis yi alwai Jekob a Aisak, um abrai yin mika yi apan Petaneram. 6 Et leh Mahelad inhalav atahig u Ismeel a Isa mika yi ehgan. 10 Et ahuumtidec a Jekob um ecetai nefalaig. 18 Inhat u Bedel. 20 Intas upyi asaig u Jekob.

¹ IS ahlaig vai Jekob a Aisak, um acis yi alwai yin, um ated yin, um ika ehelen, Namu jim leh ehgam aiek irai ilpu atahig an pece Kenan.

² Atidai aiek, um apan Petaneram, an nimnim u Beduel etmai risum; um leh ehgam eahki irai ilpu halav atahig u Leban natamaig irai risum.

³ Etmu acis yi alwai euc a Atua emda acen, um ika an asvalav aiek, mika eri ahinag acen a ilpu mapoin;

⁴ um atijai iram intas acis yi alwai Ebraham im lep irai ilpu mapom; mika an ohuun inpece inig aiek na amen iran aiek, is alupai Ebraham a Atua.

⁵ Is abraig pan Jekob a Aisak: is apan Petaneram aien ehele Leban, inhal u Beduel nup u Siria, natamaig irai Ribeka, risi Jekob im Isa.

⁶ Is ato a Isa, nikavaig, is acis yi alwai Jekob a Aisak, um abrai yin mika yi apan Petaneram aien, um leh ehgan eahki; um lep ated yin, an nacis yi alwai yin vaig, um ika, Namu jim leh ehgam aiek irai ilpu atahig an pece Kenan;

⁷ um lep ato mika is atahaijeg intas o etman im risin a Jekob, um apan alaig Petaneram;

⁸ is wat ecetai a Isa, nikavaig, is esjum vai ilpu takata an pece Kenan a Aisak etman;

⁹ is apan a Isa ehele Ismeel inhal u Ebraham, um leh Mahelad ehgan is halav atahig u Ismeel aien, im natahig irai Nibejod; ja is upyi leh ehgan is ero aien.

¹⁰ Is ahes Biersiba a Jekob, um apan alaig Heran.

¹¹ Is yetpan an nuarin is ethi aien, an nete u nagesega, um amen eahki an nepig; is leh inhat aien an nuarin iyehki, um ati uri nilaig, um asjeuc, um umjeg.

¹² Is umjeg ahnag aien, um ecetai nafurafeta eris aduwi an nobohtan, is lep taujai nilpun an nohatag: eris aridjai iran a ilpu agelo o Atua, um lep asuol se.

¹³ Is lep aiji ubutpotet ehelen a Ihova, um ika, Ek Ihova ainyak, Atua u Ebraham etpom, im Atua u Aisak: ekpu alupai euc ainyak, im ilpu mapom, inpece inig na asjeuc iran aiek.

¹⁴ Erupu idivaig inmah an nobohtan a ilpu mapom, erupu terimterim ara um apan suko, im jeko, im poko, im pahaiko erupu lep ahesmoij a nup urai iji pece asega vai euc, im lep vai Mapom.

¹⁵ Ek idim amen ehelum ainyak par aminjinai euc irai iji uarin asega an apan iran aiek, ekpu lep imiapam euc an pece inigki ainyak; inki idim eti udei euc ainyak, um imihum pan an nopan iyehki ekpu ehneijid ainyak intas inig ek mun asaig ehelum ainyak.

¹⁶ Is aiji a Jekob va numjeg o un, um ika, Et idim amen a Ihova an nuarin inigki; ja ek mun eti ato ainyak.

¹⁷ Is imtitaig aien, um ika, Et itap esjilid nuarin inigki! et idim neom u Atua nigki, im lep neucse neom an nohatag.

¹⁸ Is auroauro a Jekob um atidai an nuhihialeg, um leh inhat iyehki is ati aien um ilaig iran, um aduwi um atladwi jai narakei iran.

¹⁹ Is anvi nidan nuarin iyehki aien par ika Bedel: nidan inmaliyum iyehki itu acen Lus.

²⁰ Is asan tas aktit o un a Jekob, um ika, Vaig inig nikavaig, etpu amen ehelek a Atua, um aminjinaig nyak an nefalaig inig ek atga iran ainyak, um alupai nyak nitai caig incak, im nepelumai aso nyak.

²¹ Um imiadumoij pan nyak an nimnim n etmak an nigpa; etpu idim Atua unyak a Ihova:

²² inyi eom u Atua inhat inigki, ek mun aduwi ainyak va nitai asjaaicnaig: ekpu lep ahtai nuarin tend imi euc ainyak irai iji itai asega napu alupai nyak aiek.