Jenesis 24 - Intas Etipup

Nuarin tas alupas 24.

1 Et ika ehele naheca o un a Ebraham yi asig yi aktit intas o un ehelen. 10 Napan vaig u naheca iyehki. 12 Nalaigaheni o un: 14 Nitai asjaaicnaig o un. 15 Et ehtet iran a Ribeka, 18 um ehneijid nitai asjaaicnaig o un, 22 um leh niji itai imiyecrei yin, 23 um ehvaig ehelen ilpu atimi ehpan iran, 25 um, imiacaij yin an nimnim, ura. 26 Et imiahpas Atua a naheca iyehki. 29 Et alaan a Leban. 34 Et asuptecnaig intas o un a naheca iyehki. 50 Erau ika a Leban im Beduel, Et upene. 58 Et ika a Ribeka yi atau. 62 Et ehtet iran a Aisak.

¹ IS efatimi a Ebraham, um ahinag inmesese iran: ja is acis yi alwai yin a Ihova irai iji itai asega.

² Is ika a Ebraham ehele naheca o un inmeto an nimnim o un, is aminjinaig niji itai asega o im aien. Ek ugyi euc ainyak, mika an ati nikmam aiek itlian neduok:

³ um asig yi aktit intas an nuhup u Ihova, Atua an nohatag, im Atua an nobohtan, nikavaig, napu eti leh ehgai inhal unyak aiek irai ilpu halav atahig u nup u Kenan iji igki, ek amen ehele ra ainyak:

⁴ ja napu apan aiek an pece unyak, ehele ilpu atimi ehpan irak, um leh ehgai Aisak inhal unyak.

⁵ Is ika ehelen a naheca iyehki. Kit inyi esjum a natahig nahced nyak vaig um apam an pece inigki: ekpu lep imiapan inhal unyum ainyak an pece iyehki as ahes iran aiek, ka oʼo?

⁶ Is ika ehelen a Ebraham, Aktaktai aiek, um jim lep imiapan inhal unyak eahki.

⁷ Et Atua an nohatag a Ihova, is atipagki nyak aien an nimnim u etmak, im lep an pece u ilpu atimi ehpan irak, is lep tas ehelek aien, um asan tas aktit ehelek, um ika, Ekpu alupai ilpu mapom inpece inigki ainyak; etpu abrai nagelo o un aien mika yi uhup iram aien, napu leh natahig eahki aiek ehgai inhal unyak.

⁸ El et esjum natahig nahced euc vaig, inyi eti amen ehelum intas aktit unyum: jam jim imiapan inhal unyak eahki aiek.

⁹ Is ati nikman a naheca iyehki ithan neduei Ebraham natimi alupas o un, um asig yi aktit intas va nitai inigki.

¹⁰ Is lucsei kamela is ten a naheca iyehki irai kamela u natimi alupas o un, um atga o un; (is aminjinaig niji itai asega u natimi alupas o un aien:) is atidai aien, um yetpan Mesopotemia an maliyum u Nehor.

¹¹ Is ika aien eri atpuse kamela o un u nehpanwai ubutpotet pan inmaliyum an jupura, an nuarin nadiat iyehki eris apan a ilpu takata um athun wai.

¹² Is ika aien, Ak Ihova Atua u Ebraham natimi alupas unyak, ek ugyi euc ainyak, mika an atau imi nyak aiek an nadiat inigki, um aiheuc vai Ebraham natimi alupas unyak.

¹³ Ek idim aiji u nehpanwai ainyak; era lep ham a ilpu atahig an maliyum inigki par athun wai:

¹⁴ etmu idim uco, nikavaig, eku wit ika ehelen tah natahig ainyak, Ek ugyi euc ainyak, mika an imiasuol nipjinitai unyum aiek um athun wai lumak; el etpu ika aien, Umnyi aiek, ekpu lep alumai kamela unyum ainyak: etmu atahig iyehki aien as ati yin aiek ehgai naheca unyum Aisak; va nitai inigki ekpu ato ainyak, nikavaig, na mun aiheuc vai natimi alupas unyak aiek.

¹⁵ Is um uce, is wat eti fi tas ehni aien, is ehcohos pan a Ribeka, is apos yin a Beduel, inhal u Milka, ehgai Nehor, etwai Ebraham, is apos nipjinitai an neuhlin aien.

¹⁶ Is eklim upene nesganimtan aien, is atahig aien, is pam eti ato yin tah natamaig: is asuol an nehpanwai aien, um athun wai, um lep aridjai.

¹⁷ Is athut a naheca iyehki, um aubilid yin, um ika, Ek ugyi euc ainyak mika an alumak tah inwai aiek an nipjinitai unyum.

¹⁸ Is ika aien, Umnyi aiek, ak natimi alupas: is auroauro aien, um atise nipjinitai an nikman, um alum an.

¹⁹ Is aluman ehni aien, um ika, Ekpu lep athun wai ainyak lumai kamela unyum, um aluma ra.

²⁰ Is auroauro aien, um atladwi inwai an nipjinitai an nelcau, is lep athut pan aien u nehpanwai, um athun wai, um alumai kamela asega o un.

²¹ Is imiali yin a natimi iyehki, jam eti tas, par ato, kit is atau imi yin a Ihova an natga o un, ka oʼo.

²² Eris umwig ehni kamela o un, ja is leh inteijeug colt a natimi iyehki, nahaijin sikel is ethi nopoc iran, im nethado colt is ero is sikel is ten nopoc iran, um ati an nikman ehro;

²³ is ika aien, Nai halav atahig u di aiek? asaig aiek: et alupas nimnim u etmam, ka oʼo, mika ecri amen iran aijama?

²⁴ Is ika ehelen aien, Ek halav atahig u Beduel ainyak, inhal u Milka, is apos yin imi Nehor aien.

²⁵ Is lep ika ehelen aien, Et ahinag nefelelicai unyima im nitai caig, et lep alupas nimnim unyima par amen iran.

²⁶ Is atpuse a natimi iyehki, um ago nalaigaheni vai Ihova.

²⁷ Is ika aien, Naaurinig vai Ihova, Atua u Ebraham natimi alupas unyak, et inveijec aien, um aiheuc vai natimi alupas un-yak, um eti udei yin: kis wat atga an nefalaig ainyak, is imiapam nyak a Ihova an nimnim u ilpu etwai natimi alupas unyak.

²⁸ Is athut a natahig iyehki, um asuptecnaig nitai iji igki ehele ra an nimnim u risin.

²⁹ Is eteuc natamaig is ethi irai Ribeka, nidan Leban: is athut pan a Leban ehele natimi iyehki u nehpan wai.

³⁰ Is wat ecetai inteijeug aien im nethado an nikmai natahig iran, um lep atahaijeg intas o Ribeka natahig iran, nikavaig, Is idim uco intas o natimi ehelek; is yetpan aien ehele natimi iyehki; is amen aien u kamela o un an uehpanwai.

³¹ Is ika aien, Apam aiek, ak natimi inigki et mun acis yi alwai euc a Ihova; na a uri aiek par amen itac? ek mun yecrei neom ainyak, im lep nuarin imi kamela.

³² Is apan anliin neom a natimi iyehki: is atipagki niji itai irai kamela a Leban, um leh nefelelicai im nitai caig incai kamela, im inwai par yiri neduei natimi iyehki, im neduei ilpu atimi ahced yin.

³³ Eris lep alupai yin nitai caig incan: ja is ika aien, Ekpu uhup ainyak um asuptecnaig intas inig eris abrai nyak vaig, ja par hag. Is ika a Leban, Asuptecnaig aiek.

³⁴ Is ika aien, Ek aheca u Ebraham ainyak.

³⁵ Is esjilid naiheuc u Ihova vai natimi alupas unyak; et atimi ikni itai aien: is alupai yin siip aien, im kurimatau, im silver, im colt, im ilpu aheca atamaig, im ilpu aheca atahig, im kamela, im togke.

³⁶ Is wat efatimi a Sera ehgai natimi alupas unyak, is apos inhalav atamaig aien imi natimi alupas unyak: is alupai yin niji itai asega o un aien.

³⁷ Is acaiji emda nyak a natimi alupas unyak, um ika, Namu jim leh ehgai inhal unyak aiek irai ilpu halav atahig u nup u Kenan, ek amen an pece ura ainyak:

³⁸ ja namu apan aiek an nuarin pece u etmak, ehele ilpu atimi ehpan irak, um leh ehgai inhal unyak.

³⁹ Kis ika ainyak ehele natimi alupas unyak, Kit inyi esjum a natahig nahced nyak vaig.

⁴⁰ Is ika ehelek aien, Etpu abrai nagelo o un a Ihova, et ecetai nedo unyak aien, mika yi ahced euc aien, um aminjinai euc an nefalaig; namu leh ehgai inhal unyak aiek irai ilpu atimi ehpan irak an nuarin pece u etmak:

⁴¹ inyi eti amen intas aktit unyum ehelek, nau wit yetpan ehele ilpu atimi ehpan irak aiek; el era esjum ara um eti alupai euc tah natahig, inyi eti amen iram intas aktit unyum ehelek.

⁴² Ek mun ham u uehpanwai ainyak inpig, um ika, Ak Ihova, Atua u Ebraham natimi alupas unyak, el et atau imi nyak aiek an nefalaig ek atga iran ainyak:

⁴³ ek idim aiji ainyak u nehpanwai; etmu idim uco, etu wit yetpam a natahig par athun wai, ekpu ika ehelen ainyak, Ek ugyi euc ainyak mika an alumak tah inwai tintin aiek an nipjinitai unyum;

⁴⁴ el et ika ehelek aien, Umnyi aiek, ekpu lep athun wai ainyak lumai kamela unyum: etmu atahig inigki aien is ati yin a Ihova ehgai inhal u natimi alupas unyak.

⁴⁵ Et wat eti fi tas ehni an liinmopok ainyak, et mun ehcohos a Ribeka, et mun amen nipjinitai an neuhlin; et mun asuol an nehpanwai aien, um athun wai: ek mun ika ehelen ainyak, Ek ugyi euc ainyak mika an alumak tah inwai aiek.

⁴⁶ Et mun auroauro aien um atise nipjinitai, um ika, Umnyi aiek, ekpu lep alumai kamela unyum inwai ainyak: ek mun idim umnyi ainyak, et mun lep athun wai aien, um alumai kamela.

⁴⁷ Ek mun ahodaig yin ainyak, um ika, Nai halav atahig u di aiek? Et mun ika aien, Ek halav atahig u Beduel ainyak, inhal u Nehor, is apos yin a Milka: ek mun ati inteijeug an nipjiimtan ainyak, im lep nethado an nikman ehro.

⁴⁸ Ek mun atpuse ainyak, um ago nalaigaheni vai Ihova, um naaurinig vai Ihova Atua u Ebraham natimi alupas unyak, is asjaaicnaig an nefalaig atoh imi nyak aien par leh inhalav atahig u etwai natimi alupas unyak, ehgai inhal o un.

⁴⁹ Al eka ika aijaua aki ago nedo upene im nedo inveijec vai natimi alupas unyak aijaua, asuptecnaig ehelek: ja el et eti uce, asuptecnaig ehelek; mika ki atga unyak ainyak um apan an matak, ka an mauuk.

⁵⁰ Erus tas a Leban im Beduel, um ika, Et ahes ehele Ihova nitai inigki: et ehka vai cama nasaig vaig ehelum tah intas.

⁵¹ Ribeka mun nigki, leh yin aiek, um atga unyum, etmu eh-gai inhal u natimi alupas unyum aien, et idivaig intas o Ihova.

⁵² Is wat atahaijeg intas urau a neheca u Ebraham, is atpuse aien, um imiahpas Ihova.

⁵³ Is ahyausei niji itai silver a naheca iyehki, im niji itai colt, im napelumai, um alupai Ribeka: is lep alupai natamaig iran aien im risin niji itai tup ahtai esjilid.

⁵⁴ Eris hag ara um umwig, im lep ilpu takuras o un um amen an nepig; ja is wat lahlah an nuhialeg, eris aiji ara; is um ika aien, Akumu adcijaig nyak aijaua, mika ki apan ainyak ehele natimi alupas unyak.

⁵⁵ Is um ika a natamaig iran im risin, Etmu amen ehelema a natahig an nadiat inyi eti elpat, et idivaig inyi ten; ja par apan.

⁵⁶ Ja is ika ehele ra aien, Jim acaiji nyak, et mun idim ago nedo upene vai nyak a Ihova an natga unyak; akumu adcijaig nyak aijaua mika ki apan ehele natimi alupas unyak ainyak.

⁵⁷ Erus ika arau, Ecrupu ahlaig vai natahig aijama, um ahodai yin.

⁵⁸ Eris ahlaig vai Ribeka ara, um ika ehelen, Napu ahced natimi inigki aiek, ka oʼo? Is ika aien, Maiya, ekpu ahced yin ainyak.

⁵⁹ Eris adcijai Ribeka natahig ira ra ara, im intakata aminjinaig yin, im naheca u Ebraham, im ilpu takuras o un.

⁶⁰ Eris acis yi alwai Ribeka ara, um ika ehelen, Na atahig irama aiek, namu etpoi atimi inyi ahinag acen aiek, erumu lep esjilid a ilpu mapom irai ilpu atimi tak atimi ira ra.

⁶¹ Eris atidai a Ribeka im ilpu atahig o un, eris ateuc irai kamela ara, um ahced natimi iyehki: is leh Ribeka a naheca iyehki um atga o un.

⁶² Is edo a Aisak an nefalaig iyehki is ahes u nehpanwai La-heroi; is amen aien an nuarin pece inig et ahes nuritoga iran.

⁶³ Is alau ijo a Aisak an jupura parago nalaigaheni: is easpan aien, um alum kamela napam vaig.

⁶⁴ Is lep easpan a Ribeka, is wat ecet Aisak aien, is ahes a kamela aien um asuol.

⁶⁵ Is upyi ahodai naheca aien, um ika, Di naico et edo aien anliin pece par aubilid caija? Is um ika a naheca, Et atimi alupas unyak aien: va nitai inigki is leh napelumai a Ribeka, um adahpoi yin.

⁶⁶ Is asuptecnaig ehele Aisak a naheca iyehki niji itai asega is ago aien.

⁶⁷ Is imiapan Ribeka a Aisak anliin neom u Sera risin, um leh yin ehgan; is aiyu inliinmopon aien vai Ribeka: is lep eropse inliinmopoi Aisak vai inmas u risin.