Jenesis 23 - Intas Etipup

Nuarin tas alupas 23.

1 Numoh vaig im inmas vaig u Sera. 3 Er I auanimtan Makpila, 19 nuarin nobohtan inig er atelmoi Sera iran.

¹ IS eteuc inmesese is wun huntret im twente seven (127) irai Sera: is idim umoh a Sera irai mesese iji igki.

² Is mas a Sera Kirjad-arba, tak idan Hibron, an pece Kenan: is apan a Ebraham mika yi taig afakatotau, um imitaig Sera ehgan.

³ Is atidai a Ebraham an nuhup u ehgan is mas aien, um tas ehele nup u Hed, um ika,

⁴ Ek up u taka uarin ainyak um tup amen ehelemia: atcijaig imi nyak nuarin nobohtan mika ki atelmoi ehgak iran ainyak et mun mas aien, eri eti lep alum yin.

⁵ Eris tas ehele Ebraham a nup u Hed, um ika ehelen,

⁶ Ak natimi alupas, atahaijeg cama aiek: na atimarid esjilid aiek ehelema: namu atelmoi ehgam aiek et mun mas aien, an tah netheso esjilid unyima er atelmoi atimi iran; inyi eti imiaaij netheso o un tah, mika an jim atelmoi ehgam iran aiek et mun mas aien.

⁷ Is atidai a Ebraham, um atpuse an nuhup u nup uran pece iyehki, nup u Hed marom.

⁸ Is tas ehele ra aien, um ika. El et upene iramia mikaki atelmoi ehgak ainyak et mun mas aien, eri eti lep alum yin; atahaijeg nyak aijaua, um ugyi Ifron inhal u Sohar vai nyak,

⁹ mika yi atcijaig imi nyak aien inmun nij Makpila, et ohuun aien, et eteuc an nilpun pece o un; etmu ahtai nuarin nobohtan o un imi nyak aien va nimtan upene, mika yi etheso unyak ehelemia.

¹⁰ Is amen ehele nup u Hed a Ifron: is tas ehele Ebraham a Ifron an nuhup u nup u Hed asega, eris atga ara an neucse nathatahau an maliyum ura, um ika,

¹¹ Oʼo, ak natimi alupas, atahaijeg nyak aiek: ek atcijaig imi euc nuarin nobohtan ainyak, im lep inmun nij iran; ek atcijaig imi euc ainyak, an nuhup u ilpu atimi ehpan irak: atelmoi ehgam aiek et mun mas aien.

¹² Is atpuse a Ebraham an nuhup u nup uran pece iyehki.

¹³ Is tas aien ehele Ifron an nuhup u nup uran pece, um ika, El et atcijaig aiek, namu atahaijeg nyak aiek: ekpu alupai euc nimtan nuarin nobohtan ainyak; namu lucsei aiek, ekpu atelmoi ehgak iran ainyak et mun mas aien.

¹⁴ Is tas ehele Ebraham a Ifron, um ika,

¹⁵ Ak natimi alupas, atahaijeg nyak aiek: nimtan nuarin nobohtan nigki, nuari silver et for huntret; ja er uauo akaijau? atelmoi ehgam iran aiek et mun mas aien.

¹⁶ Is atahaijeg Ifron a Ebraham; is asjaaicnaig nuari silver iji ehki a Ebraham imi Ifron, is asaig aien an nuhup u nup u Hed, sikel irai silver is for huntret, mune upene u ilpu atimi ahtai itai.

¹⁷ Is idim atcijaig imi Ebraham a Ifron nuarin nobohtan o un Makpila, ubutpotet pan Mamri, nuarin nobohtan iyehki, im inmun nij iran, im lep incai asega is amen iran, um arehed mihtag,

¹⁸ is atcijaig imi Ebraham aien an nuhup u nup u Hed asega, eris atga ara an neucse nathatahau an maliyum ura.

¹⁹ Ja is par apitac a Ebraham, um atelmoi Sera ehgan an mun nij an nuarin nobohtan Makpila, ubutpotet pan Mamri: tak idan Hibron, an pece Kenan.

²⁰ Eris idim atcijaig imi Ebraham a nup u Hed nuarin nobohtan iyehki, im inmun nij iran, mika yi ohuun aien irai iji mesese, mika yi etheso o un.