Jenesis 22 - Intas Etipup

Nuarin tas alupas 22.

1 Et ika ehele Ebraham a Atua yi ahlap an nitai ahlap Aisak. 3 Et imiisjis ninveijec aien, um imiaiji intas o Atua. 11 Et atapnes yin a nagelo iyehki. 13 Et isjeupigmoig Aisak siip atamaig et ethi. 14 Er anvi nidan nuarin iyehki par ika Ihova Jairi. 15 Er aketo um asan tas acis yi alwai Ebraham. 20 Ilpu hal u Nehor im ilpu mapon.

¹ IS ti pan itac nitai iji igki, ja is ika a Atua yi ato inliinmopoi Ebraham, um ika ehelen, Ak Ebraham: is ho a Ebraham.

² Is ika a Atua, Leh inhal unyum aiek, inhal unyum et ethi ache Aisak, et aiyu inliinmopom aiek vai yin, um apan an pece Moraia; um ahlap iran eahki nitai ahlap atnamud, an lolan nedoon et ethi, ekpu asuptecnaig ehelum ainyak.

³ Is atidai a Ebraham an nuhihialeg, um ati satel irai togke o un, umleh intakuras is ero oun, im Aisak inhal o un, um ehtuko cai uri nitai ahlap atnamud, ura apan alaig an nuarin iyehki is asuptecnaig ehelen a Atua.

⁴ Is wat ti pan itac nadiat is eseij, is easpan a Ebraham um ecetai nuarin iyehki, ja is itac acen.

⁵ Is ika ehele intakuras erahki a Ebraham, Amen igcaki aijaurau ehele togke; ecru apan iagko aijumrau um ahlap, ja par lep apam ehelemirau.

⁶ Is leh incai uri nitai ahlap atnamud a Ebraham, um atijai irai Aisak inhal o un; is apos incap aien an nikman, im nauitoga; erus ehratga arau.

⁷ Is tas a Aisak ehele Ebraham etman, um ika, Ak Etmak: is ika aien, Inhe, ak inhal unyak? Is ika aien, Incap im incai mun igki: ja nakli siip uri nitai ahlap atnamud yek eda?

⁸ Is ika a Ebraham, Ak inhal unyak, etpu ati nakli siip imi yin a Atua uri nitai ahlap atnamud: erus lep ehratga arau.

⁹ Erus wat yetpan an nuarin iyehki arau is asuptecnaig ehelen a Atua; is actaig natau eahki a Ebraham, um ikni upene incai iran, um arore Aisak inhal o un, um atijai yin an natau ijinies irai cai.

¹⁰ Is arahpan va nikman a Ebraham, um leh nauitoga, mika yi atgei inhal o un.

¹¹ Ja is ahlaig vai yin a nagelo o Ihova an nohatag, um ika. Ak Ebraham, ak Ebraham: is ho a Ebraham.

¹² Is ika a nagelo, Jim atgei intakuras inaico aiek, um jim ago tah nitai vai yin: ek idim ato ainyak mika, nai imtitai Atua aiek, va nedo unyum, nikavaig, na mun eti imiaaij Aisak inhal unyum et ethi ache aiek vai nyak.

¹³ Is easpan a Ebraham, um ecetai siip atamaig is ethi is ecen nipat o un irai ahtaicai: is apan a Ebraham, um leh siip atamaig iyehki, um ahlap iran nitai ahlap atnamud inpare vai inhal o un.

¹⁴ Is anvi nidan nuarin iyehki a Ebraham par ika Ihova-jairi, (Etpu ato a Ihova): et idivaig er asaig an nopan inig, Uhpu ecetai an nedoon u Ihova.

¹⁵ Is ecero ahlaig vai Ebraham a nagelo o Ihova an nohatag,

¹⁶ um ika, Et ika a Ihova, Ek mun asig yi aktit intas vai nyak ainyak va nedo inigki unyum, nikavaig, na mun eti imiaaij inhal unyum et ethi ache aiek vai nyak:

¹⁷ ekpu idim acis yi alwai euc ainyak, ekpu ika ainyak erupu ahinag acen a ilpu mapom, um idivai moijeuv an nohatag, um lep idivaig nauanavig; erupu ohuun niji pece u ilpu atimi tak atimi ira ra a ilpu mapom;

¹⁸ erupu ahesmoij a nup urai iji pece asega vai mapom; va nedo unyum, nikavaig, na mun imiaiji intas unyak aiek.

¹⁹ Is lep adumoij pan ehele ohwat takuras o un a Ebraham, eris atidai ara, um ehratga, um apan Biersiba; is amen Biersiba a Ebraham.

²⁰ Is ti pan itac nitai iji igki, ja eris asuptecnaig ehele Ebraham, um ika, Is apos ilpu hal o un a Milka imi Nehor etwam; nan,

²¹ Hus inmeto o un, im Bus etwan, im Kemuel etmai Eram,

²² im Kiset, im Heso, im Piltas, im Jitlaf, im Beduel.

²³ Is apos Ribeka a Beduel: is apos ilpu halav iji igki is eet a Milka imi Nehor etwai Ebraham.

²⁴ Is lep apos Tiba, im Ceham, im Dehas, im Meaka, a ehgan is eche, nidan Riuma.