Jenesis 21 - Intas Etipup

Nuarin tas alupas 21.

1 Er apos Aisak. 4 Er aperitome iran. 6 Nimiacitak u Sera. 9 Er ahlo Hecar im Ismeel. 15 Nohocred u Hecar. 17 Et ago eropse yin a nagelo. 22 Intas etipup u Abimelek ehele Ebraham Biersiiba.

¹ IS ateghe Sera a Ihova is idivaig is asaig aien, is lep ago vai Sera a Ihova is idivaig intas o un.

² Va nitai inigki is opoc a Sera, um apos inhalav atamaig imi Ebraham an nefatimi o un, an nopan iyehki is tas vaig ehelen a Atua.

³ Is anvi nidai inhal o un a Ebraham, is apos imi yin a Sera, par ika Aisak.

⁴ Is wat ti pan itac nadiat is eet, is aperitome irai inhal o un a Ebraham, is idivaig is asaig ehelen a Atua.

⁵ Is eteuc inmesese is wun huntret irai Ebraham, eris wat apos; Aisak inhal o un.

⁶ Is ika a Sera, Et mun ika a Atua ki imiacitak ainyak, erupu lep imiacitak ehelek ara asega era atahaijeg nyak ara.

⁷ Is ika aien, Is emda a di par ika ehele Ebraham, Etpu alidai inhal o un a Sera? ek mun apos inhalav atamaig imi yin ainyak an nefatimi o un.

⁸ Is wat alupas inhalav, eris atwan nided imi yin: is auanetha alupas a Ebraham an nadiat iyehki eris atwan nided imi Aisak.

⁹ Is ecet inhal u Hecar nup Ijipt a Sera, is apos imi Ebraham aien, is imiafakahcil Aisak inhal o un aien.

¹⁰ Va nitai inigki is ika ehele Ebraham aien, Abraig pagki naheca atahig inigki aiek, im inhal o un: inyi eti isjeupigmoig euc a inhal u naheca atahig inigki pan irai Aisak inhal unyak.

¹¹ Is taigtaig alupas inliinmopoi Ebraham vai inhal o un.

¹² Ja is ika a Atua ehele Ebraham, Etmu jim taigtaig inliinmopom aiek vai inhal unyum, im naheca atahig unyum; namu imiaiji intas asega aiek et mun asaig ehelum a Sera; erupu isjeupigmoig euc a ilpu mapom irai Aisak.

¹³ Ekpu lep ika ainyak eri ahinag a ilpu mapoi inhal u naheca atahig inigki, et idim hal unyum aien.

¹⁴ Is aiji a Ebraham an nuhihialeg, um leh nitai caig im inhubej is amen inwai iran, um alupai Hecar, um atijai an neuhlin, im lep inhal o un, um abraig pagki rau: erus apan arau, um atga ahnag an namasacen Biersiba.

¹⁵ Is um ti inwai an hubej, is lep ati inhal o un aien ithan nahtancai is ethi.

¹⁶ Is apan aien um ateucse an nuhup o un, ja itac acen, et idivaig nuarin yetpan nidjan nefana iran: is ika aien, Eklim jim almoi inmas o inhal unyak ainyak. Is ateuc aien an nuhup o un; is um taig alupas a Ismeel.

¹⁷ Is atahaijeg nohrai intakuras a Atua; is ahlaig vai Hecar a nagelo o Ihova an nohatag, um ika ehelen, Ak Hecar, na a uri aiek? jim imtitaig; et mun atahaijeg nohrai inhal unyum eahki a Atua.

¹⁸ Namu apan aiek, um imiatidai inhal unyum, um asjiraig yin an nikmam; ekpu ika ainyak eri ahinag a ilpu mapon.

¹⁹ Is asalgei nesganimtan a Atua, is ecetai nehpanwai aien; is apan aien um athun wai an hubej is ohua, um alumai inhal o un.

²⁰ Is aminjinaig intakuras iyehki a Atua; is elvalupas aien, um amen an namasacen, is atimi apos efana aien.

²¹ Is amen aien an namasacen Peran: is leh ehgan imi yin a risin an pece Ijipt.

²² An nopan iyehki is tas ehele Ebraham a Abimelek im lep Faikol natimi alupas u ilpu eucsupo o un, um ika, Et atau imi euc a Atua irai iji itai asega na ago aiek:

²³ va nitai inigki namu asig yi aktit intas unyum aiek ehelek an nuhup u Atua, mika napu eti ago nedo efaifa vai nyak aiek, im lep vai inhal unyak, im mapok: jam ago nedo aiheuc vai nyak, et idivaig nedo aiheuc unyak vai euc, im lep vai nup uran pece inigki na amen iran aiek.

²⁴ Is ika a Ebraham, Ekpu asaig yi aktit intas unyak ainyak.

²⁵ Is ated Abimelek a Ebraham vai nehpanwai is ethi, eris atoraliak a ilpu aneca u Abimelek.

²⁶ Is ika a Abimelek, Ek eti ato ainyak natimi inig is ago nitai inigki aien: as eti asuptecnaig ehelek aiek, nato pali nigki ainyak inpig.

²⁷ Is lucsei siip a Ebraham im kurimatau, um alupai Abimelek; erus lep asig yi aktit jipe intas uran arau:

²⁸ Is echim ikni nakli siip atahig is seven a Ebraham.

²⁹ Is ika ehele Ebraham a Abimelek, Na a uri aiek par echim ikni nakli siip atahig iji igki et seven?

³⁰ Is ika aien, Namu lucsei nakli siip atahig iji igki unyak et seven aiek, mika yi itai asuptecnaig vai nyak, nikavaig, kis ucji nehpanwai inigki ainyak.

³¹ Va nitai inigki is anvi nidan nuarin iyehki aien par ika Biersiba, (Nehpanwai an tas aktit); erus asig yi aktit jipe intas urau arau eahki.

³² Maiya, erus asig yi aktit jipe intas urau arau Biersiba: erus atidai a Abimelek im Faikol natimi alupas u ilpu eucsupo o un, um adumoij pan an pece u nup u Filistia.

³³ Is ahwaig niji cai Biersiba a Ebraham, um ago nalaigaheni vai Ihova, et Atua aien irai iji mesese.

³⁴ Is amen a Ebraham an pece u nup u Filistia ira adiat is ahinag.