Jenesis 2 - Intas Etipup

Nuarin tas alupas 2.

1 Nadiat atumop uhup. 4 Nago vaig itai. 8 Er ago nahapol Itena, 10 im nofowai iran. 17 Er atapnes incai er ato itai vaig. 19, 20 Et anvi nidai niji itai umumoh, asega a Atam. 21 Et ago intakata a Atua, um ati natmehgan.

¹ Eris ago ehni nohatag im nobohtan, im niji itai asega amen iran is uce.

² Is ago ehni nauritai o un a Atua, ja par lahlah an nadiat sevend; is atumop aien an nadiat sevend va niji auritai asega is ago aien.

³ Is acis yi alwai nadiat sevend a Atua, um ika yi itap: is idim atumop iran a Atua va niji auritai asega is atupun aien um ago.

⁴ IS um uce nago vaig nohatag im nobohtan an nopan iyehki is ago nobohtan im nohatag a Ihova Atua uja,

⁵ im lep nahtaicai asega an nobohtan an nopan iyehki is pam eti eteuc an nobohtan, im inceslum asega an nobohtan an nopan iyehki is pam eti ededel: is pam eti ati incopda an nobohtan a Ihova Atua uja an nopan iyehki, is ti tah natimi par auritai an nobohtan.

⁶ Ja is ahes inmoso an nobohtan um aridjai, um opoh nobohtan asega.

⁷ Is leh nuarin nobohtan a Ihova Atua uja um ago Atam iran, um ahlai inmun gidjin; is um umoh a Atam.

⁸ Is ago nahapol a Ihova Atua uja Itena an ridjai o un; is ati eahki aien natimi inig is ago aien.

⁹ Is ika a Ihova Atua uja, Etmu ededel an nobohtan niji obotpot cai asega inyi upene nalmoi vaig, um upene incaig vaig; im lep nauincai umumoh vaig juju anliin nahapol, im nauincai uhpu ato nitai upene vaig im nitai has.

¹⁰ Is ahes Itena nofowai um ahec pan u nahapol; is atiakoai um for nauiwai iran.

¹¹ Nidan nofowai uhup Paison: et arehed mihtag an pece Havila asega, et amen colt eahki;

¹² et esjilid colt an pece iyehki: etamen eahki telyum im inhat oniks.

¹³ Im lep nidan nofowai sekunt Caihon: et arehed mihtag an pece Idiopia.

¹⁴ Im lep nidan nofowai dirt Hitekel: et yah an nahaijin Asiria an ridjai o un. Im lep nidan nofowai ford Yufretes.

¹⁵ Is leh Atam a Ihova Atua uja, um ati yin u nahapol Itena, mika yi ahapol iran aien um aminjinaig.

¹⁶ Is tas alep ehele Atam a Ihova Atua uja, um ika, Namu tup hegaig nohwaicai asega aiek an nahapol:

¹⁷ jam jim caig nohwancai er ato nitai upene im nitai has vaig: napu idim mas aiek an nadiat inig an caig aiek.

¹⁸ Is ika a Ihova Atua uja, Et eti upene vai Atam nechim amen vaig; ekpu ago natimi atau imi yin ainyak.

¹⁹ Is ago niji itai eklim edo irai pece asega an nobohtan a Ihova Atua uja, im niji obotpot man asega an nauanohatag; is imiapan ra ehele Atam aien mika yi anvi nidara aien: is anvi nidai niji itai umumoh asega a Atam.

²⁰ Is anvi nidai niji itai eklim edo irai pece auata upene asega a Atam, im niji man an nauanohatag, im niji itai eklim edo irai pece aleg asega; ja is pam eti eteuc tah par atau imi Atam.

²¹ Is ika a Ihova Atua uja yi umjeg asega a Atam, is umjeg aien: is atipagki neduon ritin is ethi aien, um lep adgai iran;

²² is ago natahig a Ihova Atua uja an neduon ritin is atipagki aien irai Atam, is imiapan yin ehele Atam aien.

²³ Is ika a Atam, Neduon an neduok nigki, im nohun an nohuk: uhmu anvi nidan par ika natahig, vaig inig nikavaig, eris atipagki yin an natamaig.

²⁴ Va nitai inigki etmu udei etman im risin a natamaig, um amen se ehele ehgan: etmu ethi ache nohurau arau.

²⁵ Erus tup atga a Atam im ehgan, ja erus eti ehcamai arau.