Jenesis 18 - Intas Etipup

Nuarin tas alupas 18.

1 Et alayi nagelo et eseij a Ebraham. 9 Er acaiji Sera vai inlaav o un vai intas upyi asaig imiali iyehki. 17 Er ehvaig ehele Ebraham nauahas vaig u inmaliyum Sotom. 23 Et ugyi Ihova a Ebraham vai nup u Sotom.

¹ IS ehcohos pan ehele Ebraham a Ihova irai uarin marara Mamri: is ateuc aien an neucse neom au nadiatadiat;

² is easji pan aien um ecet natimi is eseij naiji vaig ehelen: is wat ecet ehtaij aien is ahes an neucse neom aien, um athut, um aubilid ehtaij, um atpuse an nobohtan,

³ um ika, Ak ehtaij atimarid unyak, aiheuc vai nyak aijautaij, um jim ahtaredgei naheca umyimitaij:

⁴ uhmu imiapam tah inwai par yiri neduomitaij, ahtijmu lep atumop aijautaij ithan cai:

⁵ ekpu lep imiapam nuarin nitai caig ainyak, ahtijmu asjirai cautaij iran aijautaij; ja par lep atga unyimitaij: ehtaij mun ham ehele naheca unyimitaij aijautaij va nitai inigki. Ehtijis ika ahtaij, Et upene intas unyum, ago aiek.

⁶ Is auroauro a Ebraham um apan anliin neom ehele Sera, um ika, Auroauro aiek, um leh flaur upene inyi ohua nipjinitai inyi eseij, um aplamod, um ago nareto, um ahen.

⁷ Is athut pan a Ebraham u kurimatau o un, um leh nakli kurimatau esjilid, um alupai intakuras is ethi; is auroauro aien am atgei um atho.

⁸ Is lep leh buter aien, im nidenided, im nakli kurimatau iyehki eris atho, um ikni an nuhup u ehtaij; is aiji aien ehele ehtaij ithan cai; ehtijis hag ahtaij.

⁹ Ehtijis ika ehelen ahtaij, Sera ehgam yek eda? Is ika aien, Anliin neom marom.

¹⁰ Is ika aien, Ekpu idim lep ham ainyak ehelum an nopan o un; etpu apos inhalav atamaig a Sera ehgam. Is amen a Sera an neucse neom an nidjin, um atahaijeg.

¹¹ Erus efatimi a Ebraham im Sera; is lep ti pan itac nedo o ilpu takata irai Sera.

¹² Va nitai inigki is laav a Sera, um ika inliinmopon, Ek efatimi ainyak, et lep efatimi a natimi alupas unyak, ekpuimiacitak inhalav atamaig unyak ainyak, um uauo?

¹³ Is ika ehele Ebraham a Ihova, Et a uri a Sera par laav, um ika, Inki eti apos inhalav ainyak, ek mun efatimi ainyak?

¹⁴ Et eti ehka tah nitai vai Ihova. Ekpu lep ham ehelum ainyak an nopan eris ati, etpu apos inhalav atamaig a Sera.

¹⁵ Ja is ateri a Sera, um ika, Ek mun eti laav ainyak; is idim imtitaig aien, Ja is ika aien; Na mun idim laav aiek.

¹⁶ Ehtijis atidai natimi erahki, um easpan Sotom: is ahced ehtaij a Ebraham, um, imiasjaaicnaig ehtaij an nefalaig.

¹⁷ Is ika a Ihova, Inki eti adenaig vai Ebraham ainyak nitai inig ekpu ago ainyak;

¹⁸ erupu idim ahinag acen a ilpu mapoi Ebraham, erupu imiacitak a nup urai iji pece vai yin.

¹⁹ Ek ato yin ainyak mika, etpu esege imi ilpu hal o un aien, im ilpu aheca o un, mika eri ahced nefalaig u Ihova ara, um ago nedo upene im nedo atoh; va etpu ago irai Ebraham a Ihova is idivaig intas o un ehelen.

²⁰ Is ika a Ihova, Et esjilid nohran tas o nup u Sotom im nup u Comora, et lep esjilid nedo has ura;

²¹ ekpu asuol ainyak, um almoi nedo ura, el et idivaig nohran tas iyehki is yetpam irak, ka oʼo; ja el et eti idivaig, ekpu ato ainyak.

²² Erus ahes eahki natimi erahki um apan alaig Sotom: ja is aiji a Ebraham an nuhup u Ihova.

²³ Is apan ubutpotet a Ebraham, um ika, Napu ehrauahas ilpu atimi upene aiek im ilpu atimi auatatimi, ka oʼo?

²⁴ El era amen an maliyum inigki a ilpu atimi upene er fifte: napu auahas inmaliyum aiek, um eti imialep vai ilpu atimi upene et fifte iran, ka oʼo?

²⁵ Etmu itac acen vai euc nedo inigki, par ehrauahas ilpu atimi upene im ilpu atimi auatatimi: etmu lep itac acen vai euc nedo inigki par ago nedo et ethi vai ilpu atimi upene im ilpu atimi auatatimi: Etpu idim ago nedo atoh a Natimi alupas an nobohtan asega.

²⁶ Is ika a Ihova, El ek ecet ilpu atimi upene inyi fifte ainyak an maliyum Sotom, ekpu imialep nuarin pece asega ainyak vai ra.

²⁷ Is tas a Ebraham, um ika, Ek mun idim tas ehele Ihova ainyak, ja ek idim obohtan ainyak um ohpa:

²⁸ el eh iknipagki natimi et faiv irai ilpu atimi upene et fifte: napu auahas inmaliyum asega aiek va neti ecet natimi et faiv, ka oʼo? Is ika aien, El ek ecet ilpu atimi upene et forte faiv ainyak, inki eti auahas ainyak.

²⁹ Is lep tas ehelen aien, um ika, El et ecet natimi et forte iran aiek. Is ika aien, Inki eti auahas ainyak va natimi et forte.

³⁰ Is ika aien, Namu jim edemda aiek, ak Ihova, ekpu lep tas ainyak: El et ecet natimi et dirte iran aiek. Is ika aien, El ek ecet natimi et dirte iran ainyak, inki eti auahas ainyak.

³¹ Is ika aien, Ek mun emda ainyak um tas ehele Ihova: El et ecet natimi et twente iran aiek. Is ika aien, Inki eti auahas ainyak va natimi et twente.

³² Is ika aien, Namu jim edemda aiek, ak Ihova, ekpu lep ecethi tas ainyak: El et ecet natimi et ten iran aiek. Is ika aien, Inki eti auahas ainyak va natimi et ten.

³³ Is tas ehni ehele Ebraham a Ihova, ja par atga o un: is lep adumoij pan a Ebraham an nimnim o un.