Jenesis 17 - Intas Etipup

Nuarin tas alupas 17.

1 Et aketo a Atua um, ati intas etipup o un. 5 Et leh nidan et eche a Ebram, nitai asjaaicnaig vai intas acis yi alwai yin esjilid. 10 Er ati naperitome. 15 Er ati nidan et eche imi Sere, um asan tas acis yi alwai yin. 17 Er ika eri apos Aisak. 23 Er aperitome irai Ebraham im Ismeel.

¹ IS wat eteuc inmesese is nainte nain irai Ebram, is ehcohos pan ehele Ebram a Ihova, um ika ehelen, Ek Atua emda acen ainyak; atga an nuhup unyak aiek, um ago nedo atoh.

² Ekpu ati intas etipup unyak ehelum ainyak; ekpu lep ika ainyak eri ahinag acen a ilpu mapom.

³ Is atpuse a Ebram: ja is tas ehelen a Atua, um ika,

⁴ Et idim amen ehelum intas etipup unyak: napu etpoi nup urai iji pece inyi ahinag aiek.

⁵ Uhmu jim lep anvi nidam, par ika Ebram, ja uhmu anvi nidam par ika Ebraham; ek mun ati euc ainyak mika an etpoi nup urai iji pece inyi ahinag aiek.

⁶ Ekpu ika ainyak napu idim asvalav aiek eri ahinag, erupu ahes ehelum a nup urai iji pece, napu lep etpoi ilpu atimarid aiek.

⁷ Ekpu ati intas etipup unyak ainyak ehelum, im lep ehele ilpu mapom, erupu epitpitac iram ara irai iji mesese, mika ekpu Atua unyum ainyak, um lep Atua u ilpu mapom, erupu epitpitac iram ara.

⁸ Ekpu alupai euc ainyak, im lep ilpu mapom erupu epitpitac iram ara, inpece inig na tup amen iran aiek, inpece Kenan asega, erupu ohuun ara irai iji mesese; ekpu lep Atua ura ainyak.

⁹ Is ika ehele Ebraham a Atua, Namu imiaiji intas etipup unyak aiek, im ilpu mapom erupu epitpitac iram ara irai iji mesese.

¹⁰ Intas etipup unyak nigki, namu imiaiji aiek im ilpu mapom erupu epitpitac iram ara; nikavaig, Uhmu aperitome irai ilpu halav atamaig unyimia asega.

¹¹ Akumu aperitome irai ohumia aijaua; etmu itai asjaaicnaig nigki vai intas etipup unyak ehelemia.

¹² Etu wit eet nadiat iran tah inhalav atamaig unyimia uhmu aperitome iran, ilpu halav atamaig unyimia asega eri apos ra, aien eri apos yin an nimnim unyum, im lep yin eri auanimtan irai mune ehele tak atimi, jam eti ahes ehelum.

¹³ Uhmu idim aperitome iran eri apos yin an nimnim unyum, im lep yin eri auanimtan irai mune: etmu eteuc nitai asjaaicnaig irai ohumia vai intas etipup unyak irai iji mesese.

¹⁴ Uhmu lep atipagki inhalav atamaig inig eri eti aperitome iran ehele ilpu etwan: et imipalea intas etipup unyak aien.

¹⁵ Is ika ehele Ebraham a Atua, Uhmu jim anvi nidai Sere ehgam mika Sere; inyi idan Sera.

¹⁶ Ekpu acis yi alwai yin ainyak, um lep alupai euc inhalav atamaig iran: maiya, ekpu acis yi alwai yin ainyak, etpu risi nup urai iji pece aien; erupu lep ahes ehelen a ilpu atimarid irai iji pece.

¹⁷ Is atpuse a Abraham um laav, um ika inliinmopon, Uhpu apos inhalav imi nyak um uauo, et mun eteuc inmesese et wun huntret irak? etpu asvalav a Sera um uauo, et mun eteuc inmesese et nainte iran?

¹⁸ Is ika a Ebraham ehele Atua, Ek merit ainyak mika yi umoh a Ismeel an nuhup unyum.

¹⁹ Is ika a Atua, Etpu idim apos inhalav atamaig imi euc a Sera ehgam; namu anvi nidan aiek par ika Aisak: ekpu ehneijid intas etipup unyak ainyak ehelen, im lep ehele ilpu mapon erupu epitpitac iran ara.

²⁰ Ek mun lep atahaijeg intas unyum ainyak vai Ismeel: Ek mun idim acis yi alwai yin ainyak, ekpu ika ainyak yi asvalav aien, erupu ahinag acen a ilpu mapon; erupu ahes ehelen a ilpu atimarid inyi twelv, erupu ahes ehelen natimi inyi ahanig.

²¹ Ja ekpu ati intas etipup unyak ainyak ehele Aisak, etpu apos yin a Sera imi euc an nopan inig an mesese iyek.

²² Is tas ehni ehele Ebraham a Atua, um udei yin um aridjai.

²³ Is leh Ismeel inhal o un a Ebraham, im lep ra asega eris apos ra an nimnim o un, im lep ra asega eris auarimtara irai mune, ilpu atamaig asega an nimnim o un; um aperitome ira ra an nadiat iyehki, is idivaig is asaig ehelen a Atua.

²⁴ Is mun eteuc inmesese is nainte nain irai Ebraham, an nopan iyehki eris aperitome iran.

²⁵ Is lep eteuc inmesese is dirtiin irai Ismeel inhal o un, an nopan iyehki eris aperitome iran.

²⁶ Eris aperitome irai Ebraham, im Ismeel inhal o un an nadiat iyehki.

²⁷ Eris ehras aperitome irai ilpu atamaig asega an nimnim o un, im ra eris apos ra an nimnim o un, im lep ra eris auarimtara imi nup urai taka pece.