Jenesis 15 - Intas Etipup

Nuarin tas alupas 15.

1 Et tas upene ehele Ebram a Atua. 2 Et asan tas ehti a Ebram mika et ti inhal o un. 4 Et ika a Atua yi eteuc a inhal imi yin, inyi lep ahinag a ilpu mapon. 6 Er ika et atoh nedo o Ebram va nimiisjis ninveijec o un. 7 Et aketo a Atua um ika eri ohuun inpece Kenan a ilpu mapon, um lep ago aktit intas inig va nitai asjaaicnaig, 12 im nitai ahuumtidec.

¹ IS ti pan itac nitai iji igki ja is ehcohos pan a Ihova ehele Ebram an nahuumtidec vaig o un, um ika, Ak Ebram, namu jim imtitaig aiek: ekpu imiatamaig euc ainyak, um aru alupas imi euc.

² Is ika a Ebram, Ak Ihova Atua unyak, napualupai nyak inhe aiek? et ti tah inhal unyak, et lep aheca esjilid unyak a Eliiser nup u Tamaskus?

³ Is ika a Ebram, As eti alupai nyak inhal unyak aiek: etpu idim isjeupigmoig nyak tah eris apos yin an nimnim unyak.

⁴ Is tas ehelen a Ihova, um ika, Inyi eti isjeupigmoig euc aien; ja etpu isjeupigmoig euc a inhal unyum.

⁵ Is imiapan itac yin aien, um ika, Namu iasji pan aiek an nohatag um esvi moijeuv, el et emda aiek par esvi: is lep ika ehelen aien, Erupu idim uco a ilpu mapom.

⁶ Is ateuc an tas o Ihova a Ebram; va nitai inigki is ika aien is atoh nedo o un.

⁷ Is ika ehelen aien, Ek Ihova ainyak, kis atipagki euc Ur ainyak an pece Kaltia, par alupai euc inpece inigki mika an ohuun aiek.

⁸ Is ika aien, Ak Atua Natimarid unyak, ekpu ehvato ainyak mika ki ohuun ainyak?

⁹ Is ika ehelen aien, Namu leh kurimatau atahig inyi ethi aiek is dri inmesese iran, im nanin atahig inyi ethi is dri inmesese iran, im siip atamaig inyi ethi is dri inmesese iran, im nucip inyi ethi, im nalaupa inyi ethi, um ahlap iran vai nyak.

¹⁰ Is lucsei nitai iji igki asega aien, um ahtakoai, um atetwan nahaijin im lep nahaijin: jam eti ahtakoai inman.

¹¹ Eris aese inman u itai iji igki, ja is ahre ra a Ebram.

¹² Is wat ete nagesega, is umjeg asega a Ebram; is ehioehio alupas inliinmopon aien, is esjilid napat iran.

¹³ Is ika ehele Ebram aien, Et idim inveijec inig mika, erupu tak atimi a ilpu mapom an pece yi ethi eri eti ohuun ara, um aheca ura; erupu ehcerucai ra ara irai mesese inyi for huntret;

¹⁴ ekpu lep aru nedo has u nup uran pece iyehki ainyak erupu aheca ura ara: ja erupu ahes eahki ara um lucsei padiaig inyi ahinag.

¹⁵ Ja napu tup eklim apau ehele ilpu retpom aiek, ja uhpu atelmoi euc an nopan nefatimi unyum.

¹⁶ Ja etu wit ti pan itac inmesese inyi for huntret, erupu lep ham igcaki a ilpu mapom: era pam eti ago ehni nedo has ura a nup Emor an nopan inig.

¹⁷ Is wat ete nagesega um apat, is atga an niblai uari itai iji ehki nadran cap im namilan cap.

¹⁸ Is lep asan tas etipup a Ihova ehele Ebram, um ika, Ek mun alupai ilpu mapom ainyak inpece inigki, et ahes u nofowai Ijipt, um yetpan u nofowai alupas Yufretes:

¹⁹ inpece u nup u Kinai, im nup u Kinis, im nup u Katmon,

²⁰ im nup u Hed, im nup u Piris, im nup u Rifa,

²¹ im nup Emor, im nup u Kenan, im nup u Circas, im nup u Jibus.