Jenesis 12 - Intas Etipup

Nuarin tas alupas 12.

1 Et imiacaij Ebram a Atua um asan tas acis yi alwai yin, um asaig intas upyi asaig ehelen vai Kristo. 4 Et udei Heran aien im lep Lot. 6 Et apaahni an pece Kenan aien. 7 Et wat ahuumtidec aien, et ika a Atua ehelen yi ohuun inpece inigki. 10 Et apan an pece Ijipt aien va numleg has. 11 Et imtita atimi aien um ika et atahig iran a ehgan. 14 Et leh yin a Fero, ja et lep imiadumoij pan yin va nemehe esjilid.

¹ IS ika a Ihova ehele Ebram, Namu udei inpece unyum aiek, im ilpu atimi ehpan iram, im nimnim u etmam, um apan an pece inig ekpu asaig ehelum ainyak:

² erupu ahes ehelum a nup uran pece alupas; ekpu acis yi alwai euc ainyak, um imiaridjai nidam; erupu ahesmoij vai euc natimi:

³ ekpu acis yi alwai ra sji igki ainyak era acis yi alwai euc ara, um ahlaijai ra sji igki era ahlaijai euc ara: erupu ahesmoij vai euc a nup uran nobohtan asega.

⁴ Is atga o un a Ebram, is idivaig intas o Ihova ehelen; is lep ahced yin a Lot: is sevente faiv inmesese irai Ebram an nopan iyehki is ahes Heran aien um atga o un.

⁵ Is leh Sere ehgan a Ebram, im Lot inhal u etwan, im inpadiaig asega urau erus ikni arau, im ilpu aheca urau erus lucsei Heran arau; eris ahes eahki ara par apan an pece Kenan; eris yetpan an pece Kenan ara.

⁶ Is apaahni an pece a Ebram um yetpan Saikem, an nuarin marara Mori. Eris amen an pece a nup u Kenan an nopan iyehki.

⁷ Is ehcohos a Ihova ehele Ebram, um ika, Ekpu alupai ilpu mapom inpece inigki ainyak: is actaig natau eahki aien imi Ihova, is ehcohos ehelen aien.

⁸ Is ahes eahki aien um apan an nedoon is ethi an nahaijin Bedel an ridjai o un, um ago neom o un, is eteuc Bedel an nete o un im Eai an ridjai o un: is actaig natau eahki aien imi Ihova, um arohwai nidai Ihova.

⁹ Is lep atga a Ebram nalaig apan an nuarin inig et ahes nuritoga iran.

¹⁰ Is eteuc numlaig has an pece: is asuol an pece Ijipt a Ebram par amen eahki; is idim esjilid numlaig has an pece.

¹¹ Is wat ubutpotet pan Ijipt aien, is ika ehele Sere ehgan aien, Ek idim ato ainyak, nikavaig, na takata eklim upene aiek:

¹² va nitai inigki eru wit ecet euc a nup Ijipt, erupu ika ara, Ehgan nigki: erupu atgei nyak ara, jam imiatamaig euc.

¹³ Ek ugyi euc ainyak mika, napu ika aiek, na atahig irak aiek: va ekpu amen upene ainyak vai euc; ekpu lep umoh ainyak vai euc.

¹⁴ Is yetpan an pece Ijipt a Ebram, ja eris ecet ehgan a nup Ijipt mika is eklim upene aien.

¹⁵ Eris lep ecet yin a ilpu atimi alupas u Fero, um imiahpas yin an nuhup u Fero: eris imiapan yin an nimnim u Fero.

¹⁶ Is aiheuc vai Ebram aien vai ehgan: is eteuc ehelen siip, im kurimatau, im togke atamaig, im ilpu aheca atamaig, im ilpu aheca atahig, im togke atahig, im kamela.

¹⁷ Ja is ati nemehe esjilid irai Fero a Ihova, im lep ira ra an nimnim o un vai Sere ehgai Ebram.

¹⁸ Is ahlaig vai Ebram a Fero, um ika, Inhe nigki na mun ago aiek vai nyak? na a uri aiek par eti asaig ehelek mika et ehgam aien?

¹⁹ As a uri aiek par ika, Et atahig irak aien? va nedo inigki kis ika ainyak ki leh yin ehgak: ehgam ap igki, leh yin aiek, um atga unyum.

²⁰ Is asan tas alep vai yin a Fero ehele ilpu atimi o un: eris abrai yin ara mika yi atga o un aien, im ehgan, im niji itai asega o un.