Jakobus 5 - Intas Etipup

Nuarin-tas alupas 5.

¹ IM lep ineig, ak ilpu atimi ikni itai, akumu ehteigtaig aijaua um aunyauwaig, va nohocred etpu yetpam iramia.

² Et muttit inpadiaig unyimia, et lep ages niji apelumai unyimia.

³ Et epera colt im silver unyimia; et itai asuptecnaig vai caua nepera iran, etpu caig nohumia et idivaig incop. Akis ikni itai aijaua ira adiat apitac.

⁴ Et idim ahlaig ijinies nimtan imi ilpu atimi auritai, eris asjapicnai nohoai itai umamia, ja akis imyiaaij aijaua an nedo efaifa: et yetpan nahlaig u ilpu atimi asjapicnai nohoan an tikgai Natimarid ineig et esjilid acen aien.

⁵ Akis umumoh upene an nobohtan aijaua, um acitak; akis alaamia aijaua et idivaig niji itai umumoh an nadiat atgei ra iran.

⁶ Akis ika aijaua eri atgei natimi atoh nedo o un, um lep atgei yin; et eti lep ahcadai caua aien.

⁷ Va nitai ineigki, ak ilpu etoak, akumu ago nedo eti auatiemda aijaua, um yetpan an nehcohos pam u Natimarid. Almoi natimi ahapol, et imyialep nohoai itai upene an nobohtan aien, um aitgaig nitu iran vaig, um imyihum pan an naopan iyehki, et leh incaupda uhup im incaupda apitac.

⁸ Akumu lep ago nedo eti auatitiemda aijaua; etmu emda inliinmopomia aijaua: et idim ubutpotet napam u Natimarid.

⁹ Akumu jim ulikulik jipe vai caua aijaua, ak ilpu etoak, va uhpu eti asaig nimtan imi caua: et idim aiji an neucse neom a Natimi asaig nimtan.

¹⁰ Ak ilpu etoak, akumu aktaktai ilpu profeta aijaua, eris tas ara an nidai Natimarid, era atimi asjaaicnaig imi caua ara an leucsevaig nohocred, im lep an nedo eti auatiemda.

¹¹ Inta idim ika akaija era mun ahesmoij ara era eti auatiemda ara. Akis atahaijeg aijaua va nedo eti auatiemda u Job, um ato nedo o Natimarid vai yin; et idim eropse inliinmopoi Natimarid, um esjilid naiheuc o un.

¹² Ja et esjilid nitai ineigki, ak ilpu etoak, akumu jim tas atcinuhri aijaua, jim tas atcinuhri va nohatag, ka nobohtan, ka tah nitai et eche: akumu maiya ache aijaua, um oʼo ache; va uhpu eti asaig nimtan imi caua.

¹³ Et wit ohocred tah iramia, etmu alaigaheni aien. Et wit imyiacitak tah, etmu acesaces ohraiitai aien.

¹⁴ Et wit emehe tah iramia, etmu ahlaig vai ilpu atimi tas alep an nakalasia aien; erumu aspi yin ara an narakei an nidai Natimarid, um alaigaheni vai yin:

¹⁵ etpu umoh a natimi emehe va nalaigaheni et ahes anliinmopura imyiisjis ninivaijec, etpu imyiatidai yin a Natimarid; el is ago nedo has aien, uhpu eti aru iran.

¹⁶ Akumu asuptecnaig jipe nedo has unyimia vai caua aijaua, um alaigaheni jipe vai caua, mika aki cehcehe aijaua. Et upene acen nalaigaheni emda u natimi atoh nedo o un.

¹⁷ Is atimi et idivai caija a Elaija, ja is alaigaheni emda aien mika yi jim ehe: is idim eti ehe an nobohtan an mesese is eseij im inmohoc is siks:

¹⁸ is lep alaigaheni aien, ja is par ahes incaupda an nohatag, is um ededel itai an nobohtan.

¹⁹ AK ilpu etoak, el et adumoij an tas inivaijec tah iramia, um lep imyiadumoij yin tah;

²⁰ etmu ato aien, nikavaig, aien et imyiadumoij tah natimi auatatimi an nefalaig has o un aien, et imyiatamaig natimi et ethi vai inmas aien, et lep adahpoi nedo has et ahinag o un aien.