Jakobus 5 - Intas EtipupNuarin-tas alupas 5. 1 IM lep ineig, ak ilpu atimi ikni itai, akumu ehteigtaig aijaua um aunyauwaig, va nohocred etpu yetpam iramia. 2 Et muttit inpadiaig unyimia, et lep ages niji apelumai unyimia. 3 Et epera colt im silver unyimia; et itai asuptecnaig vai caua nepera iran, etpu caig nohumia et idivaig incop. Akis ikni itai aijaua ira adiat apitac. 4 Et idim ahlaig ijinies nimtan imi ilpu atimi auritai, eris asjapicnai nohoai itai umamia, ja akis imyiaaij aijaua an nedo efaifa: et yetpan nahlaig u ilpu atimi asjapicnai nohoan an tikgai Natimarid ineig et esjilid acen aien. 5 Akis umumoh upene an nobohtan aijaua, um acitak; akis alaamia aijaua et idivaig niji itai umumoh an nadiat atgei ra iran. 6 Akis ika aijaua eri atgei natimi atoh nedo o un, um lep atgei yin; et eti lep ahcadai caua aien. 7 Va nitai ineigki, ak ilpu etoak, akumu ago nedo eti auatiemda aijaua, um yetpan an nehcohos pam u Natimarid. Almoi natimi ahapol, et imyialep nohoai itai upene an nobohtan aien, um aitgaig nitu iran vaig, um imyihum pan an naopan iyehki, et leh incaupda uhup im incaupda apitac. 8 Akumu lep ago nedo eti auatitiemda aijaua; etmu emda inliinmopomia aijaua: et idim ubutpotet napam u Natimarid. 9 Akumu jim ulikulik jipe vai caua aijaua, ak ilpu etoak, va uhpu eti asaig nimtan imi caua: et idim aiji an neucse neom a Natimi asaig nimtan. 10 Ak ilpu etoak, akumu aktaktai ilpu profeta aijaua, eris tas ara an nidai Natimarid, era atimi asjaaicnaig imi caua ara an leucsevaig nohocred, im lep an nedo eti auatiemda. 11 Inta idim ika akaija era mun ahesmoij ara era eti auatiemda ara. Akis atahaijeg aijaua va nedo eti auatiemda u Job, um ato nedo o Natimarid vai yin; et idim eropse inliinmopoi Natimarid, um esjilid naiheuc o un. 12 Ja et esjilid nitai ineigki, ak ilpu etoak, akumu jim tas atcinuhri aijaua, jim tas atcinuhri va nohatag, ka nobohtan, ka tah nitai et eche: akumu maiya ache aijaua, um oʼo ache; va uhpu eti asaig nimtan imi caua. 13 Et wit ohocred tah iramia, etmu alaigaheni aien. Et wit imyiacitak tah, etmu acesaces ohraiitai aien. 14 Et wit emehe tah iramia, etmu ahlaig vai ilpu atimi tas alep an nakalasia aien; erumu aspi yin ara an narakei an nidai Natimarid, um alaigaheni vai yin: 15 etpu umoh a natimi emehe va nalaigaheni et ahes anliinmopura imyiisjis ninivaijec, etpu imyiatidai yin a Natimarid; el is ago nedo has aien, uhpu eti aru iran. 16 Akumu asuptecnaig jipe nedo has unyimia vai caua aijaua, um alaigaheni jipe vai caua, mika aki cehcehe aijaua. Et upene acen nalaigaheni emda u natimi atoh nedo o un. 17 Is atimi et idivai caija a Elaija, ja is alaigaheni emda aien mika yi jim ehe: is idim eti ehe an nobohtan an mesese is eseij im inmohoc is siks: 18 is lep alaigaheni aien, ja is par ahes incaupda an nohatag, is um ededel itai an nobohtan. 19 AK ilpu etoak, el et adumoij an tas inivaijec tah iramia, um lep imyiadumoij yin tah; 20 etmu ato aien, nikavaig, aien et imyiadumoij tah natimi auatatimi an nefalaig has o un aien, et imyiatamaig natimi et ethi vai inmas aien, et lep adahpoi nedo has et ahinag o un aien. |
Vanuatu Bible (Intas Etipup) © United Bible Societies, 1863, 2019.
United Bible Societies