Jakobus 4 - Intas Etipup

Nuarin-tas alupas 4.

¹ ET ahes anhe nimyiisjis itai im nehtauo unyimia? et idim ahes irai merit has iji eigki unyimia, et ago nedoa iraili uari-ohumia.

² Eka merit vai itai aijaua, jam eti leh: eka atgei atmas aijaua, um auatitai, ja et ehka inlehvaig: eka ehtauo aijaua, um imyiisjis itai, jam eti leh itai, va nitai ineig, nikavaig, eka eti ugni aijaua.

³ Eka ugni itai aijaua, jam eti leh, va nitai ineig, nikavaig, eka ugni has aijaua, mika aki eduoraprap aijaua irai merit has unyimia.

⁴ Ak ilpu atamaig im ilpu takata ago ingaijid, eka idim ato aijaua, nikavaig, nedemda vai Atua neigki, naiyu u inliinmopja va nobohtan; aien et ika aien yi aiyu inliinmopon va nobohtan, et atimi tak atimi vai Atua aien.

⁵ Akumu jim ika aijaua, et takitai intas eris aged; Et idim oporei a Nesgan Upene ineig et amen eheleija aien.

⁶ Ja et alupai caija naiheuc esjilid aien. Va nitai ineigki et ika aien, “Et ahcadai ilpu atimi et ijinies inliinmopura ara a Atua, ja et alupai ilpu atimi upoupo naiheuc o un aien.”

⁷ Va nitai ineigki akumu upoupo irai Atua aijaua. Ahcadai Tiapolo aijaua, etpu lep aha vai caua aien.

⁸ Akumu apan ubutpotet ehele Atua aijaua, etpu lep apam ubutpotet ehelemia aien. Akumu ahisjum aijaua, ak ilpu atimi auatatimi; akumu lep ago adicinadicin inliinmopomia aijaua, ak ilpu atimi ero inliinmopomia.

⁹ Akumu ohocred aijaua, um taigtaig, um ehteigtaig: etmu isjipigmoig inlaav unyimia intaigtaig, etmu lep isjipigmoig nimyiacitak unyimia nohocred.

¹⁰ Ago nedo upoupo aijaua an nuhup u Natimarid, etpu lep atijai caua aien.

¹¹ Jim tas has jipe vai caua, ak Upu etoak. Aien et tas has vai etoan aien, um aktaktai has vai etoan, et tas has vai intas alep aien, um aktaktai has vai intas alep; ja el et aktaktai has aiek vai intas alep, na eti atimi imyiaiji intas alep aiek, jam atimi aktaktai vaig.

¹² Et eteuc Natimi tas alep et ethi, et emda aien par imyiatamaig atimi um lep auahas ra: aiek di aigki na par aktaktai has vai intak atimi?

¹³ IM lep ineig, ak ilpu atimi iji eigki eka ika aijaua, Intupu apan akaija an tah anuarin-pece inpeig ka imraig, um amen eahki irai yiir et ethi, um auarimtai itai um ahtai itai, um leh inpadiaig;

¹⁴ eka eti ato aijaua nitai iji eigki etpu yetpam imraig: inhe numumoh unyimia? Et idim inmosso, et ehcohos ipjidipjid, ja pah ti.

¹⁵ Et upene vai caua nasaigvaig, um ika, El et ika a Natimarid, inti umumoh akaija, um ago nitai ineig, ka nitai inaico.

¹⁶ Ja an naopan ineig eka imyiacitak tas ijinies unyimia aijaua: et has nimyiacitak asega et idivaig ineig.

¹⁷ Va nitai ineigki, el et ato tah nagovaig nedo upene, jam eti ago, et has nedo o un.