Jakobus 3 - Intas Etipup

Nuarin-tas alupas 3.

¹ AK ilpu etoak, akumu jim ilpu atimi esege inyi ahinag aijaua, eka idim ato aijaua mika, etpu esjilid neruvaig imi caija.

² Inta ahnag akaija asega an niji itai et ahinag. El et eti ahnag tah natimi an tas o un, et upene asega natimi ineigki, um lep emda par acaiji nohun asega.

³ Inta ikni itai aces yi aijiraig irai ipjieucse hors akaija, mika eri imyiaiji caija; inta lep ahida nohura asega akaija.

⁴ Akumu lep almoi nelcau aijaua, et alupas acen, et lep ahtalekraig nimtinjop alupas, ja er aparaig an nehev tintin an nuarin ineig et merit vaig a natimi apos.

⁵ Et um ucco, et uarin-nohuja tintin namaija, ja et tas ijinies acen. Et idim atni nesei alupas incop tintin!

⁶ et incop namaija, um esjilid acen nauatatimi o un: et um ucco, et amen namaija irai uari-ohuja, um auahas nohuja asega, um lep atni niji itai asega; eh lep atni nitai ineig an cop an pece has.

⁷ Era eti aaij niji obotpot itai asega, nikavaig, niji itai aleg, im niji man, im niji imyiv, im niji itai amen an jop, era idim eti aaij ara va atimi.

⁸ Ja et ehka vaig tah natimi nacaijivaig nama atimi, nitai has neigki et ehka nacaijivaig, et lep ohua iran nitai acen ineig eh mas vaig.

⁹ Inta asan tas upene vai Atua Etmaija iran akaija; inta lep asan tas has va atimi iran akaija, is ago ra a Atua an nalmun.

¹⁰ Et ahes an nipjineucsen et ethi intas upene im intas has. Ak ilpu etoak, eris idim ika yi jim ucce nitai iji eigki.

¹¹ Et eti ahlau ohua nimtan-wai inwai aiyu im inwai acen an munwai et ethi.

¹² Ak ilpu etoak, et ehka va nateg nohovaig um ohoai oliv, um lep ehka va vaine nohovaig um ohoai ateg; et um ucco, et ehka nahlau ohua vaig inwai acen im inwai aiyu an nimtan-wai et ethi.

¹³ Natimi arapakau im natimi ato itai iramia a di? etmu ehvaig nauritai o un aien an nedo upene o un anliinmopon eropse um arapakau.

¹⁴ Ja el et amen nauatitai has irai liimopomia imyiisjis itai; akumu jim tas emda aijaua, um jim ahcil vai intas inivaijec.

¹⁵ Et eti ahes an nohatag narapakau ineig, ja et ahes an nobohtan, im inliinmopja itu, im ilpu agelo has.

¹⁶ Et amen nehtauo im nauritai has asega an nuarin ineig er auatitai um imyiisjis itai iran.

¹⁷ Ja et uhup um upene narapakau ineig et ahes an nohatag, um lep eigpa, um erop, um eti imyiisjis itai, um ohua va naiheuc va atimi, um ohoai itai upene, um eti ago nedo acheiachei va atimi, um eti efaifa.

¹⁸ Era ahoaig nohoan nedo atoh an neigpa a ilpu atimi ago nedo eigpa.