Jakobus 2 - Intas Etipup

Nuarin-tas alupas 2.

¹ AK ilpu etoak, akumu apol an nimyiisjis ninivaijec u Iesu Kristo Natimarid esjilid uja aijaua, jam jim ago nedo acheiachei va atimi.

² El et apam an nasjapicnaig unyimia tah natimi et amen iran nitai ethado colt, im napelumai esjilid; um lep ham tah nihki natimi et aso yin ira apelumai has:

³ el eka ago nedo eccen aijaua vai yin et aso yin ira apelumai upene, um ika ehelen, Ateucse aiek igcaki an nuarin upene; um lep ika ehele nihki natimi, Aiji aiek eagko, ka, Ateucse aiek igcaki u nitai atijai neduok iran:

⁴ eka idim imyiisjis nahcil anliinmopomia aijaua, eka atimi aktaktai maumau aijaua an nasuptecnaigvaig nimtan unyimia.

⁵ Akumu atahaijeg aijaua, ak ilpu etoak upene, is idim ehtai ilpu ihki atimi iji eigki an nobohtan ineigki a Atua, era esjilid ara an nimyiisjis ninivaijec ura, um lep ohuun nelcau ineig is upyi asaig aien ehele ra et aiyu inliinmopura ara vai yin.

⁶ Ja eka amcel vai ilpu ihki atimi aijaua. Era idim auaohocred caua a ilpu atimi ikni itai, um aihiaig pan caua irai iji uarin eh tas alep iran:

⁷ era lep asan tas itaup ara va nidan upene ineig er anvi nidamia iran.

⁸ El eka imyiaiji intas alep esjilid aijaua, et idivaig eris aged, um ika, “Etmu aiyu inliinmopom aiek va atimi eblaamnem unyum, et idivaig naiyu u inliinmopom vai euc,” el et upene nedo unyimia:

⁹ ja el eka ago nedo acheiachei va atimi aijaua, el eka ago nedo has aijaua, eh lep ated caua an tas alep, et idivai ilpu atimi auatatimi.

¹⁰ Aien et imyiaiji intas alep asega aien, jam imyipalea et ethi ache, uhpu aru iran et idivaig asega.

¹¹ Aien is ika aien, “Jim ago ingaijid,” is lep ika aien, “Jim atgei atmas.” Ja el et eti ago ingaijid aiek, jam atgei atmas, na atimi imyipalea intas alep aiek.

¹² Etmu ucce intas unyimia, im nedo unyimia, et idivai ra uhpu asaig nimtan imi ra an tas alep ineig et ahiyi atimi.

¹³ Aien is eti aiheuc va atimi aien, uhpu aru iran, jam eti aiheuc vai yin; et lep tas emda naiheuc va atimi va neruvaig.

¹⁴ Ak ilpu etoak, et eti upene vaig tah natimi par ika, Ek imyiisjis ninivaijec ainyak, jam eti auritai; et eti emda nimyiisjis ninivaijec iyehki par imyiatamaig yin.

¹⁵ El et ti napelumai o un tah etoamia ka natahaig iramia, um ti nitai caig incara irai iji adiat;

¹⁶ el et ika tah iramia ehele ra, Atga unyimia aijaua an neigpa, akumu ehehtin aijaua um gaije; jam eti alupai ra nitai iji eigki et upene va nohura; el et eti upene.

¹⁷ Et idim ucco nimyiisjis ninivaijec unyimia, el et eti auritai, et idim mas, et tup echim eteuc.

¹⁸ Ja kit etpu ika tah natimi, Na imyiisjis ninivaijec aiek, ja ek auritai ainyak: ehvaig ehelek aiek nimyiisjis ninivaijec unyum jam ti nauritai unyum, ekpu lep ehvaig ehelum ainyak nimyiisjis ninivaijec unyak an nauritai unyak.

¹⁹ Na imyiisjis ninivaijec aiek mika, et eteuc Atua et ethi ache; et upene nedo unyum: era lep imyiisjis ninivaijec a ilpu agelo has, um eucjucjucaij.

²⁰ Ak natimi ahnag, nai merit aiek natovaig mika, et mas nimyiisjis ninivaijec unyum et wat ti nauritai o un, ka oʼo?

²¹ Eris idim ika is atoh nedo o Ebraham etmaija va nauritai o un, is wat atijai Aisak inhal o un aien an nefata par ahlap iran.

²² Na ato aiek mika, is ehrauritai nimyiisjis ninivaijec o un, im nauritai o un; is lep upene asega nimyiisjis ninivaijec o un va nauritai o un:

²³ eris lep ehneijid Intas eris aged, um ika, “Is imyiisjis ninivaijec Atua a Ebraham, eris lep ati imi yin nika ineig o Atua et atoh nedo o un:” eris anvi nidan par ika natimi ineig et almuktit yin a Atua.

²⁴ Eka almoi aijaua mika, er ika et atoh nedo o atimi va nauritai ura, jam eti va nimyiisjis ninivaijec ura ache.

²⁵ Eris lep ika is idim atoh nedo o Rehab intakata ago ingaijid va nauritai o un, nikavaig, is leh ohwat atimi erahki aien eris abrai rau, um abraig pan rau an nefalaig is eche.

²⁶ Et idim mas nohuja, et wat ti nesgaija iran; et idim ucco, et lep mas nimyiisjis ninivaijec uja, et wat ti nauritai.