Ilpu Hibru 9 - Intas Etipup

Nuarin-tas alupas 9.

¹ ET inivaijec ineig, is eteuc niji auritai an nalaigaheni vai intas-etipup uhup, um lep neom itaup an nobohtan;

² eris ago neom ahlap, um ehtipenes; is amen an nilpun neom uhup lamp, im nitai hag, im nareto eris ahlap iran; is idan nilpun neom ineigki Nuarin Itaup.

³ Eris anvi nidan nilpun neom, anliin natcai apelumai an nidjin, mika Nuarin Itaup Esjilid;

⁴ is amen iran nefata colt eris atnamud nitai auanipin upene iran, im nelcau an tas-etipup, eris aso irai colt, is amen iran nipjicolt eris ati manna iran, im niseuc u Eron is ehcohos nerin, im inhat erahki u intas-etipup;

⁵ is amen ijinies Jerub is ero u natimi alupas u Atua, um adahpoi nuarin asan neigpa iran; et ehka nasuptecnaig upene vaig an naopan ineig.

⁶ Eris wat ago nitai iji eigki, eris apan a ilpu atimi ahlap an nilpun neom uhup irai iji adiat, um ago nauritai an nalaigaheni.

⁷ Ja is ehcethi apan a natimi esjilid an nahlap an nilpun neom itac irai iji mesese, aien ache, is apos inja aien, um ahlap vai yin, im lep vai edo has u atimi:

⁸ is asuptecnaig a Nesgan Upene an nedo ineig mika, eris eti ehvaig upene nefalaig apan an nuarin itaup, an naopan iyehki is wat eteuc neom alaigaheni uhup:

⁹ is almui itai neom iyehki an naopan iyehki, eris ahlap iran irai iji itai tup ahtai im niji itai ahlap; ja is auatialidi nitai iji eigki nago upene asega vaig inliinmopoi natimi ineig is ago nauritai iji eigki aien.

¹⁰ Eris ago nedo ineigki an nitai caig, im nitai umnyi, im inyiri acheiachei, im nedo an nobohtan, eris ikni um uhum pan naopan iyehki uhpu lep ikni upene itai.

¹¹ Ja is ehcohos pam a Kristo natimi esjilid an naldap an nitai upene iji eigki etpu yetpam, is apan aien an neom alaigaheni alupas, um esjilid iran yehki, eris eti ago irai ikma atimi, nesgan tas neigki, eris eti ago an nobohtan;

¹² is idim ehcethi apan aien an nuarin itaup, jam eti apan vai inja ira anin im inhakli kurimatau, ja vai inja iran, is leh nitai umoh iran neig aien inyi ti lep ti vai caija.

¹³ El et emda inja irai kurimatau atamaig im nanin, im nohpa irai kurimatau atahaig eris ohaig, par ago adicinadicin nohu atimi eti adicinadicin;

¹⁴ et idim esjilid inja irai Kristo, par ago adicinadicin inliinmopomia va nauritai mas vaig, mika aki aheca u Atua umoh aijaua: is ti nitai has iran, is ispun ahlap iran aien vai Atua irai Nesgan Upene ineig et amen irai iji mesese.

¹⁵ Va nitai ineig et atimi asan neigpa aien vai intas-etipup mat, is mas aien nitai ahlap va nedo has eris ago an naopan iyehki an namen u intas-etipup uhup, mika eri leh intas upyi asaig va niji itai upene inyi amen irai iji mesese ara er ahlaig vai ra.

¹⁶ (Et wit eteuc nitasvitai va niji itai etpu ohuun tah, eris idim ika inyi ti ipjin um yetpan an mas u natimi ineig uhpu isjipigmoig yin.

¹⁷ Eru wit emesmas atimi, et ipjin intas er aged va niji itai uhpu ohuun: ja et wat umoh a natimi ineig uhpu isjipigmoig yin, et eti ipjin.)

¹⁸ Et idim ucco, eris ago ipjin an ja intas-etipup uhup.

¹⁹ Is wat esvi intas asega o Atua a Moses ehele atimi asega, et idivaig intas alep, is leh inja irai kurimatau atamaig im nanin aicn, im inwai, im nalau irai siip, is cop, im hissop, um ohaig an nitasvitai im lep ira atimi asega,

²⁰ um ika, “Inja neigki vai intas-etipup is ati ehelemia a Atua.”

²¹ Is idim lep ucco, is lep ohan ja an neom alaigaheni aien, im nipjiitai asega er ago itai iran.

²² Er ago adicinadicin niji ubutpotet u itai asega an ja, et idivaig intas alep; el eh eti atladwi inja, el eh eti atipagki nedo has.

²³ Eris idim ika eri ago adicinadicin nalmu itai an nohatag va nitai ahlap iji eigki; jai niji itai an nohatag irai iji itai ahlap esjilid iran ji eigki.

²⁴ Et eti apan a Kristo an nuarin itaup eris ago irai ikma atimi, um lep idiva neom inivaijec; ja is idim apan aien an nohatag, mika yi ehcohos pan an nuhup u Atua vai caija an naopan ineig:

²⁵ inyi ti lep ehcahinag ahlap iran aien, um idivaig natimi esjilid an nahlap, et apan aien an nuarin itaup irai iji mesese, um apos inja irai itai et eche;

²⁶ el is ucce, el is idim ehcahinag mas aien an naopan iyehki eris ati nobohtan um imyihum pain naopan ineig: ja is idim ehcethi ehcohos pam aien an nehni u itai, mika yi atipagki nedo has an nitai ahlap o un.

²⁷ Eris idim asaig mika eri ehcethi emesmas atimi, ja par apitac nasuptecnaigvaig nimtan imi ra;

²⁸ et idim ucco, eris ehcethi ahlap irai Kristo, mika yi leucse nimtan nedo has u atimi is ahinag aien, ja etpu lep aketo aien um ehcohos pam ehele ra era aitgai yin ara par imyiatamaig ra, ja inyi ti eteuc nedo has iran.