Ilpu Hibru 8 - Intas Etipup

Nuarin-tas alupas 8.

¹ NOHUUN tas iji eigki kis asuptecnaig ainyak neigki, nikavaig: Et eteuc a natimi esjilid an nahlap uja ineig, et ateucse aien u dorona u Natimarid an matan an nohatag;

² et aheca aien an nuarin itaup, im neom alaigaheni inivaijec ineig is ati a Natimarid, eris eti ti atimi.

³ Er ikni ilpu atimi esjilid an nahlap asega, mika eri ahlap ara irai iji itai tup ahtai im niji itai ahlap: va nitai ineigki et lep upene va natimi ineigki nahlapvaig an tah nitai.

⁴ Ja el et amen aien an nobohtan, el et eti atimi ahlap aien, era eteuc a ilpu atimi ahlap era ahlap ara irai iji itai tup ahtai et idivaig intas alep:

⁵ era aheca ara irai itai iji eigki, et itai asjaaicnaig irai iji itai an nohatag um almun, et idivaig is asaig a Atua ehele Moses an naopan iyehki is ika aien yi ago neom alaigaheni: is idim ika aien, “Almoi aiek, um ago niji itai asega et idivaig nitai asjaaicnaig iyehki as almoi aiek an lolan nedoon.”

⁶ Et idim ucco, et esjilid nauritai o un, et idim atimi asan neigpa aien vai intas-etipup ineig et esjilid iran yehki, um lep amen aktit irai tas upyi asaig et esjilid iran ji ehki.

⁷ El is upene asega intas-etipup iyehki is uhup, el is eti eteuc ineigki et apitac.

⁸ Ja is acaiji ra aien, um ika, “Et ika a Ihova, Etpu yetpam naopan iyehki, ekpu ati intas-etipup mat ainyak imi nupu Isreel im nupu Juta:

⁹ inyi ti idivaig intas-etipup iyehki, kis ati ainyak ehele ilpu retpora, an naopan iyehki kis asjiraig nikmara ainyak, um iknipagki ra an pece Ijipt; eris eti apos intas-etipup unyak ara, kis lep eti aktaktai ra ainyak, et idim ucco intas o Ihova.

¹⁰ Et lep asaig a Ihova, um ika, Et wit ti pan itac nadiat iji ehki, ekpu ati intas-etipup ineigki imi nupu Isreel ainyak; Ekpu ikni intas alep unyak ainyak irai esgara, um lep aged irai liimopura; ekpu Atua ura ainyak, erupu lep ilpu atimi unyak ara:

¹¹ eri eti esege imi ilpu atimi eblaamnem ura natimi asega, um eti lep esege imi ilpu etoara natimi asega, um ika, Akumu ato Ihova aijaua: erupu ato nyak ara asega, ilpu atimi alupas im lep tup atimi.

¹² Ekpu idim aiheuc vai ra ainyak vai edo acalacal ura, um eti lep imyiehva edo has ura im nauatatimi urk.”

¹³ Is wat ika aien, “Intas-etipup mat,” is ika aien is itu iyehki is uhup: nitai ineig itu et mun muttit, et eti laulau um tup ti ehpan.