Ilpu Hibru 7 - Intas Etipup

Nuarin-tas alupas 7.

¹ IS atimarid Selem a Melkisetek ineigki, um atimi ahlap vai Atua esjilid acen; is aubillid Ebraham aien an nahes u natgei ilpu atimarid iji ehki o un, um asan tas upene vai yin;

² is um alupai yin nuarin itai is ethi irai ten a Ebraham irai iji itai asega: nesgan tas uhup an nidan ineigki Natimarid an nedo atoh, et lep Atimarid Selem aien, nesgan tas ineigki Natimarid an neigpa;

³ is ti etman, um ti risin, um ti ilpu retpon; is ti nadiat apos yin iran, um ti nadiat mas iran; is idivai Inhal o Atua aien; et lep atimi ahlap aien irai iji mesese.

⁴ Akumu aktaktai natimi alupas u natimi ineigki aijaua, is alupai yin nuarin itai is ethi irai ten a etpoija Ebraham ira aga iji ehki eris atoraliak.

⁵ Eris idim asaig ehele atimi iji eig irai ilpu mapoi Livai, eris ikni ra ilpu atimi ahlap, mika eri leucse nuarin itai inyi ethi irai ten ehele atimi, et idivaig intas alep; ilpu etoara marom era idim ahes ehele nohui Ebraham ara:

⁶ ja aien is eti ahes ehele ra aien, is leucse nuarin itai is ethi irai ten aien ehele Ebraham, um asan tas upene vai yin eris asan tas upyi asaig ehelen.

⁷ Et idim inivaijec neig, nikavaig, et asan tas upene va natimi upoupo a natimi ineig et esjilid iran aien.

⁸ Et idim ucco, era leucse nuarin itai et ethi irai ten atimi eri emesmas ara, ja et idim leucse aien, era ika ara vai yin, et umoh aien.

⁹ Ek lep asan tas ineigki ainyak vai ilpu mapoi Livai, era leucse nuarin itai et ethi irai ten ara, ja eris alupai yin nuarin itai is ethi irai ten ara vai Ebraham.

¹⁰ Eris amen an nohui etmara ara an naopan iyehki is aubillid yin a Melkisetek.

¹¹ El eris upene asega natimi va naldap u ilpu mapoi Livai, eris idim leh intas alep atimi an namen ura, el is eti upene mika yi atidai natimi ahlap is eche, “et idivaig nati Melkisetek,” jam eti idivaig nati Eron an nanvi nidan.

¹² Eris eche a ilpu atimi ahlap, va nitai ineigki eris idim lep ika yi eche intas alep.

¹³ Aien er asuptecnaig nitai iji eigki vai yin, et mapoi intak atimi aien, natimi ineig marom is eti aiji u natau tah irai ilpu mapon.

¹⁴ Er idim ato mika, is ahes ehele Juta a Natimarid uja; is eti asuptecnaig tah nitai a Moses vai ilpu mapon, mika eri ilpu atimi ahlap ara.

¹⁵ Ja er idim ato upene, nikavaig, et atidai natimi ahlap et eche et idivaig nati Melkisetek,

¹⁶ eris eti ati yin vai intas alep an nohohtan, ja va nemda u nitai umoh iran ineig inyi ti lep ti.

¹⁷ Et asaig aien, um ika, “Napu atimi ahlap aiek irai iji mesese, um idivaig nati Melkisetek.”

¹⁸ Er idim atipagki intas alep uhup, va nitai ineig, nikavaig, is auatialidi, um takitai.

¹⁹ Is eti upene asega tah nitai vai intas alep, ja eris atupun nitai esjilid ineig inta aitgaig akaija; inta apan ehele Atua vaig akaija.

²⁰ Im lep ineig, eris asig yi aktit intas vai yin, mika yi atimi ahlap aien:

²¹ eris ikni ilpu atimi ahlap iji ehki, jam eti asig yi aktit intas vai ra; ja is asig yi aktit intas va natimi ineigki aien is ika ehelen aien, “Is asig yi aktit intas a Ihova, ja etpu ti lep eche inliinmopon aien,” um ika, “Napu atimi ahlap aiek irai iji mesese, um idivaig nati Melkisetek:”

²² et idim ucco, eris ati Iesu, mika yi apos intas-etipup ineig aien, et esjilid iran yehki.

²³ Im lep ineig, eris ahinag a ilpu atimi ahlap iji ehki, va nitai ineig, nikavaig, is ehka vai ra namenvaig vai inmas ura:

²⁴ ja inyi ti lep isjipigmoig natimi ineig tah an nahlap o un, va nitai ineig, nikavaig, inyi amen aien irai iji mesese.

²⁵ Va nitai ineigki et lep emda aien par imyiatamaig ehni ra sji eigki era apan ehele Atua ara vai yin, et idim umoh aien irai iji mesese par imyiahras ra.

²⁶ Et upene vai caija natimi esjilid an nahlap ineigki et upene aien, um eigpa nedo o un, um ti nitai has iran, um eti amen ehele ilpu atimi auatatimi, et lep aridjai an nohatag aien ijinies acen;

²⁷ et eti idivai ilpu atimi esjilid an nahlap iji eigki aien, eris idim ika eri ahlap irai iji adiat ara, jam uhup um ahlap va nedo has ura, ja par apitac um ahlap va nedo has u atimi: is echethi ahlap ache aien an naopan iyehki is ahtai yin aien.

²⁸ Er ikni atimi iji eig era auatialidi ara mika eri ilpu atimi esjilid an nahlap vai intas alep iyehki; ja er ati Inhal o Atua vai intas asig yi aktit et epitpitac an tas alep iyehki, et esjilid aien irai iji mesese.