Ilpu Hibru 5 - Intas Etipup

Nuarin-tas alupas 5.

¹ NATIMI esjilid an nahlap asega er ehtai ra ira atimi, er lep ikni ra va atimi an niji itai u Atua, mika eri ahlap ara an niji itai tup ahtai im niji itai ahlap vai edo has:

² et lep eti ehka vai ra par aiheuc vai ilpu atimi eti ato itai, im lep ra era ahnag ara, et idim arahed ira ra nauatialidi ura.

³ Va nitai ineig eris idim ika eri ahlap va nedo has u atimi, im lep ucce, va nedo has ura.

⁴ Et eti tup ispun atakoai nauritai upene ineigki tah, aien ache et aniv yin a Atua, is idivai Eron.

⁵ Et idim ucco, is eti ispun aktaktai a Kristo mika yi atimi esjilid an nahlap; ja aien ache, is ika ehelen aien, “Nai Hal unyak aiek, ek mun apos euc ainyak an nadiat ineigki.”

⁶ Is idim lep ika aien an nuarin-tas is eche, “Na atimi ahlap aiek irai iji mesese, um idivaig nati Melkisetek.”

⁷ Is wat amen aien an nobohtan, is alaigaheni aien, um ugni itai, um ahlaig ijinies, um taig, an nuhup o un is emda aien par imyiatamaig yin vai inmas o un, is atahaijeg yin aien va nedo eccen o un;

⁸ is idim Hal aien, ja eris esege imi yin par imyiaiji intas o un an nohocred o un;

⁹ is wat esjilid aien, is alupai ra sji eigki asega aien nitai umoh iran ineig inyi ti lep ti, era imyiaiji intas o un ara;

¹⁰ is anvi nidan a Atua par ika natimi esjilid an nahlap, um idivaig nati Melkisetek.

¹¹ Ek ika ainyak ki asuptecnaig niji itai et ahinag vai yin, ja et ehka nasaigvaig, va naupat u inliinmopomia.

¹² Eris idim ika eka ilpu atimi esege aijaua va namen unyimia um itu, ja et upene vai caua, mika yi lep esege imi caua tah niji itai uhup an tas o Atua: eka idivai ra sji eigki aijaua, et upene nidenided lumara, jam eti upene nitai caig incara.

¹³ Ara asega era ided ara, era eti ato nesege an nedo atoh ara; era ilpu hadi ara.

¹⁴ Ja et upene nitai caig incai ilpu atimi ohoigmetto, era imjijeuc ara va nedo ura an natovaig nitai upene im nitai has.