Ilpu Hibru 3 - Intas Etipup

Nuarin-tas alupas 3.

¹ AK ilpu etoak upene, eris imyiacaij caua u niji itai an nohatag, akumu aktaktai Iesu Kristo aijaua, Napostolo im Natimi esjilid an nahlap an nalaigaheni uja;

² is inivaijec aien ehelen is ati yin aien, et idivaig is inivaijec a Moses an neom asega o un.

³ Is idim esjilid aien irai Moses an natimi alupas o un, et idivaig et esjilid an neom a natimi ineig et ago neom aien.

⁴ Era ago sjipe niji eom asega atimi; ja aien is ago niji itai asega aien et Atua aien.

⁵ Is idim inivaijec a Moses an neom asega o un, is idivaig naheca o un par asuptecnaig nitai iji eigki uhpu asaig an tak aopan;

⁶ ja et idivaig Inhal o un a Kristo, um esjilid anneom o un; inta lep eom o un akaija, ele ta apol aktit akaija an tas emda, im nitai ineig inta aitgaig akaija um tas alupas vaig, um yetpan an nehni o un.

⁷ Va nitai ineigki et idivaig et ika a Nesgan Upene, “El eka atahaijeg intas o un aijaua an naopan ineig,

⁸ etmu jim ipjin inliinmopomia, et idivaig an nimyiisjis itai, an naopan iyehki marom eris ago nedo oop iran an namasacen:

⁹ eris ago nedo oop nyak eahki a ilpu retpomia, um imyipalea intas unyak, um almoi niji auritai unyak, irai mesese is forte:

¹⁰ kis edemda ainyak va atimi an naopan iyehki, um ika, Et ahnag inliinmopura ara irai iji adiat; era lep eti ato nedo unyak ara:

¹¹ va nitai ineigki kis asig yi aktit intas ainyak anj nedemda unyak, um ika, Eri eti apan ara an nuarin atumop unyak.”

¹² Ak ilpu etoak, akumu aminjinai caua aijaua, vai yi jim amen ehelen tah caua inliinmopon has, et imyiisjis nahcil, um ude Atua umoh.

¹³ Jam ated sjipe caua irai iji adiat, eh wat anvi nidan par ika, “An naopan ineig;” vai yi jim ipjin inliinmopon tah caua va nefaifa an nedo has o un.

¹⁴ Inta tup ethi pan irai Kristo akaija, ele ta apol aktit akaija an nimyiisjis ninivaijec uhup uja, um yetpan u nehni o un;

¹⁵ eris idim asaig, um ika, “El eka atahaijeg intas o un aijaua an naopan ineig, etmu jim ipjin inliinmopomia, et idivaig an nimyiisjis itai.”

¹⁶ Eris wat atahaijeg hal ra, eris imyiisjis itai ara, jam eti ara sji ehki asega is iknipagki ra an pece Ijipt a Moses.

¹⁷ Ja is edemda aien vai di irai mesese is forte? Vai ra sji ehki marom, eris ago nedo has ara, eris auahas nohura an namasacen.

¹⁸ Is lep asig yi aktit intas aien ehele di, mika eri eti apan ara an nuarin atumop o un? Ehele ra sji ehki marom, eris imyipalea ara.

¹⁹ Inta idim ato akaija mika, is ehka vai ra napanvaig iran va nimyiisjis nahcil ura.