Ilpu Hibru 13 - Intas Etipup

Nuarin-tas alupas 13.

¹ ETMU amen naiyu jipe u inliinmopomia aijaua vai caua, et idivai ilpu raimu.

² Jim ahnag iran aijaua par aiheuc va atimi irai taka uarin: eris idim aiheuc vai ilpu agelo nahaiji ra an nedo ineigki, jam eti ato.

³ Akumu imyiehva ra aijaua er arore ra, et idivaig er arore caua um tup ethi ache pan ira ra; im lep ra era leucse nohocred ara, et idim eteuc nohumia aijaua.

⁴ Etmu upene natmehgan unyimia an niji itai asega, um jim ago ingaijid: etpu idim aru nedo o ilpu atimi acitak a Atua, im ilpu atimi ago ingaijid.

⁵ Etmu jim has iramia aijaua itai: jam eklim amen upene va niji itai unyimia: is idim ika aien, “Ekpu idim amen ehelemia ainyak, um eti lep ude caua:”

⁶ va nitai ineigki inta emda akaija nasaigvaig mika, “Et atau imi nyak a Ihova, inki ti imtitaig ainyak tah nedo o atimi vai nyak.”

⁷ Akumu imyiehva ra aijaua eris aminjinai caua ara, um asuptecnaig intas o Atua ehelemia, etmu lep idivaig nimyiisjis ninivaijec ura nimyiisjis ninivaijec unyimia, um aktaktai nehni u nedo ura.

⁸ Et tup ethi ache a Iesu Kristo an naopan iyehki, im lep an naopan ineig, im lep irai iji mesese.

⁹ Etmu jim ahnag inliinmopomia aijaua va nesege acheiachei im nesege mat: nitai upene neigki, mika et amen aktit inliinmopomia va naiheuc o Atua; jam eti amen aktit va nitai caig, is eti upene neigki vai ra eris aheca iran ara.

¹⁰ Et eteuc nefata uja, et itaup vai ra inhagvaig iran era aheca an neom itaup ara.

¹¹ Er atnamud nohui itai umumoh iji ehki an yipin nirahed itac, et apos pan ja iran va nedo has an nuarin itaup a natimi esjilid an ahlap:

¹² et idim ucco, is mas a Iesu an yipin nathatahau itac, va etpu ago adicinadicin ilpu atimi o un an ja iran.

¹³ Va nitai ineigki intumu apan ehelen akaija an yipin nirahed itac, um leucse nitai ehcamai vaig et idivai yin.

¹⁴ Et eti eteuc nuarin-pece uja igcaki inyi amen, ja inta ahilek nuarin-pece iyehki akaija etpu yetpam.

¹⁵ Intumu ahlap vai yin akaija an nitai ahlap ineigki, nikavaig, nimyiahpas Atua irai iji adiat, nikavaig, nohoai itai an nipjineucseija, naaurineig va nidan.

¹⁶ Jam jim ahnag iran aijaua par ago nedo upene im nedo aiheuc: et imyiacitak nitai ahlap iji eigki a Atua.

¹⁷ Akumu imyiaiji intas ura aijaua era aminjinai caua ara, um jim imyiisjis itai: era aminjina nesgamia ara, et idivai ilpu atimi uhpu ahodai ra vaig, mika eri ago nedo ineigki ara, um imyiacitak, um eti ohocred; inyi idim ti upene vai caua nitai ineig.

¹⁸ Akumu alaigaheni vai cama aijaua: ecra ato aijama mika, et upene inliinmopoma, ecra lep merit aijama neklim amen upene vaig irai iji itai asega.

¹⁹ Ja ek idim ugni caua ainyak, mika aki ago nedo ineigki aijaua, va uhpu efi imyiapam nyak ehelemia.

²⁰ Atua ineig et ahes neigpa ehelen, is imyinusjai Iesu aien vai inmas o un, Natimarid uja marom, natimi asgi siip o un et esjilid aien, vai inja an tas-etipup ineig inyi amen irai iji mesese,

²¹ etmu ika aien aki esjilid aijaua an nedo upene asega par imyiaiji intas o un, um ago nedo ineig vai caua et upene an nuhup o un, vai Iesu Kristo; uhmu imyiahpas yin irai iji mesese. Emen.

²² Ak ilpu etoak, ek ugni caua ainyak mika aki imyiaiji intas ated caua ineigki aijaua: ek mun aged nitasvitai ipjidipjid imi caua ainyak.

²³ Akumu ato aijaua mika, eris atceijai Timodeus etoaija; el et efi ham aien, ecrupu ehrateghe caua aijumrau.

²⁴ Kaiheuc vai ra asega era aminjinai caua ara, im lep ilpu atimi upene asega. Era aiheuc vai caua a nupu Itale.

²⁵ Uhmu aiheuc vai caua asega. Emen.