Ilpu Hibru 12 - Intas Etipup

Nuarin-tas alupas 12.

¹ ERA arahed iraija natimi et ahinag acen, um almaijidjid caija, va nitai ineigki intumu iknipagki niji itai opouc asega akaija, im nedo has ineig et apol iraija, um athut emda an nathut ineig er ati an nuhup uja,

² um aes pan. Iesu, aien aigki is atupun nimyiisjis ninivaijec uja aien, um lep ago ehni; is lep mas aien an nauincai atgeig, jam eti ehcamai, va nimyiacitak ineig eris ati an nuhup o un, et lep ateuc aien u dorona u Atua an matan?

³ Akumu aktaktai yin aijaua, eris imyiisjis itai emda vai yin a ilpu atimi auatatimi, va aki jim areci aijaua, um auatialidi inliinmopomia.

⁴ Akis eti emesmas aijaua an nimyiisjis itai unyimia par atapanes nedo has:

⁵ eka ahnag irai tas ated caua aijaua, et tas ehelemia et idivai ilpu halav, um ika, “Ak inhal unyak, jim imyiacal nated euc u Ihova aiek, um jim auatialidi vai intas acaiji euc o un:

⁶ et acaiji ra sji eigki a Ihova et aiyu inliinmopon aien vai ra, um aredei ilpu hal o un asega iji eig et leh ra aien.”

⁷ El et ated caua a Atua, eka idivai ilpu hal o un aijaua; inhalav a di neigki et eti ated yin a etman?

⁸ El eh eti ated caua, el eka ilpu halav an nefalaig aijaua, um eti ilpu halav inivaijec, eris ated ra asega.

⁹ Im lep ineig, eris ated caija a ilpu etmai ohuja, intis eccen vai ra akaija; et idim ucco, intumu emda akaija par imyiaiji intas o Etmai esgaija, par umumoh:

¹⁰ eris ated caija ara ira adiat is eti elpat vai inmerit ura; ja et ated caija aien, mika ti esjilid akaija, um ehrasipiaig nupene o un.

¹¹ Et eti imyiacitak tah an naopan ineig va nated yin, et taigtaig vaig aien: ja erupu ohoai itai an nedo atoh um eigpa an tak aopan ara sji eigki, era aktaktai upene va nated ra ara.

¹² Va nitai ineigki akumu regeig irai ikmamia asjiluc aijaua, im neduomia auatialidi;

¹³ um “ahped efalaig va neduomia,” vai yi jim atga ahnag a natimi isvihteuc neduon; etmu idim cehcehe aien.

¹⁴ AKUMU ahilek neigpa ehele atimi asega aijaua, um ago nedo upene; el et eti ago nedo ineigki tah, inyi ti alum Natimarid aien:

¹⁵ um aminjinaig upene caua, vai yi jim etjo itac tah, um eti leh naiheuc o Atua; vai yi jim edel tah nicvan itai acen, um imyidohalav caua, um auahas atimi inyi ahinag;

¹⁶ vai yi jim eteuc tah natimi ago ingaijid, ka natimi imyipalea, et idivaig Isa, is metto aien, jam ahtai natimi alupas o un vai inhag is ethi ache.

¹⁷ Eka idim ato aijaua mika, is wat ti pan itac nitai iji eigki, is wat merit aien inlehvaig intas upene vai yin, eris atapanes yin; is ahilek emda aien, um taig; ja is eti ecetai tah nuarin nadumoij u inliinmopoi etman aien.

¹⁸ Eka mun eti ahtag pam aijaua an lolan nedoon ineig er ubli, um ahli, um eti ahtag pam an nepeig, im naupat, im neihio,

¹⁹ im nohran toho, im inmotjan tas; ara eris atahaijeg inmotjan tas iyehki ara, eris ugni ara, mika uhmu jim lep tas ehele ra;

²⁰ is ehka vai ra natahaijegvaig intas alep iyehki, nikavaig, “El et ubli lolan nedoon tah nitai emanohwan neduon, uhmu asji an hat, ka ahcai an mopul:”

²¹ eris um imtitaig alupas nitai iji ehki eris ecetai, va nitai ineig is ika a Moses, Ek imtitaig alupas ainyak, um eucjucjucaij:

²² ja akis ahtag pam aijaua an lolan nedoon Saion, im nuarin-pece u Atua umoh, Jerusalem an no hatag, im lep ehele ilpu agelo et ahinag acen,

²³ im ilpu atimi et ahinag er asjapicnaig, im nup an nakalasia ilpu metto, er esvi ra an nohatag, im Atua ineig etpu asuptecnaig nimtan imi atimi asega aien, im nesgai ilpu atimi upene era upene asega ara,

²⁴ im Iesu natimi asan neigpa vai intas-etipup mat, im inja er ohaig, et asuptecnaig niji itai esjilid an ja irai Ebel.

²⁵ Akumu aktaktai aijaua, um jim esjum vai yin et tas aien: el eris eti ethai yin ara eris esjum vai yin ara is tas aien an nobohtan, etpu ehka vai caija nethai yin vaig, ele ta atidjaija akaija iran et tas aien an nohatag:

²⁶ is ahcatina nobohtan va nohran an naopan iyehki: ja et mun tas aien an naopan ineig, um ika, “Ekpu lep ehcethi amaamai an nobohtan ainyak, im lep an nohatag.”

²⁷ Nesgan tas ineigki “lep ehcethi amaamai,” nikavaig, eri iknipagki nitai iji eigki er amaamai, et idivaig niji itai er ago, mika yi amen aktit nitai iji eigki et asjeuc ahtu.

²⁸ Inta mun leh nelcau asjeuc ahtu akaija, va nitai ineigki intumu apol an naiheuc o un akaija, mika ti aheca upene u Atua iran, um eccen vai yin, um imtitai yin:

²⁹ va nitai ineig, nikavaig, “et cop atnamud itai a Atua uja.”