Ilpu Hibru 11 - Intas Etipup

Nuarin-tas alupas 11.

¹ ET esgan nitai iji eigki er aitgaig nimyiisjis ninivaijec uja, um lep itai ehvaig nitai iji eigki er eti almoi.

² Eris ika vai ilpu retpoija eris ilpu atimi upene ara, va nimyiisjis ninivaijec ura.

³ Inta ato akaija va nimyiisjis ninivaijec uja mika, is eteuc niji itai asega vai intas o Atua, eris eti ago niji itai er almoi irai iji itai er ecetai.

⁴ Is imyiisjis ninivaijec a Ebel, is um esjiiid nahlap o un vai Atua an nahlap u Kein; va nitai ineigki eris ika vai yin is atoh nedo o un, is lep ika a Atua is upene niji itai tup ahtai o un: is mas aien, ja et tas vaig aien an naopan ineig.

⁵ Is imyiisjis ninivaijec a Inok, eris um atipagki yin, mika yi jim mas aien; “eris eti ecet yin, is idim atipagki yin a Atua:” eris wat eti fi atipagki yin, eris ika, is upene inliinmopoi Atua vai yin.

⁶ El et eti imyiisjis ninivaijec tah, et ehka vai yin par ago nedo ineig et upene inliinmopoi Atua vaig: aien et apan ehele Atua aien, eris idim ika yi imyiisjis ninivaijec aien mika, et eteuc aien, etpu lep ago neruvaig imi ra sji eig aien era ahilek emda yin ara.

⁷ Is wat asuptecnaig ehele Noa a Atua niji itai eris eti fi ecetai, is imyiisjis ninivaijec aien, um imtitaig, um ago nelcau par imyiatamaig atimi an nimnim o un; is ated atimi an nobohtan aien an nedo ineigki, um ohuun nika et atoh nedo o atimi va nimyiisjis ninivaijec ura.

⁸ Is wat imyiacaij Ebraham a Atua, mika yi apan aien an pece iyehki, etpu leh aien an tak aopan um ohuun; is imyiisjis ninivaijec aien, is um imyiaiji aien um apan, jam eti ato nuarin ineig inyi apan iran:

⁹ is imyiisjis ninivaijec aien, um amen an pece iyehki eris asan tas upyi asaig vaig, is idivaig an taka pece; is amen aien irai tup imnim, im lep Aisak im Jekob; ja eris asan tas upyi asaig iyehki, mika ehtijpu ohuun itai ahtaij:

¹⁰ is aitgaig nuarin-pece iyehki aien, et eteuc inpai eom iran, is asjaaicnaig iran a Atua, um ago.

¹¹ Is imyiisjis ninivaijec a Sera, is um emda aien, um asvalav, um apos inhal o un an nefatimi o un, is idim ika aien, et inivaijec aien is asan tas upyi asaig aien:

¹² va nitai ineigki eris ahes ehele natimi is ethi, is idivaig natimi mas aien, natimi is ahinag, um idivai moijeuv an nohatag, um lep idivaig nauanahvig, et ehka nesvivaig.

¹³ Eris mun emesmas ara sji ehki asega an nimyiisjis ninivaijec ura, eris eti fi ohuun itai eris asan tas upyi asaig vaig, ja eris ecetai itac acen ara, um imyiisjis ninivaijec vaig, um imyiacitak, um asuptecnaig, um ika, eris up uran pece is eche ara, um ilpu atimi amen ehcid an nobohtan.

¹⁴ Ara era asan tas iji eigki ara, era asuptecnaig upene ara mika, era ahilek inpece ura.

¹⁵ Et inivaijec ineig, el eris aktaktai inpece iyehki ara eris ahes iran ara, el is tup upene vai ra inlep adumoij pan vaig iran:

¹⁶ ja era idim ahilek inpece esjilid imi ra ara, an nohatag marom: va nitai ineigki et eti ehcamai vai ra a Atua naniv yin vaig mika Atua ura: is idim yecrei nuarin-pece imi ra aien.

¹⁷ Is wat ahilek inliinmopoi Ebraham a Atua, is imyiisjis ninivaijec aien, um ahlap irai Aisak: maiya, is ahlap irai inhal o un is tup ethi ache aien, aien aigki is imyiisjis ninivaijec niji tas upyi asaig iji eigki aien,

¹⁸ eris asaig ehelen, um ika, “Erupu ahes ehele Aisak a ilpu mapom:”

¹⁹ is ika aien is emda a Atua nimyinusjai yin vaig vai inmas o un; is um lep leh yin o un, is idivaig necsipece.

²⁰ Is imyiisjis ninivaijec a Aisak, um asan tas upene vai Jekob im Isa va niji itai etpu yetpam.

²¹ Is wat ubutpotet u unmas u Jekob, is imyiisjis ninivaijec aien, um asan tas upene vai ohwat hal o Josef; “is aijisji an niseuc o un aien, um alaigaheni.”

²² Is wat ubutpotet u unmas u Josef, is imyiisjis ninivaijec aien, um asuptecnaig va napan u nupu Isreel, um asan tas o un va niji eduon.

²³ Erus wat apos Moses ahwat atmil o un, erus imyiisjis ninivaijec arau, um adenai yin an mohoc is eseij; erus idim alum yin arau mika, is halav esjilid aien; erus eti imtitaig intas alep u natimarid arau.

²⁴ Is wat alupas a Moses, is imyiisjis ninivaijec aien, um esjum nanvi nidan vaig mika inhal u inhalav atahaig u Fero;

²⁵ is ika aien is upene iran inleucsevaig nohocred ehele ilpu atimi u Atua, jam eti upene nimyiacitakvaig nedo has et eti laulau;

²⁶ is ika aien is itai esjilid inlehvaig namcel vai Kristo irai padiaig an pece Ijipt: is aktaktai nimtan esjilid aien:

²⁷ is imyiisjis ninivaijec aien, um ude Ijipt, um eti imtitaig intavaitap u natimarid: is amen aktit aien et idivaig tah et alum yin aien er eti ecet yin:

²⁸ is imyiisjis ninivaijec aien, um apos napaska, um lep ohan ja, vai yi jim ubli ra aien is auahas ilpu halav atamaig inmetto aien:

²⁹ Eris imyiisjis ninivaijec a nupu Isreel, um algauwaig an jop cop, is idivaig nobohtan mese; eris wat ika a nupu Ijipt eri lep algauwaig, eris atpujij ara.

³⁰ Eris wat arahed an nathatahau Jeriko ara ira adiat is seven, is echedeliekse nathatahau va nimyiisjis ninivaijec ura.

³¹ Is imyiisjis ninivaijec a Rehab intakata ago ingaijid iyehki, is um leh ohwat atimi almaijidjid inpece erahki aien, um aiheuc vai rau, is um eti mas aien ehele ilpu atimi imyipalea.

³² Ekpu asan he ainyak? et ehka vai nyak an naopan ineig nasuptecnaigvaig Citeon, im Berak, im Samson, im Jefda, im Tevit, im Samuel, im ilpu profeta:

³³ eris imyiisjis ninivaijec ara, um esjilid irai up urai iji taka pece, um ago nedo atoh, um ohuun itai eris asan tas upyi asaig vaig, um atapanes nipjieucse laion,

³⁴ um ahni incop alupas, um ethan nauitoga; eris emda ara an nauatialidi ura, um esjilid an nedoa, um ahau ilpu eucsupo irai taka pece:

³⁵ eris leucse ilpu hal ura a ilpu takata, eris imyianusjai ra vai inmas ura: eris um auud nahaiji ra, eris ika atimi eri atceijai ra, ja eris esjum ara; va uhpu imyianusjai upene ra:

³⁶ eris um imyiafakahcil nahaiji ra, um aredei ra, um arore ra, um ikni ra iraili eom ipjin,

³⁷ um asji ra irai hat, um ucsamud ra, um oop ra, um atgei ra irai auitoga: eris amen ehcid ara, um aso ra ira arasi siip im narasi anin; eris ilpu ihki atimi ara, um ehteigtaig, um ohocred;

³⁸ is eti upene nedo o atimi an nobohtan mika eri amen ehele ra; eris amen ira amasacen ara, im lep lola edoon, im inmai ij, im inmai tan.

³⁹ Eris ika vai ra sji eigki asega eris ilpu atimi upene ara, va nimyiisjis ninivaijec ura; ja eris eti ohuun itai iji eig ara, eris asan tas upyi asaig vaig:

⁴⁰ ja is ato tah nitai esjilid imi caija a Atua, mika eri upene asega ara um tup ethi ache pan iraija.