Ilpu Hibru 10 - Intas Etipup

Nuarin-tas alupas 10.

¹ ET almui itai upene iji eigki etpu yetpam intas alep, jam eti idivaig asega; va nitai ineigki et auatialidi par ago upenc asega ra sji eigki, era pan ara um ahlap irai itai ahlap iji eigki irai mesese asega, um eti atumop.

² El is ucce, el eris atumop, um eti lep ahlap; el eris ehcethi ago adicinadicin upene ilpu atimi alaigaheni, el eris eti lep ato nedo has ura ara.

³ Ja er imyiehva nedo has irai mesese asega va nitai ahlap iji eigki.

⁴ Et lep ehka vai inja irai kurimatau atamaig im nanin niknipagvaig edo has.

⁵ Va nitai ineig, is wat ehcohos pam an nobohtan aien, is ika aien, “As eti merit va nitai ahlap aiek, im nitai tup ahtai, ja as ati nohuk aiek:

⁶ as eti imyiacitak aiek va niji itai ahlap er atnamud, im niji itai ahlap va nedo has:

⁷ jai kis ika ainyak, Ek idim ham ainyak (eris aged an nitasvitai vai nyak) par imyiaiji intas unyum, ak Atua.”

⁸ Is wat asan tas iyehki aien, um ika, “As eti merit va niji itai ahlap aiek, im niji itai tup ahtai, im niji itai ahlap er atnamud, im niji itai ahlap va nedo has, um eti imyiacitak vaig,” er ahlap an nitai iji eigki et idivaig intas alep;

⁹ is ika aien, “Ek idim ham ainyak, mika ki imyiaiji intas unyum, ak Atua.” Et atipagki nitai uhup aien, mika yi ati nitai apitac.

¹⁰ Er ago upene caija an tas iyehki, va nohui Iesu Kristo ineig, eris ehcethi ahlap iran ache.

¹¹ Era aiji a ilpu atimi ahlap asega irai iji adiat, um aheca, um ehcahinag ahlap an nitai ahlap et ethi, et ehka niknipagkivaig edo has iran:

¹² ja is wat ehcethi ahlap ache aien va nedo has irai iji mesese, is ateucse aien an matai Atua;

¹³ et aitgaig aien um uhum pan naopan iyehki, uhpu ikni ilpu atimi tak atimi iran, mika eri itai atijai neduon iran.

¹⁴ Is ago upene asega ra sji eigki aien eris upene ara irai iji mesese, an nitai ahlap o un is tup ethi ache.

¹⁵ Im lep ineig, et asuptecnaig eheleija a Nesgan Upene; ja is upyi hup aien um asaig, um ika,

¹⁶ “Et ika a Ihova, Et wit ti pan itac nadiat iji ehki, ekpu ati intas-etipup ineigki imi ra ainyak; Ekpu ikni tas alep unyak ainyak irai esgara, um lep aged irai liimopura;

¹⁷ ekpu ti lep imyiehva edo has ura ainyak, im nauatatimi ura.”

¹⁸ Eh wat iknipagki edo has, er eti lep ahlap vaig.

¹⁹ AK ilpu etoak, et eti itaup vai caija napanvaig an nuarin itaup vai inja irai Iesu,

²⁰ an nefalaig mat um umoh, is ati vai caija aien an natcai apelumai iyehki, nohun marom;

²¹ et lep eteuc a natimi esjilid an nahlap an neom u Atua;

²² va nitai ineigki intumu apan ubutpotet anliinmopja inivaijec akaija, um imyiisjis ninivaijec emda, um ago adicinadicin inliinmopja va naktaktai has uja, um yiri nohuja an wai weilah.

²³ Intumu apol akaija an nitai ineig inta aitgaig akaija, um jim amaamai; et inivaijec aien is asan tas upyi asaig aien;

²⁴ intumu aktaktai sjipe caija akaija, um ated sjipe caija, mika yi aiyu sjipe inliinmopja vai caija, um ago nedo upene:

²⁵ intumu jim ude nasjapicnaig uja akaija, et idiva nedo o nahaiji atimi; jam ated sjipe caija: akumu lep emda acen aijaua, va nitai ineig, nikavaig, eka ato aijaua mika et ubutpotet u nadiat iyehki.

²⁶ Ele ta ato intas inivaijec akaija, ja par ispaija ago nedo has akaija, et eti lep eteuc tah nitai ahlap et eche vai edo has,

²⁷ ja uhpu aitgaig tah neruvaig imi ra er imtitaig vaig, im incop emda, etpu auahas ilpu atimi imyipalea.

²⁸ Aien et imyipalea intas alep o Moses aien, et mas aien vai intas asuptecnaig u natimi et ero ka et eseij, er lep eti aiheuc vai yin:

²⁹ ja eka ikha aijaua, etpu esjilid neruvaig ineig eri asuptecnaig imi yin is auhi Inhal o Atua aien, um ika et takitai inja irai intas-etipup iyehki eris ago upene yin iran, um imyiafakahcil Nesgan Upene et aiheuc?

³⁰ Inta ato yin akaija, is ika aien, “Nauritai unyak neigki neruvaig, ekpu aru ainyak; et ika a Ihova:” im lep ineig, “Etpu ahilek nedo o ilpu atimi o un a Ihova.”

³¹ Nitai imtitaig vaig neigki, netjose an nikmai Atua umoh.

³² Akumu imyiehva naopan iyehki aijaua, akis upyi hup aijaua um lah, ja par leucse niji ohocred alupas, um ehtauo vaig;

³³ akis wat itai asjaaicnaig aijaua, vai intas has vai caua, im nohocred unyimia; im lep ineig, akis wat tup ethi ache pan irai ra sji eigki aijaua eris ago nedo ineigki vai ra.

³⁴ Maiya, akis aiheuc vai nyak aijaua an narore nyak vaig, eris wat atoraliak niji itai unyimia, akis imyiacitak aijaua, akis idim ato aijaua mika, et eteuc niji itai esjilid imi caua an nohatag, etpu lep amen.

³⁵ Akumu jim atceijaig nimyiisjis ninivaijec unyimia aijaua, et eteuc nimtan esjilid imi caua vaig.

³⁶ Et upene vai caua nedo eti auatiemda, va, aku wit imyiaiji intas o Atua aijaua, akupu leh itai aijaua eris asan tas upyi asaig vaig.

³⁷ “Inyi eti laulau, ja etpu ehcohos pam aien, eris ika etpu ham aien, ja inyi ti itu.”

³⁸ Etpu lep umoh a natimi et atoh nedo o un va nimyiisjis ninivaijec o un: ja “el et adumoij nesgak, inyi ti imyiacitak vai yin ainyak.”

³⁹ Inta eti adumoij pan akaija u nauahas caija; ja inta imyiisjis ninivaijec akaija va nimviatamaig-vaig nesgaija.