Ilpu Hibru 1 - Intas Etipup

Nuarin-tas alupas 1.

¹ IS ehcahinag tas a Atua ehele ilpu retpoija itu acen irai ilpu profeta o un, is acheiachei intas o un;

² ja par apitac um tas eheleija an naopan ineig irai Inhal o un ineig, is ati yin aien mika yi ohuun niji itai asega aien, is lep ago nohatag im nobohtan aien vai yin;

³ is aijoran natimi alupas o un aien, is lep tup idivai neteuc o un aien, um aminjinaig niji itai asega an tas emda o un; is wat ahlap va nedo has uja iran aien, is ateucse aien an matai Natimi alupas ijinies acen;

⁴ et esjilid aien irai ilpu agelo, et lep esjilid nidan ineig eris alupai yin irai idara.

⁵ Is eti tas a Atua ehelen tah nagelo an tah naopan, um ika, “Nai Hal unyak aiek, ek mun apos euc ainyak an nadiat ineigki:” im lep ineig, “Ekpu Etman ainyak, etpu lep Hal unyak aien:”

⁶ im lep ineig, et wat lep imyiapam Inhal o un inmetto aien an nobohtan, et ika aien, “Erumu atpuse an nuhup o un a ilpu agelo o Atua asega.”

⁷ Ja is ika aien vai ilpu agelo o un, “Et ago ra aien eri idivai imtinjop a ilpu agelo o un, um idiva nawainapit a ilpu aheca o un.”

⁸ Ja is ika aien ehele Inhal o un, “Ak Atua, et amen natimi alupas unyum irai iji mesese, um lep atoh nedo asega unyum an nelcau unyum:

⁹ as merit va nedo atoh aiek, jam amcel va nedo has; va nitai ineigki is aspi euc a Atua ineig, et Atua unyum aien, an narakei ineig er imyiacitak, na lep esjilid aiek irai ilpu etoam.”

¹⁰ Im lep ineig, “Ak Natimarid, as ati nededuon nobohtan aiek itu acen, et lep auritai u nikmam nohatag:

¹¹ etpu idim ti nitai iji eigki; ja napu amen aiek: etpu mohtai itai niji itai asega et idivaig napelumai;

¹² napu asvi aiek et idiva napamas, etpu lep eche: ja nai tup ethi ache aiek, inyi ti lep ti inmesese iram.”

¹³ Ja is eti tas aien ehelen tah nagelo an tah naopan, um ika, “Namu ateuc aiek an matak, um uhum pan naopan iyehki ekpu ikni ilpu atimi tak atimi iram ainyak, mika eri itai atijai neduom iran.”

¹⁴ Era esgai itai ara asega par aheca, eris abrai ra mika eri apan ara um auritai vai ra sji eigki erupu leh nimyiatamaig ra ara.