Hosia 9 - Intas Etipup

Nuarin tas alupas 9.

Namen has u nup Isreel im nimiapan ra an taka pece va nedo has ura im nedo apat ura.

¹ AK nup Isreel, akumu jim imiacitak alupas aijaua, um idivaig nup urai iji pece: eka mun udei Atua unyimia aijaua um ago ingeijid; eka mun ago nedo o intakata has aijaua et merit aien va nimtan irai uarin asega er auud korn iran.

² Erupu eti hag nitai caig ara um eti umnyi waina, etpu ti waina mat ehele ra.

³ Erupu eti amen ara an pece u Ihova; ja erupu adumoij pan an pece Ijipt a nup Ifreem, erupu hegaig itai has ara an pece Asiria.

⁴ Erupu eti atladwi nide vaine ara imi Ihova, inyi eti imiacitak niji itai ahlap ura aien: etpu idivaig nitai caig u ilpu atimi imitaig atimi niji itai ahlap ura imi ra; erupu has natimi asega eri hag iran ara: inyi eti apan anliin neom u Ihova nitai hegaig ura, erupu idim umumoh vaig ara.

⁵ Aki ago inhe aijaua an nadiat iyehki eri asjapicnaig iran ara, an nadiat iyehki marom eri ahlap iran vai Ihova?

⁶ Vaig inig nikavaig, era mun apan ara va eri jim auahas ra: uhpu asjapicnai ra an pece Ijipt, uhpu atelmoi ra an maliyum Memfis: etpu amasacen vai nadeni niji uarin upene et amen silver ura iran: etpu amen niji itai upunupun irai imnim ura.

⁷ Et mun yetpam niji adiat par aru iran, et mun yetpam niji adiat ago neruvaig iran; erupu ato a nup Isreel: et eti eteuc lele ilpu profeta ura, era ahnag a ilpu atimi asuptecnaig intas upene, vaig inig nikavaig, et alupas neruvaig iramia, im lep inig, et alupas nedemda vai caua.

⁸ Era ika a nup Ifreem yi atau ira ra a Atua unyak: ja era idivaig nitai apro itai u ilpu atimi ahilek man a ilpu profeta ura an nedo asega ura, um idivaig nitai er amcel vaig an neom u Atua ura.

⁹ Et mun esjilid nedo has ura, et idivaig nedo iyehki an nopan u nup u Cibea: etpu imiehva nedo acalacal ura aieu, etpu aru nedo has ura aien.

¹⁰ Kis ecet nup Isreel ainyak eris idivaig nohwai vaine an namasacen ara; kis ecet ilpu retpomia ainyak eris idivaig inhupnai ohwai ateg ara an nasau uhup iran: ja eris apan ehele Bealpior ara, um idumdumoij u nedo has iyehki era ehcamai vaig natimi; eris eheshas ara um tup idivaig nitai iyehki eris merit vaig ara.

¹¹ Etpu aepan, et idivaig inman, nitai inig er imiahpas nup Ifreem vaig; eri eti lep asvalav a ilpu takata ura, eri eti lep apos ilpu hal ura ara, eri eti lep opoc ara.

¹² Ja el era aminjinaig ilpu hal ura ara, ekpu iknipagki ra ainyak, inyi eti amen tah ra: kaiheuc vai ra eku wit udei ra ainyak!

¹³ Ek alum nup Ifreem ainyak, eris ahwaig ra an nuarin pece upene, et idivaig nup u Tairus: ja erupu imiapan ilpu hal ura a nup Ifreem ehele ilpu atimi atgei atmas.

¹⁴ Ak Ihova, namu alupai ra itai aiek: ja napu alupai ra inhe aiek? namu alupai ra aiek ilpu takata iji ig eri apos has ilpu hal ura, etpu lep ehka vai ra par alidai ilpu hadi ura.

¹⁵ Et eteuc nedo has asega ura an maliyum Cileat: kis idim esjum vai ra ainyak eahki: ek mun ahlo pan ra an nimnim unyak ainyak, mika is has nedo inig eris ago ara, inyi eti aiyu inliinmopok ainyak vai ra: era atimi imipalea a ilpu atimi alupas asega ura.

¹⁶ Eh mun auud nup Ifreem, et mese neucvara ara, inja eti eteuc nohwai itai ira ra: el era apos ilpu halav ara, ekpu atgei ilpu halav cap ura ainyak.

¹⁷ Etpu amcel vai ra a Atua unyak, vaig inig nikavaig, eris eti atahaijeg intas o un ara: erupu amen ehcid ara ehele nup urai iji pece.