Hosia 8 - Intas Etipup

Nuarin tas alupas 8.

1, 12 Er ika eri auahas nup Isreel va nedo imipalea ura, 5 im nedo apat ura.

¹ AKUMU ahlai intoho aijaua: etpu apam aien et idivaig inmeijcop alupas, um aat ira atimi u Ihova; era mun idim imipalea intas etipup unyak ara, um atladwi intas alep unyak.

² Erupu ahlaig vai nyak a nup Isreel, um ika, Ak Atua unyima, ecra ato euc aijama.

³ Era mun atipagki nedo inig et upene a nup Isreel: erupu ahau ra a ilpu atimi edemda vai ra.

⁴ Eris ikni ilpu atimarid ara, ja eris eti ahes ehelek ara: eris ikni ilpu atimi alupas ara, ja kis eti ato ra ainyak: era mun ago atmasimai imi ra irai silver ura im colt ura, va uhpu auahas ra.

⁵ Ak nup u Sameria, et itai amcel vaig inhakli kurimatau unyimia; et mun ehcohos nedemda unyak vai ra: etpu upene inliinmopora ara an nahopan?

⁶ Is ahes ehele nup Isreel natmasimai iyehki; is ago yin a natimi wud ugnyit; et idim eti Atua aien: va nitai inigki eri atnamud inhakli kurimatau u nup u Sameria.

⁷ Era mun ahwaig nimtinjap ara, va nitai inigki erupu aldei narakiraki ara: etpu ti inceen: inyi eti ahes an tisian nohwan: ja el et idim oho, erupu caig a ilpu atimi irai taka pece.

⁸ Er atleg nup Isreel: era amen ara an nopan inig ehele nup urai iji pece, et idivaig nipjinitai inig er eti merit vaig.

⁹ Eris aridjipan ehele nup Asiria ara, et idivaig togke aleg et echim amen: era mun ahtai nimtan a nup Ifreem imi atimi atau imi ra.

¹⁰ Era mun idim auarimtai atimi ara ehele nup urai iji pece, ja ekpu asjapicnai ra ainyak an nopan inig, erupu ohocred tupko ara va nakwanaham imi natimarid u ilpu atimi alupas.

¹¹ Eris wat ago natau is ahinag a nup Ifreem par ago nedo has iran, eris ago nedo has ara va natau iji ehki.

¹² Kis aged imi ra ainyak niji itai esjilid an tas alep unyak, ja eris ika ara et idivaig intakitai nitai iji ehki.

¹³ Era ahlap irai itai eklim edo irai pece imi nyak ara, um hegaig; ja et eti upene inliinmopoi Ihova vai ra; etpu auroauro aien um imiehva nedo acalacal ura aien, um aru nedo has ura: erupu adumoij pan an pece Ijipt ara.

¹⁴ Era mun idim ahnag ira Atua inig a nup Isreel is ago ra aien, era actai iyum itap ara: era mun ago maliyum et eteuc nathatahau iran et ahinag a nup u Juta: va nitai inigki ekpu ati incap pan irai maliyum ura ainyak, etpu atnamud niji imnim atimi ura incap.